மணியாச்சி ரயில் நிலையத்தில் வாஞ்சிநாதனுக்கு அஞ்சலி செலுத்த ரயில்வே நிர்வாகம் அனுமதி மறுப்பு

தூத்துக்குடி : சுதந்திர போராட்டத்தின் போது ஆங்கிலேய கலெக்டரை சுட்டுகொலை செய்து தானும் தற்கொலை செய்து கொண்டவர் வீர வாஞ்சிநாதன். அவர் உயிர் நீத்த நாளில் ரயில் நிலையத்தில் அஞ்சலி செலுத்த ரயில்வே நிர்வாகம் தொடர்ந்து அனுமதி மறுத்து வரும் அவல நிலை ஏற்பட்டுள்ளது.
இந்தியாவை ஆங்கிலேயர்கள் கைப்பற்றி ஆட்சி செய்த காலத்தில் , சுதந்திரத்திற்காக பல்வேறு விதமான போராட்டங்களை நடத்தி வந்துள்ளனர். குறிப்பாக தூத்துக்குடி மாவட்டத்தில் முக்கிய தலைவர்கள் இருந்துள்ளனர். குறிப்பாக எட்டயபுரம் பாரதியார், ஓட்டப்பிடாரம் வ.உ.சிதம்பரனார். பாஞ்சாலங்குறிச்சி கட்ட பொம்மன், வீரன் சுந்தரலிங்கம், வெள்ளையத்தேவன் இப்படி இந்த மாவட்டத்தில் விடுதலை போராட்ட வீரர்கள் உள்ளனர். இதில் வீர வாஞ்சிநாதனும் ஒருவர்.
1911 ஜூன் 11 ம் நாள் ரயிலில் வந்த நெல்லை கலெக்டரான ஆங்கிலேய அதிகாரி ஆஷ் துரையை மணியாச்சி ரயில் நிலையத்தில் வாஞ்சிநாதன் சுட்டுக் கொலை செய்தார். அதன் பின் அங்குள்ள கழிப்பறையில் தன்னையே சுட்டு தற்கொலை செய்து கொண்டார். இந்த செயலால், மணியாச்சி ரயில் நிலையத்திற்கு வாஞ்சி மணியாச்சி என, பெயரிடப்பட்டது. இவ்வளவு பெருமைகள் இருந்தும், வாஞ்சிநாதன் உயிரிழந்த இடத்தில், அவருக்கு அஞ்சலி செலுத்த வேண்டும், என தொடர்ந்து பல ஆண்டுகளாக ரயில்வே நிர்வாகத்தினை வலியுறுத்தி வருகின்றனர். அதற்கு ரயில்வே நிர்வாகம் அனுமதி மறுத்து வருகிறது. தற்போது அவர் உயிரிழந்த கழிப்பறையை தரை மட்டமாக்கி அந்த இடமே அடையாளம் தெரியாத அளவிற்கு ரயில் நிர்வாகம் மாற்றி விட்டது. வாங்சிநாதன் பிறந்த ஊரான செங்ககோட்டையில் நினைவு இல்லம் அமைக்கப்பட்டுள்ளது. அங்கு தான் அவருக்கு அஞ்சலி செலுத்தும் நிகழச்சி நடந்து வருகிறது. என்னதான் இருந்தாலும், அவர் உயிர் துறந்த இடத்தில் நினைவகம் அமைத்து அஞ்சலி செலுத்த பலர் ஆர்வத்துடன் இருந்தும், இன்று வரை அரசும், ரயில் நிர்வாகமும் அனுமதியளிக்க மறுத்து வருகின்றனர்.
வரலாற்று ஆய்வாளர் இளசை மணியன் கூறியதாவது: சுதந்திர போராட்ட வரலாற்றில் ஆங்கிலேய ஆட்சியின் அடக்கு முறைகளை எதிர்த்து, தீவிரமாக போராடி உயிர் நீத்த இளைஞர்களில் வாஞ்சிநாதனும் ஒருவர். இவரது நூற்றாண்டு விழா சமயத்தில் அவர் உயிரிழந்த இடத்தில் அஞ்சலி செலுத்த அனுமதி கேட்டு ரயில் நிர்வாகத்திற்கு தொடர்ந்து வலியுறுத்தி வருகிறோம். ஆட்சியாளர்களும், அதிகாரிகளும் இதனை கண்டு கொள்வதில்லை. அன்றைய தினம் பிளாட்பாரம் டிக்கெட் எடுத்து சென்று 10 நிமிடங்களில் அஞ்சலி செலுத்தி கொள்ளுங்கள் என, கேவலமாக சொல்கின்றனர் அதிகாரிகள். மூன்று ஆண்டுகளாக தொடர்ந்து ரயில் நிர்வாகத்திற்கு பல முறை மனுக்கள் அனுப்பியும், இன்று வரை அனுமதி வழங்கவில்லை, என்பது வருத்தமான செயலாகும். வாஞ்சி மணியாச்சி ரயில் நிலையம், என பெயர் மாற்றம் செய்தது கூட இன்றும் பெயரளவிற்குத்தான் உள்ளது. தற்போது டிக்கெட் எடுத்தால் கூட மணியாச்சி என்ற பெயரில் தான் ரயில் நிர்வாகம் டிக்கெட் வழங்குகிறது. வாஞ்சி மணியாச்சி என்ற பெயரில் டிக்கெட் வழங்குவதில்லை.வாஞ்சிநாதன் உயிரிழந்த இடத்தில் நினைவகம் அமைத்து அங்கு சுதந்திர போராட்ட வரலாறு, தலைவர்கள் படங்களை வைத்து பாதுகாக்க நடவடிக்கை எடுக்க வேண்டும்.
ராஜகோபால், காங்., கட்சி பிரமுகர் கூறியதாவது: வாஞ்சிநாதன் உயிரிழந்த நூற்றாண்டு விழா சமயத்தில் இருந்து ரயில் நிர்வாகத்திற்கும், தென்னக ரயில்வே மேலாளர், ரயில்வேஅமைச்சர், தமிழக முதல்வர் உட்பட அனைவருக்கும் மனு கொடுத்து வருகிறோம். இன்று வரை யாரும் அதனை கண்டு கொள்ளவில்லை. அவரது நினைவிடத்தில் அஞ்சலி செலுத்த கூட அனுமதி மறுக்கப்படுகிறது. கடந்த ஆண்டுகளில் அரசுக்கு நெருக்கடி கொடுத்த போது மணியாச்சி ஊராட்சித்தலைவரும், வி.ஏ,ஓ., முன்னிலையில் அஞ்சலி செலுத்த அனுமதிக்கப்பட்டது. அதன் பிறகு இது வரை எந்த முன்னேற்றமும் இல்லை. இது போன்ற நிலையால் சுதந்திரப்போராட்ட வீரர்களை வரும் இளம் தலைமுறைகள் மறந்து விடும் நிலை ஏற்பட்டுள்ளது. அரசு நடவடிக்கை எடுத்து வாஞ்சிநாதன் உயிரிழந்த இடத்தில் நினைவகம் அமைத்து அஞ்சலி செலுத்த நடவடிக்கை எடுக்க வேண்டும்.
Click Here