அ.தி.மு.க.,விற்கு சென்றவர்கள் அனாதைகளாகி விட்டனர்: விஜயகாந்த்

''அ.தி.மு.க., தலைமையை நம்பி சென்றவர்கள், அரசியல் அனாதைகளாகி விட்டனர். அதேபோன்ற நிலையை, நீங்களும் அடைய வேண்டாம். கட்சிக்கு பிரகாசமான எதிர்காலம் இருக்கிறது என்பதை, விரைவில், உங்களுக்கு உணர்த்துவேன்,'' என, மாவட்ட செயலர்களுக்கு தே.மு.தி.க., தலைவர் விஜயகாந்த், அறிவுரை வழங்கியுள்ளார்.

லோக்சபா தேர்தல் தோல்வி குறித்து விவாதிப்பதற்காக, கடந்த 4ம் தேதி, தே.மு.தி.க., நிர்வாகிகள் ஆலோசனை கூட்டம், சென்னை கோயம்பேட்டில் உள்ள அக்கட்சி தலைமை அலுவலகத்தில் நடந்தது.

விசாரணை

அப்போது, தேர்தலில் தோல்வியடைந்த, 14 வேட்பாளர்களையும், தனித்தனியாக தனது அறைக்கு அழைத்து, விஜயகாந்த் விசாரணை நடத்தினார். தோல்விக்கான காரணம் குறித்து வேட்பாளர்கள் தெரிவித்த காரணங்களை, குறிப்பெடுத்து கொண்டார்.அடுத்த கட்டமாக, மாவட்ட செயலர்களிடம் கருத்து கேட்க இருப்பதாக விஜயகாந்த் அறிவித்தார். அதன்படி, நேற்று முன்தினம், மாவட்ட செயலர்களின் கருத்து கேட்பு கூட்டம் ரகசியமாக துவங்கியது. தொடர்ந்து நான்கு நாட்கள் கூட்டம் நடக்கிறது.வழக்கம் போல், மாவட்ட செயலர்களை தனித்தனியாக அழைத்து, விஜயகாந்த் கருத்துக்களை கேட்டு குறிப்பெடுத்துக் கொண்டார்.

பணபலம் இல்லை

'கூட்டணி கட்சிகளின் ஒத்துழைப்பு இல்லாததும், வேட்பாளர்களிடம் பண பலம் இல்லாததும் தான் தோல்விக்கான பிரதான காரணம்' என, விஜயகாந்திடம் மாவட்ட செயலர்கள், கருத்து தெரிவித்தனர். இதைத் தொடர்ந்து, மாவட்ட செயலர்களுக்கு, விஜயகாந்த் சில அறிவுரைகளை வழங்கியுள்ளார்.

இதுகுறித்து, தே.மு.தி.க., வட்டாரத்தில் கூறப்படுவதாவது:
கடந்த 4ம் தேதி நடந்த ஆலோசனை கூட்டத்தில், மாவட்ட செயலர்கள் தான் தேர்தல் தோல்விக்கு காரணம் என, விஜயகாந்த் வெளிப்படையாக குற்றம் சாட்டினார்.

சமரசம் செய்யும் முயற்சி

ஒன்பது ஆண்டுகளாக கட்சி வளர்ச்சிக்கு கோடிக்கணக்கான ரூபாய்களை செலவிட்ட தங்கள் மீது, விஜயகாந்த் பழி சுமத்தியதை, சில மாவட்ட செயலர்களால் ஜீரணித்துக் கொள்ள முடியவில்லை. இதனால், அவர்கள் கடும் அதிருப்தியில் இருந்தனர். இதை அறிந்து விஜயகாந்த், அவர்களை சமரசம் செய்யும் முயற்சியாக, கூட்டத்தை பயன்படுத்திக் கொண்டார். அவர், மாவட்ட செயலர்களிடம் பேசும் போது, 'கட்சி இக்கட்டான நிலையில் இருப்பதாக மாவட்ட செயலர்கள் உட்பட பலரும் நினைக்கின்றனர். அதனால், அ.தி.மு.க.,விற்கு சென்று விடவும் திட்டமிட்டு வருகின்றனர்.

தேயும் கட்சி அல்ல

அங்கு சென்ற, எட்டு எம்.எல்.ஏ.,க்களும், பண்ருட்டி ராமச்சந்திரனும் என்ன மரியாதையுடன் இருக்கின்றனர் என்பதை, பாருங்கள்.தேர்தல் வெற்றிக்குப்பின், முதல்வரை சந்திக்க அனுமதி கேட்டு, தேதி கேட்டு, காத்திருக்கின்றனர். அவர்களுக்கு அனுமதி கிடைக்கவில்லை. அ.தி.மு.க., தலைமையை நம்பி சென்றவர்கள் அனைவரும், அரசியலில் அனாதைகளாகி விட்டனர்.தே.மு.தி.க., தேயும் கட்சி அல்ல. அதற்கு வளமான எதிர்காலம் இருக்கிறது. விரைவில், அதை நான் உணர்த்துவேன்' என்றார்.இவ்வாறு, தே.மு.தி.க., வட்டாரத்தில் கூறப்படுகிறது.

தினமலர்

ம்ம் மீண்டும் உளறலா... தலிவா உங்கள் உளறலால்தான் கட்சி ஊத்திக்கிச்சுன்னும் இன்னுமா பிரியல உங்களுக்கு..