சீனா விண்டோஸ் 8 ஆப்பரேட்டிங் சிஸ்டம் பயன்படுத்துவதை தடை செய்துள்ளது

தன்னுடைய நாட்டில் மட்டுமாவது, விண்டோஸ் எக்ஸ்பி சிஸ்டத்திற்கான சப்போர்ட்டினைத் தொடர்ந்து தருமாறு, சீன அரசு கேட்டுக் கொண்ட பின்னரும், மைக்ரோசாப்ட் மறுத்ததால், சீன அரசு விண்டோஸ் 8 ஆப்பரேட்டிங் சிஸ்டம் பயன்படுத்துவதை தடை செய்துள்ளது. இந்த தடை அரசு அலுவலகங்களில் மட்டுமே அமல்படுத்தப்படுகிறது. பொதுமக்கள் விரும்பினால், பயன்படுத்தலாம். ஆனால், அரசு அலுவலகங்களுடன் டிஜிட்டல் பைல்களுடன் தொடர்பு கொள்ளும் மக்கள் விண்டோஸ் 8 பயன்படுத்தி, பைல்களைத் தயார் செய்தால், அவை முந்தைய சிஸ்டங்களிலும், குறிப்பாக விண்டோஸ் எக்ஸ்பியிலும் பயன்படுத்தக் கூடியதாக இருக்கும்படி அமைக்க வேண்டியதிருக்கும்.

சீன அரசின் செய்தி தொடர்பு அமைப்பான ஸின்குவா (Xinhua) இது குறித்து கூறுகையில், அரசு அலுவலகங்களில் பயன்படுத்தப்படும் சர்வர்கள், கம்ப்யூட்டர்கள், லேப்டாப் கம்ப்யூட்டர்கள் மற்றும் பிற எந்த சாதனத்திலும் விண்டோஸ் 8 பயன்படுத்தக் கூடாது என தடை விதிக்கப்பட்டுள்ளது. பாதுகாப்பு காரணங்களுக்காக இந்த நடவடிக்கை எடுக்கப்பட்டுள்ளது என்று தெரிவித்துள்ளது.

இந்த நடவடிக்கை குறித்து மைக்ரோசாப்ட் நிறுவன நிர்வாகம் கருத்து தெரிவித்துள்ளது. தன் பாதுகாப்பிற்கெனத் தேவைப்படும் அம்சங்களை எந்த ஒரு நாட்டின் அரசு கேட்டுக் கொண்டாலும், அவை பின்பற்றப்பட்டு ஆப்பரேட்டிங் சிஸ்டங்கள் வடிவமைக்கப்படுகின்றன. அதே போல, சீன அரசு கேட்டுக் கொண்ட அனைத்து பாதுகாப்பு அம்சங்களும், விண்டோஸ் 8 சிஸ்டத்தில் உள்ளன. எனவே, பாதுகாப்பு காரணங்களுக்காக, விண்டோஸ் 8 பயன்படுத்தக் கூடாது என்பதில் எந்த காரணமும் சரியில்லை. மேலும், சப்போர்ட் பைல்கள் எதுவும் இனி தரப்படப் போவதில்லை என்பதால், விண்டோஸ் எக்ஸ்பி பயன்படுத்தப்படுவது அதிக ஆபத்தினை விளைவிக்கும் என அறிவிக்கப்பட்டுள்ளது.

இந்த தடை, மைக்ரோசாப்ட் நிறுவனத்தின் சாப்ட்வேர் வணிகத்தினை அதிகம் பாதிக்கும். ஆப்பரேட்டிங் சிஸ்டம் மட்டுமின்றி, அதனைச் சார்ந்த அப்ளிகேஷன் சாப்ட்வேர் தொகுப்புகள் மிகச் சிறப்பாக வடிவமைக்கப்பட்டுள்ளன என்று மைக்ரோசாப்ட் அறிவித்த வண்ணம் உள்ளது. எனவே, விண்டோஸ் 8 பயன்படுத்தாத நிலையில், சீனாவில் இந்த விற்பனை கேள்விக்குரியதாக மாறும் நிலை ஏற்பட்டுள்ளது.

இந்த தடை உத்தரவு, மைக்ரோசாப்ட் நிறுவனத்தின் கரங்களை முறுக்கி, விண்டோஸ் எக்ஸ்பிக்கு சப்போர்ட் பைல்களைத் தொடர்ந்து வழங்கிட சீனா பயன்படுத்தும் ஆயுதமாகவும் இருக்கலாம். ஏற்கனவே சீன அரசுக்கும் அமெரிக்க அரசுக்கும் சரியான உறவு இல்லாத நிலையில், சீன அதிகாரிகள், அங்கு உருவாக்கப் பட்டுள்ள லினக்ஸ் ஆப்பரேட்டிங் சிஸ்டத்தினையே தொடர்ந்து பயன்படுத்துவார்கள் என்று எதிர்பார்க்கப்படுகிறது.

சீனாவின் இந்த தடை தனக்கு ஒரு பெரிய ஆச்சரியத்தைக் கொடுத்துள்ளது என்று மைக்ரோசாப்ட் அறிவித்துள்ளது. ஆனாலும், இது குறித்து அந்நிறுவனம் கவலைப் பட்டதாகத் தெரியவில்லை. அரசு நிர்வாகம் ஒன்று, தொழில் நுட்ப ரீதியான ஒரு பயன்பாட்டுப் பொருளைத் தடை செய்வது என்பது சரியான நடவடிக்கை இல்லை. முன்பு, ரஷ்யா ஆப்பிள் நிறுவன சாதனங்களுக்குத் தடை விதித்தது. ஆப்பிள் சாதனங்களுக்குப் பதிலாக, ரஷ்ய அரசு அதிகாரிகள், சாம்சங் டேப்ளட் பி.சி.க்களைப் பயன்படுத்தினார்கள். இதற்கான காரணத்தை ரஷ்ய அரசு தெரிவிக்கும்போது, அரசு அதிகாரிகள் எடுக்கும் முடிவுகள் ரகசியமானவை என்றும், அவற்றைப் பதியும் போது, அவை காப்பாற்றப்படுவதை ஆப்பிள் சாதனங்கள் முழுமையாக மேற்கொள்வதில்லை என்றும் கூறியது.

மைக்ரோசாப்ட் நிறுவனத்தைப் பொறுத்த வரை, அதன் சீன வர்த்தகத்தில், மற்ற நாடுகளுடன் ஒப்பிடுகையில், அதிக வருமானம் கிடைப்பதில்லை. இதனை மைக்ரோசாப்ட் நிறுவனத் தலைமை அதிகாரியாகப் பணியாற்றிய ஸ்டீவ் பால்மர், 2011லேயே குறிப்பிட்டுள்ளார். சீனாவில், பெரும்பாலும் நகலெடுத்துப் பயன்படுத்தும் பைரசி மார்க்கட் தான் அதிகம் செயல்பட்டு வருகிறது. கட்டணம் செலுத்தி, ஓ.எஸ். பெறுவது மிகக் கொஞ்சமே. எனவே, மைக்ரோசாப்ட் நிறுவனத்திற்குச் சரியான வருமானம் சீனாவிலிருந்து கிடைப்பதில்லை.

தற்போது, சீனாவில் பயன்படுத்தப்படும் கம்ப்யூட்டர்களில், விண்டோஸ் 8 சிஸ்டம் 3.4 %, விண்டோ ஸ் எக்ஸ்பி 44.1% மற்றும் விண்டோஸ் 7 சிஸ்டம் 47.2% பயன்படுத்தப்பட்டு வருகின்றன. இதனை ஐரிஷ் நிறுவன ஆய்வு அமைப்பு ஸ்டேட் கவுண்ட்டர் அறிவித்துள்ளது.

கம்ப்யூட்டர் மலர்

என்னை பொறுத்தவரை விண்டோ xp யில் பயன் படுத்திய திருப்தி window 8 இல் கிடைக்க வில்லை.
பொருத்து இருந்து பார்ப்போம் சீனா என்ன செய்கிறது என்று.!

அருண் wrote:என்னை பொறுத்தவரை விண்டோ xp யில் பயன் படுத்திய திருப்தி window 8 இல் கிடைக்க வில்லை.
பொருத்து இருந்து பார்ப்போம் சீனா என்ன செய்கிறது என்று.!

மேற்கோள் செய்த பதிவு: 1067701

விண்டோஸ் 8-ல் ஒரு திருப்தி இல்லை என்பது உண்மையே.