உலகக் கோப்பை கால்பந்து போட்டி 2014

போர்ச்சுக்கலுக்கு மேலும் ஒரு துரதிஷ்டம்! PEPE -க்கு சிகப்பு எச்சரிக்கை அட்டை வழங்கி ஆட்டத்திலிருந்து வெளியேற்றப்பட்டுள்ளார்!

முதல் பகுதி ஆட்டத்தில் கூடுதலாக வழங்கப்பட்ட 2 நிமிடங்களில் ஜெர்மன் மேலும் ஒரு கோல் அடித்து 3:0 என்று முன்னிலை பெற்றுள்ளது!

ஜெர்மனியின் அதிரடி தொடர்கிறது! மேலும் ஒரு கோல்!

ஜெர்மனி 4 : 0 போர்ச்சுக்கல்

போர்ச்சுகல் தான் வெற்றிபெறும் என்று உலகமே ஆருடம் கூறியது. ஆனால் ஜெர்மனி அந்த ஆருடத்தை தவிடு பொடியாக்கிவிட்டது! ஆட்ட முடிவில் ஜெர்மன் அணி 4:0 என்ற கோல் கணக்கில் வெற்றி பெற்றுள்ளது!

ரொனால்டோ ஏமாற்றம்; தாமஸ் முல்லர் ஹேட்ரிக்; ஜெர்மனி அதிரடி வெற்றி

உலகக் கோப்பைக் கால்பந்து போட்டியில் இன்று ஜெர்மனி அணி போர்ச்சுக்கல் அணியை 4-0 என்ற கோல் கணக்கில் வீழ்த்தியது. ஜெர்மனி வீரர் தாமஸ் முல்லர் ஹேட்ரிக் கோல்களை அடித்தார்.

தொடக்கத்தில் ஜெர்மனியின் ஆதிக்கம் இருந்தது. ஜெர்மன் வரிசையில் தாமஸ் முல்லர் முன்னிலையில் நிறுத்தப்பட்டுள்ளார். போர்ச்சுக்கல் அணியில் கிறிஸ்டியானோ ரொனால்டோ இப்போதைக்கு இடது பக்கம் களமிறக்கப்பட்டுள்ளார்.

2வது நிமிடத்தில் ஜெர்மனி வீரர் போடெங் அருமையாக பந்தை தாமஸ் முல்லரிடம் அளிக்கிறார். பெபே அதனை தலையால் முட்டி வெளியே தள்ள ஜெர்மனிக்கு த்ரோ வாய்ப்பு கிடைத்தது. பிறகு கார்னர் வாய்ப்பும் கிடைத்தது. ஆனால் ஒன்றும் பயனில்லை.

3வது நிமிடத்திலும் ஜெர்மனி வீரர் குரூஸ் போர்ச்சுக்கலிடமிருந்து பந்தை பிடுங்கிச் சென்று முன்னேறினார். பந்து இடதுபுறத்தில் இருந்த மரியோ கோயெட்சேயிடம் அடிக்கப்படுகிறது. அவர் போர்ச்சுகல் வீரர் ஜோ பெரைராவை ஏமாற்றி பந்தை அடிக்க முற்படும்போது போர்ச்சுகல் தடுப்பு வீரர் பந்தை தன் வசம் கொண்டு வந்தார்.

4வது நிமிடத்தில் இடது புறம் இருந்த கிறிஸ்டியானோ ரொனால்டோ வெளியே வந்தார். அவர் ஒரு அருமையான பாஸை சக வீரர் ஹியூகோ அல்மெய்டாவுக்கு அடிக்க அவரோ அபாரமாக எடுத்துச் சென்று முன்னேறினார் ஜெர்மனி பெனால்டி அருகே வந்து கோலை நோக்கி ஒரு ஷாட்டை அடிக்க அதில் சக்தி இல்லை அதனை ஜெர்மன் கோல் கீப்பர் மேனுயெல் நியூயர் எளிதாகப் பிடித்து விடுகிறார்.

6வது நிமிடத்தில் ஜெர்மனிக்கு ஷாட் வாய்ப்பு கிடைத்தது. அதனை கோல் கீப்பர் அடிக்க அந்தப் பந்தை போர்ச்சுகல் வீரர் ஃபேபியோ கோயெண்ட்ராவோ வென்று இடது புறமாக எடுத்துச் சென்று ரொனால்டோவுக்கு அடிக்கிறார். ரொனால்டோ விறுவிறுவென பந்தை எடுத்துச் சென்று 30 யார்டிலிருந்து ஜெர்மன் கோல் நோக்கி அடிக்க பந்து மேலேயும், வைடாகவும் சென்றது. கோல் முயற்சி வீண்.8வது நிமிடத்திலும் கிறிஸ்டியானோ ரொனால்டோ விறுவிறுவென முன்னேறி கோலை நோக்கி அடிக்க நேராக ஜெர்மனி கோல் கீப்பர் கைகளுக்குச் செல்கிறது. அவர் பாஸ் செய்திருக்கவேண்டும் ஆனால் செய்யவில்லை. இன்னும் கொஞ்ச தூரம் பந்தை எடுத்துச் சென்றிருக்கலாம்.

இப்போது இருதரப்பிலும் ஆட்டமும் உணர்வும் சூடு பிடிக்க 12வது நிமிடத்தில் ஜெர்மனி கோலை நோக்கி முன்னேற போர்ச்சுகல் வீரர் தவறிழைக்கிறார். அதாவது அன்று குரேஷியா செய்த அதே தவறுதான். ஜெர்மனி வீர்ர் மரியோ கொயெட்சே பந்தை எடுத்து கொண்டு பெனால்டி பகுதியில் முன்னேற போர்ச்சுகல் வீரர் ஜோ பெரைரா அவரை முன்னேற விடாமல் தள்ளுகிறார். உடனே பெனால்டி கிக் என்ற விசில் ஊதப்படுகிறது. மேலும் நடுவர் ஜோ பெரைராவுக்கு மஞ்சள் அட்டைக் காண்பித்து எச்சரிக்க நடுவரைச் சுற்றி போர்ச்சுக்கல் வீரர்கள் மொய்த்து வாக்குவாதம் புரிந்தனர்.

பெனால்டி கிக்கை தாமஸ் முல்லர் எடுத்து கொண்டார். இடது புற மூலையில் கோல் வலைக்குள் செலுத்துகிறார் ஜெர்மனி 1-0 என்று முன்னிலை வகித்தது. இன்னும் கறாரான நடுவராக இருந்திருந்தால் போர்ச்சுகல் வீரர் ஜோ பெரைராவுக்கு சிகப்பு அட்டைக் காண்பித்து வெளியேற்றிருப்பார்.

ஆனால் அதுதான் பிறகு நடந்தது. அதற்கு முன்னதாக ஆட்டத்தின் 32வது நிமிடத்தில் ஜெர்மனிக்கு ஒரு கார்னர் வாய்ப்பு கிடைக்கிறது. கார்னர் ஷாட் அடித்த ஜெர்மனி வீரர் மிகத் துல்லியமாக அதனை கோலுக்கு அருகில் நின்று கொண்டிருந்த ஹம்மல்ஸ் அருகே தூக்கி அடிக்க அவர் போர்ச்சுகல் வீரர் பெபேயைக் காட்டிலும் மேலும் எம்பி மிகத் துல்லியமாக் தலையால் முட்ட பந்து கோல் வலைக்குள் சென்றது. கோல் கீப்பர் ஒன்றும் செய்ய முடியாது. அவர் தலைக்கு மேல் கோலுக்குள் பந்து செல்வதை இயலாமையுடன் அவர் பார்க்க நேரிட்டது. ஜெர்மனி 2-0 என்று முன்னிலை வகித்தது.

அதன் பிறகுதான் 37வது நிமிடத்தில் போர்ச்சுகல் அணிக்கு அதிர்ச்சி காத்திருந்தது. விரும்பத் தகாத செயலும் கூட. ஜெர்மனி வீரர் தாமஸ் முல்லர் ஒரு பந்தை எடுத்துக் கொண்டு வேகமாக போர்ச்சுகல் கோல் நோக்கி முன்னேற இந்த முறை பெபே அவரைப் பிடித்துத் தள்ளியே விடுகிறார். அது மட்டுமல்ல பல்லில் அடிபட்டது போல் முல்லர் தரையில் உட்கார்ந்து முகவாயைப் பிடித்துக் கொண்டிருக்கும்போது பெபே அவர் அருகில் சென்று அவர் தலையோடு தன் தலையைக் கொண்டு போய் அச்சுறுத்துகிறார். இது நடுவர் கவனத்திற்கு வர உடனே ரெட் கார்ட் காண்பிக்கப்பட்டு பெபே வெளியேற்றப்படுகிறார்.

ஆனால் உண்மையில் முல்லர் மார்பைப் பிடித்தே தள்ளினார் பெபே, முல்லர் கொஞ்சம் அதிகமாகவே நடிக்க அதில் பெபே கடுப்பாகியிருக்கலாம். அதனால் பக்கத்தில் சென்று தன் தலையால் அவர் தலையை முட்டினாரா அல்லது பதித்தாரா என்று தெரியவில்லை.

10 வீரர்களாகக் குறைந்து போன போர்ச்சுக்கல் ஒரு பலமான டிஃபெண்டரை இழந்த நிலையில் தாமஸ் முல்லர் தனது 2வது கோலை அடித்து ஜெர்மனிக்கு 3-0 என்று இடைவேளையின் போது முன்னிலை பெற்றுத் தந்தார். கிறிஸ்டியானோ ரொனால்டோ கடுமையான ஏமாற்றத்துடன் தலையைத் தொங்கப்போட்டபடி ஓய்வறைக்குச் செல்கிறார்.இடைவேளைக்குப் பிறகு போர்ச்சுகல் உற்சாகமிழந்தே காணப்பட்டது. அவ்வப்போது கார்னர் வாய்ப்புகள் கிடைத்தாலும் கோல் வரவேயில்லை. ரொனால்டோவே ஒரு ப்ரீ கிக் மற்றும் கார்னர் ஷாட்டில் சொதப்பினார். ஜெர்மனி தொடர்ந்து போர்ச்சுகல் கோல் கீப்பருக்கு நெருக்கடி கொடுத்தது.

ஆட்டம் மீண்டும் 68வது நிமிடத்திலிருந்து சூடு பிடித்தது. அந்த நிமிடம் கிடைத்த வாய்ப்பை ஜெர்மனி விரயம் செய்தது. பிறகு 70வது நிமிடத்தில் 4வது கோல் அடிக்க மிக அருகில் வந்து பயனில்லாமல் போனது. ஆனாலும் எப்போது வேண்டுமானாலும் 4வது கோல் உண்டு என்றே தெரிந்தது.

இந்த நிலையில் 78வது நிமிடத்தில் ஜெர்மனி வீரர் ஆந்த்ரே ஷர்லி வலது புறத்திலிருந்து போர்ச்சுகல் கோல் அருகே நின்றிருந்த தாமஸ் முல்லருக்குத் துல்லியமாக ஒரு பாஸை அடிக்க அதனை முல்லர் கோலுக்கு அருகில் நின்று கொண்டு கோலாக மாற்றுகிறார். ஜெர்மனி 4-0 என்று முன்னிலை பெற்றது. தாமஸ் முல்லர் இந்த உலகக் கோப்பையின் முதல் ஹேட்ரிக்கை அடித்து சாதனை புரிந்துள்ளார்.

அவரது 50வது போட்டியாகும் இது. இதில் அவர் தனது 20வது கோலை அடித்தார். 85வது நிமிடத்தில் போர்ச்சுகலுக்கு ஒர் ப்ரீகிக் கிடைக்கிறது. கிறிஸ்டியானோ ரொனால்டோ சொத்தை ஷாட்டை நேராக ஜெர்மனி வீரர் காலுக்கே அடிக்கிறார். பிறகு 90 நிமிடங்களுக்குப் பிறகு மீண்டும் ஒரு ஃப்ரீ கிக் கிடைக்கிறது ரொனால்டோ இந்த முறை சக்தி வாய்ந்த ஒரு ஷாட்டை ஜெர்மன் கோல் நோக்கி அடிக்க அதனை ஜெர்மனி கோல் கீப்பர் அபாரமாகத் தடுக்கிறார்.

இறுதி விசில் ஊதப்படுகிறது. ஜெர்மனி 4-0 என்று வெற்றி பெற்று 3 புள்ளிகளை அள்ளியது. தாமஸ் முல்லரின் முதல் ஹேட்ரிக் இன்றைய சிறப்பம்சமாகும்.

மிரட்டுமா நெய்மர்–ஆஸ்கர் கூட்டணி: பிரேசில்–மெக்சிகோ இன்று மோதல்

போர்டலெஜா: உலக கோப்பை கால்பந்து தொடரில் இன்று நடக்கும் லீக் போட்டியில், பிரேசில், மெக்சிகோ அணிகள் மோதுகின்றன. இதில் அபார ஆட்டத்தை வெளிப்படுத்தி, பிரேசில் அணியின் வெற்றிக்கு நெய்மர் மீண்டும் கைகொடுக்கலாம்.

பிரேசிலில், 20வது ‘பிபா’ உலக கோப்பை கால்பந்து தொடர் நடக்கிறது. இதில் ‘நடப்பு சாம்பியன்’ ஸ்பெயின், அர்ஜென்டினா உள்ளிட்ட 32 அணிகள் 8 பிரிவுகளாக லீக் சுற்றில் மோதுகின்றன.

போர்டலெஜாவில், இன்று நடக்கும் (ஜூன் 18, இரவு 12.30 மணி) ‘ஏ’ பிரிவு லீக் போட்டியில், சர்வதேச தரவரிசையில் ‘நம்பர்–3’ இடத்தில் உள்ள பிரேசில் அணி, 20வது இடத்தில் உள்ள மெக்சிகோவை சந்திக்கிறது.

நெய்மர் நம்பிக்கை: ஜப்பான் ‘ரெப்ரி’ நிஷிமுரா வழங்கிய ‘பெனால்டி’ சர்ச்சையை கடந்து, குரோஷியாவுக்கு எதிரான முதல் போட்டியில் பிரேசில் அணி வென்றது. இப்போட்டியில் ‘சேம் சைடு’ கோலடித்த மார்செலோ, தனது தவறை திருத்திக் கொள்ள வேண்டும். தசை பிடிப்பு காரணமாக வெறும் 15 நிமிடங்கள் மட்டும் பயிற்சியில் ஈடுபட்ட ஹல்க் இன்று விளையாடுவதில் எவ்வித சிக்கலும் இல்லை. குரோஷியாவுக்கு எதிராக இரண்டு கோலடித்த நெய்மர் ‘சூப்பர் பார்மில்’ இருப்பதால், இன்றைய போட்டியிலும் கோல் மழை பொழியலாம்.

ஆஸ்கர் எதிர்பார்ப்பு: ‘ஸ்டாப்பேஜ்’ நேரத்தில் கோலடித்த ஆஸ்கர் மீது எதிர்பார்ப்பு அதிகரித்துள்ளது. இவருடன், ராமிரெஸ், கேப்டன் தியாகோ சில்வா, டேவிட் லுாயிஸ், பிரெட், டேனி ஆல்வெஸ் உள்ளிட்டோ அசத்தும் பட்சத்தில் தொடர்ந்து இரண்டாவது வெற்றியை பதிவு செய்யலாம்.

காமரூனுக்கு எதிரான முதல் போட்டியில் வெற்றி பெற்ற உற்சாகத்தில் மெக்சிகோ அணி உள்ளது. லண்டன் ஒலிம்பிக் பைனலில் (2012), பிரேசிலை வீழ்த்தி தங்கம் வென்ற மெக்சிகோ அணியில் இடம் பெற்ற 8 வீரர்கள் இன்றைய போட்டியில் விளையாடுவது பலம். காமரூனுக்கு எதிராக கோலடித்த பெரால்டா இன்றும் சாதிக்கலாம். இவரை தவிர, மிகுவல் லேயன், மார்கோ பேபியன், ஹெக்டர் ஹெர்ரேரா, ஜாவியர் ஹெர்ணான்டஸ், கார்லஸ் பெனா, கேப்டன் ரபெல் மார்குயஸ் உள்ளிட்டோர் கைகொடுத்தால், பிரேசிலை அதன் சொந்த மண்ணில் வீழ்த்தலாம்.

யார் ஆதிக்கம்

சர்வதேச கால்பந்து அரங்கில் பிரேசில்–மெக்சிகோ அணிகள் 38 முறை மோதின. இதில் பிரேசில் 22, மெக்சிகோ 10 போட்டிகளில் வென்றன. ஆறு போட்டிகள் ‘டிரா’வில் முடிந்தன.

* இவ்விரு அணிகள் மோதிய 38 போட்டியில், மொத்தம் 107 கோல்கள் அடிக்கப்பட்டன. இதில் பிரேசில் 71, மெக்சிகோ 36 கோல்களை பதிவு செய்தன.

* உலக கோப்பை அரங்கில் இவ்விரு அணிகள் மோதிய மூன்று போட்டியிலும் (1950, 54, 62) பிரேசில் அணி வெற்றி பெற்றது.

பதிலடி வாய்ப்பு

கடந்த 2012ல் நடந்த லண்டன் ஒலிம்பிக் பைனலில், மெக்சிகோ அணி 2–1 என்ற கோல் கணக்கில் பிரேசிலை தோற்கடித்தது. இத்தோல்விக்கு, கடந்த ஆண்டு நடந்த கான்பெடரேஷன்ஸ் கோப்பை லீக் போட்டியில், பிரேசில் அணி 2–0 என மெக்சிகோவை வீழ்த்தி பதிலடி கொடுத்தது. இருப்பினும் ஒலிம்பிக்கில் தங்கம் வெல்லும் நீண்ட நாள் கனவை தட்டிப்பறித்த மெக்சிகோவை, உலக கோப்பையில் பழிதீர்க்க பிரேசில் அணி முயற்சிக்கலாம்.

இதுகுறித்து பிரேசில் வீரர் ஆஸ்கர் கூறுகையில், ‘‘கடந்த 2012ல் நடந்த லண்டன் ஒலிம்பிக்கில் பைனல் வரை வந்து தங்கம் வெல்ல முடியாமல் போனது வருத்தம் அளிக்கிறது. அடுத்த ஒலிம்பிக்கில் தங்கம் வெல்ல முயற்சிப்போம். இன்றைய போட்டியில் பதிலடி கொடுக்கும் நோக்கத்தில் விளையாட மாட்டோம். ஏனெனில் அவ்வாறு விளையாடும் பட்சத்தில், நெருக்கடி தான் உண்டாகும். மெக்சிகோ சிறந்த அணி என்பதால், முழுத்திறமையை வௌிப்படுத்தி வெற்றி பெற முயற்சிப்போம்,’’ என்றார்.

ரஷ்யாவை சமாளிக்குமா தென் கொரியா

கயபாவில் இன்று நடக்கும் (ஜூன் 18, அதிகாலை 3.30 மணி) ‘எச்’ பிரிவு லீக் போட்டியில், உலக தரவரிசையில் 19வது இடத்தில் உள்ள ரஷ்ய அணி, 57வது இடத்தில் உள்ள தென் கொரியாவை சந்திக்கிறது. இவ்விரு அணிகள் மோதிய ஒரே ஒரு போட்டியில், ரஷ்யா 2–1 என வென்றது. கடந்த 2002ல் நடந்த உலக கோப்பையில் பங்கேற்ற ரஷ்ய அணி, 2006, 2010ல் நடந்த தொடர்களுக்கு தகுதி பெறவில்லை. 12 ஆண்டுகளுக்கு பின் மீண்டும் தகுதி பெற்ற ரஷ்ய அணி வெற்றி பெற கடுமையாக போராட வேண்டும்.

கடந்த 2002ல் சொந்த மண்ணில் நடந்த உலக கோப்பை தொடரில் அரையிறுதி வரை முன்னேறி 4வது இடம் பிடித்த தென் கொரிய அணி, இந்த இலக்கை எட்டிய முதல் ஆசிய அணி என்ற சாதனை படைத்தது. கடந்த 2010ல் ‘ரவுண்ட் ஆப் 16’ சுற்று வரை வந்தது. ‘எச்’ பிரிவில் பெல்ஜியம், அல்ஜீரியா, ரஷ்ய அணிகள் இருப்பதால், ‘ரவுண்ட் ஆப் 16’ சுற்றுக்கு தென் கொரியா தகுதி பெற அதிக வாய்ப்புகள் உள்ளன.

பெலோ ஹரிஜான்டேவில் இன்று நடக்கும் (ஜூன் 17, இரவு 9.30 மணி) மற்றொரு ‘எச்’ பிரிவு லீக் போட்டியில் பெல்ஜியம், அல்ஜீரியா அணிகள் மோதுகின்றன.

ஈரான் மற்றும் நைஜீரியா அணிகளுக்கு இடையிலான போட்டி டிராவில் முடிந்தது. இறுதி வரை இரண்டு அணிகளும் கோல் எதுவும் அடிக்கவில்லை.

எனக்கு பிடித்த அணி  பிரேசில் முதல் ஆட்டத்தில் வெற்றியுடன் துவக்கியுள்ளது .
வருகிற ஆட்டத்தில் பார்ப்போம் என்ன செய்கிறது என்று.