டில்லியில் அடுத்தடுத்து தலைவர்கள் கார்கள் விபத்து:பின்னணியில் சதி திட்டமா?

புதுடில்லி: டில்லியில் நடந்த கார் விபத்தில் இறந்த மத்திய அமைச்சர் கோபிநாத் முண்டேயின் இறுதி சடங்கு நடக்கும் முன், ஆர்.எஸ்.எஸ்., தலைவரின் கான்வாயில் சென்ற கார் மீது, எதிரே வந்த கார் முட்டி, மோதிய சம்பவம் பெரும் பரபரப்பை ஏற்படுத்தி உள்ளது. இந்த சம்பவங்களின் பின்னணியில் சதி திட்டம் எதுவும் இருக்குமோ என்ற சந்தேகம் ஏற்பட்டுள்ளது.

மத்திய ஊரகத்துறை அமைச்சராக இருந்த கோபிநாத் முண்டே, மகாராஷ்ராவில் வெற்றி விழா கொண்டாட்டங்களில் கலந்து கொள்வதற்காக நேற்று காலை 6 மணியளவில், டில்லி விமான நிலையத்திற்கு காரில் சென்று கொண்டிருந்தார். டில்லி, துக்ளக் ரோடு சந்திப்பு அருகே கார் சென்று கொண்டிருந்தபோது, பக்கவாட்டில் வந்த டாடா இன்டிகா கார், முண்டே பயணம் செய்த கார் மீது மோதியது. இதில், அதிர்ச்சியடைந்த முண்டேக்கு, கல்லீரலில் ரத்த கசிவு ஏற்பட்டது. இதையடுத்து, மாரடைப்பால் அவர் மரணமடைந்தார்.

சி.பி.ஐ., விசாரணைக்கு கோரிக்கை:

டில்லி போலீசார் வழக்கு பதிவு செய்து, விசாரித்தனர். டாடா இன்டிகாவின் டிரைவர் கைது செய்யப்பட்டு, கோர்ட்டில் ஆஜர்படுத்தப்பட்டார். பின்னர், ஜாமினில் விடுவிக்கப்பட்டார். முதற்கட்ட விசாரணையில், முண்டேயின் கார் டிரைவரின் தவறால் தான் விபத்து ஏற்பட்டுள்ளதாக போலீசார் கூறுகின்றனர். ஆனால், இந்த விபத்தின் பின்னணியில் சதித்திட்டம் உள்ளதென்று மகாராஷ்ட்ரா பா.ஜ.,வினர் சந்தேகத்தை கிளப்பி உள்ளனர். மேலும், சி.பி.ஐ., விசாரணைக்கு உத்தரவிட வேண்டும் என்றும் கோரி உள்ளனர்.

கான்வாயி்ல் புகுந்த கார்:

மறைந்த மத்திய அமைச்சர் கோபிநாத் முண்டே மரணத்தில் மர்மம் இருப்பதாகவும், சி.பி.ஐ. விசாரணை மேற்கொண்டால் பல உண்மைகள் வெளிவரும் என்ற கோரிக்கையை முன்வைத்து, பர்லி பகுதி மக்கள் மகாராஷ்டிரா மாநில துணை முதல்வரை முற்றுகையிட்ட சம்பவம் , அங்கு பெரும்பரபரப்பை ஏற்படுத்தியுள்ளது. சிவசேனா கட்சியும், சி.பி.ஐ. விசாரணை தேவை என்று கோரிக்கை விடுத்துள்ளது குறிப்பிடத்தக்கது.இந்த பரபரப்பு அடங்கும் முன், ஆர்.எஸ்.எஸ்., தலைவர் மோகன்பாகவத்தின் கான்வாயில், எதிரே வந்த கார் மோதி விபத்தை ஏற்படுத்திய சம்பவம் நடந்துள்ளது. கோபிநாத் முண்டேவிற்கு அஞ்சலி செலுத்துவதற்காக டில்லி வந்த மோகன்பாகவத், பின்னர் தெற்கு டில்லியில் நடந்த ஒரு விழாவில் கலந்து கொள்வதற்காக காரில் சென்று கொண்டிருந்தார். அவர் காருக்கு முன்னும், பின்னும் பாதுகாப்பு கார்கள் வந்து கொண்டிருந்தன. கான்வாய் பரேடு ரோட்டில் சென்று கொண்டிருந்தபோது, அரியானா மாநில பதிவு எண்ணுடன் வந்த ஒரு டாடா சுமோ கார், பாதுகாப்பு கார் மீது நேருக்கு நேராக மோதியது. பின்னர், நிற்காமல் பறந்து சென்றுவிட்டது.

இதையடுத்து, கான்வாயில் வந்த பாதுகாப்பு வீரர்கள், டாடா சுமோ காரின் பதிவு எண்ணை கூறி, போக்குவரத்து போலீசாரிடம் புகார் தெரிவி்த்தனர். இதையடுத்து, போலீசார் அந்த காரையும், டிரைவரையும் பிடித்து, விசாரணை நடத்தி வருகின்றனர். இந்த விபத்தில், மோகன் பாகவத் கார் மீது தான் டாடா சுமோ மோதியதாக முதற்கட்ட தகவல்கள் தெரிவித்தன. இதனால், டில்லி முதல் அனைத்து மாநிலங்களிலும் பதற்றம் தொற்றியது. இதையடுத்து, 'கான்வாயில் வந்த பாதுகாப்பு கார் மீது தான் மோதல் நடந்தது. மோகன்பாகவத் கார் மீது இல்லை. அவர் நலமுடன் உள்ளார். அவர் தனது பயண திட்டத்தின்படி புறப்பட்டு சென்றுவிட்டார்,' என, ஆர்.எஸ்.எஸ்., அமைப்பின் செய்தி தொடர்பாளர் ராம் மாதவ் அறிக்கை வெளியிட்டார். இதையடுத்து, பதற்றம் குறைந்தது.

பின்னணி என்ன?:

டில்லியில், அடுத்தடுத்த நாட்களில் முக்கிய தலைவர்களின் கார்கள் விபத்துக்குள்ளானது பாதுகாப்பு மற்றும் புலனாய்வு பிரிவுகளில் சந்தேகத்தை கிளப்பி உள்ளது. இதையடுத்து, இந்த விபத்துக்களின் பின்னணி குறித்து விசாரணை நடத்தப்படும் என, தகவல்கள் தெரிவிக்கின்றன.

தினமலர்

அரசியலில் இதுபோன்ற அநாகரீக செயல்கள் செய்வார்கள் என்றுதான் எனக்கும் தோன்றுகிறது.