உள்ளதைச் சொல்லு! உள்ளத்தை வெல்லு!!

வயப்படுத்துதல்:

சொல்லும் சொற்கள், அவற்றைக் கேட்பவர்களைத் தன்வயப்படுத்தி, மற்ற எல்லா எண்ணங்களையும் புறந்தள்ளுவதாக அமைவதை வயப்படுத்துதல் என்கிறோம். வாயிலிருந்து வருவது எல்லாமே பேச்சாக இருக்க முடியாது. வயிற்றில் இருப்பதன் மணம் வாய் வழியாக, வாயுவாக, ஏப்பமாக, விக்கலாக வெளிவருவதுடன் பேசும் வார்த்தைகள் நம் மனதிலிருந்து வருகிறது என்பதை ஏற்றுக்கொள்ள வேண்டும்.

கேட்டார் பிணிக்குந் தகையவாய்க்கேளாரும்

வேட்ப மொழிவதாஞ் சொல்

(குறள் 643)

கேட்பவர்கள் நம் சொற்களை முழுமையாக ஏற்றுக்கொள்ளுமாறு பேசுதல் மிக முக்கியம். சந்தேகமே இல்லாமல் மிகத் தெளிவாகப் பேச வேண்டும். இந்தப் பேச்சு, பாலில் ஊற்றிய தயிர், அந்தப் பால் முழுவதையும் தயிராக்குவதைப் போல் கேட்பவரைத் தன்வயம் இழுக்கச் செய்துவிடும்.இதைத்தான் பிணித்தல் என்றார் வள்ளுவர்.

இதுபோன்ற பேச்சுக்களை இதுவரை கேட்காதவர்களும் கேட்க வேண்டும் என்ற விருப்பத்தை, ஆசையை உண்டாக்குவதுதான் சிறப்பு. இதற்குச் சில பயிற்சிகள் மேற்கொள்ள வேண்டும்.

என்ன பேச வேண்டும் என்பதைத் தேர்வு செய்தல்;
கருத்துக்களை ஒன்றன்பின் ஒன்றாக ஒழுங்குபடுத்துதல்;
சந்தேகமில்லாமல் தெளிவடைதல்;
இனிமையான குரலில் கேட்பவர் கண்களைப் பார்த்துப் பேசுதல்.
இந்த நான்கையும் கவனத்தில் கொண்டு, கேட்பவர்கள் சொல்வதையும் அக்கறையுடன் கேட்டு, அதன்பின் சொல்கின்றபோது, கேட்பவர்களின் உள்ளத்தை வெல்லும் சூழல் உருவாகும்.

இராமாயணத்தில் இராமன் இராவணன் யுத்தத்தில் இராவணனிடம் இராமன், “இன்றுபோய் நாளை வா” என்றுகூறியதை உதாரணமாய் கூறலாம். இராமன் அளித்த வாய்ப்பு உயிர்ப்பிச்சை அல்லவா? ஒருநாள் என்றாலும் கூட இந்த வார்த்தை தான் சரியானது.