பருவ வயது பிரச்னைகள்!

பதினாறு வயதில், பெண்களுக்கு அதிக கவலை ஏற்படும். குட்டையான பெண்களுக்கு, தாங்கள் உயரமாக இல்லை என்பது, எப்போதும் மனதில் உறுத்திக் கொண்டே இருக்கும். அடுத்தது, முகப்பரு; இது குறித்த கவலை அதிகமாகி, அவர்களை குறித்த, ஒரு தாழ்ந்த சுயமதிப்பீட்டுக்கு ஆளாகின்றனர். இது, மனச்சோர்வை ஏற்படுத்தும். விளைவு, படிப்பில் கவனம் குறைந்து, தனிமையை விரும்பி, மற்றவர்களிடமிருந்து விலகி இருக்கத் துவங்குவர்.

வாழ்க்கையில் மகிழ்ச்சியும், பரவசமும் ஏற்படும் இக்காலத்தில் தான், உடல் ரீதியாக பல மாற்றங்களும் ஏற்படுகின்றன. இதனால், அவர்கள் பார்க்கும் பார்வை, அனுபவிக்கும் உணர்வு, எண்ணங்கள் எல்லாவற்றிலுமே ஒரு மாற்றம் காணப்படும்.

குறிப்பாக, இந்த வயதில், தங்கள் உடலில் ஏற்படும் சில மாற்றங்களால், கூச்சமும், தயக்கமும் அடைகின்றனர். முகப்பரு, மாதவிடாய் பிரச்னை, களைப்பு, பூப்படைதல், உடல் பருமன், நடத்தை, உடலியல் ரீதியான மாற்றங்கள் போன்ற விஷயங்களில் ஏராளமான சந்தேகங்கள் குவிகின்றன.

பாலியல் உட்பட எதைப் பற்றி வேண்டும் என்றாலும் தயக்கமில்லாமல் பேசுவதற்கு, ஒரு விசேஷ வழிகாட்டிடுதல் தேவைப்படும் பருவம் இது. அத்தகைய வழிகாட்டி இல்லாத போது, அவர்கள் மனதில் ஏற்படும் குழப்பங்கள் மன ரீதியாகவும், உடல் ரீதியாகவும், சமூக ரீதியாகவும் சிக்கல்களை ஏற்படுத்து கிறது. குறுக்கு வழியில், பணம் பறிக்க ஆசைப்படும் சில போலி மருத்துவர்கள் தரும் தவறான விளம்பரங்கள், பிரச்னையை மேலும் சிக்கலாக்கி விடுகின்றன.

விடலைப் பருவத்தில் ஏற்படும் மாற்றங்களை தெளிவாகத் தெரிந்து, தங்களுடைய உடல்நலப் பராமரிப்புக்கு தேவையான பொறுப்பையும், வழிமுறைகளையும் சுயமாக வளர்த்துக் கொள்ளும் போது, பிரச்னைகளைச் சுலபமாகத் தவிர்த்து விடலாம்.

குறைவாக சாப்பிடுவதால், உடலுக்கு தேவையான சக்தி கிடைக்காமல் ரத்தசோகை, தாழ்வு மனப்பான்மை, படிப்பில் பின்னடைவு, அதிகப்படியான சோர்வு, மன அழுத்தம், தனிமையை விரும்புதல், சாப்பாட்டில் சமச்சீரின்மை ஆகியவற்றுக்கு ஆளாகின்றனர். இவர்களிடம், ஒரு மனிதனுக்கு உடல் மட்டும் முக்கியமில்லை; அறிவு, உழைப்பு, விடாமுயற்சியும் முக்கியம் என்பதை புரிய வைக்க வேண்டும்.

அழகு என்பது, பார்ப்பவரின் கண்ணில் இருக்கிறது. ஒருவருக்கு அழகற்று தெரிவது, இன்னொருவருக்கு அழகாய் தெரிவதற்கான காரணத்தை விளக்க வேண்டும்.

உயரமாக இல்லை, குள்ளமாக இருக்கிறோம் என்ற கவலையை, அவர்களே வரவழைத்துக் கொள்ளும் கவலைதான். உயரம் குறைவாக இருப்பதற்கு மரபு, உணவு பற்றாக்குறை, ஹார்மோன் கோளாறு என, பல காரணங்கள் இருக்கின்றன. ஆனால், சிலருக்கு வளர்ச்சி தள்ளிப் போய், சில ஆண்டுகளுக்குப் பின், வேகமாக வளர்ந்து, சராசரி உயரத்தை அடைந்து விடுவர். ஆனால் இது தெரியாததால், மனக் குழப்பங்களுக்கு ஆளாகின்றனர்.

பருவ வயதில் உடலில் ஏற்படும் மாற்றங்கள் குறித்து, அவர்களுக்கு தெளிவு ஏற்படும் வண்ணம், பெற்றோர் பேச வேண்டும். இது பற்றி பேச கூச்சப்படும் பெற்றோர், இது தொடர்பான புத்தகங்களை, அவர்களுக்கு படிக்கத் தரலாம். சுற்றுச்சூழல் பழக்க வழக்கங்கள், சமூக, கலாசார மாறுதல்கள், உடல் மாற்றங்கள் போன்ற விஷயங்கள் பற்றி பெற்றோர், குழந்தைகளுடன் சுதந்திரமாக பேச வேண்டும். இதற்கு பெரும்பாலான பெற்றோர் கூச்சம் அடைந்து தயங்குகின்றனர். நாமும், நம் பருவத்தில், பாதி நேரம் கண்ணாடிக்கு முன் நின்று, நம்மை நாமே ரசிப்பதிலேயே செலவிட்டவர்கள்தானே என்ற உண்மையே நினைத்துக் கொண்டாலே போதும், தயக்கம் விலகிவிடும்.

- ஐடியா அம்புஜம்.