மோடி அமைச்சரவை விஸ்தரிக்கப்படுகிறது: தேமுதிகவுக்கு அமைச்சர் பதவி?

வருகிற ஜூன் 15 ஆம் தேதிக்கு பின்னர் மத்திய அமைச்சரவையை விஸ்தரிக்க முடிவு செய்துள்ளதாக தகவல் வெளியாகி உள்ள நிலையில், இந்த முறை தேமுதிகவுக்கு அமைச்சர் பதவி வழங்கப்படுவதற்கான சாத்தியம் உள்ளதாகவே டெல்லி தகவல்கள் தெரிவிக்கின்றன.

மோடி தலைமையிலான அமைச்சரவை கடந்த 26 ஆம் தேதியன்று பதவியேற்றபோது தங்களுக்கும் அமைச்சர் பதவி கிடைக்கலாம் என்ற எதிர்பார்ப்பில் தேமுதிக தலைவர் விஜயகாந்த், தனது மனைவி பிரேமலதா மற்றும் மைத்துனர் சுதீஷ் மற்றும் கட்சியின் முக்கிய பிரமுகர்களுடன் டெல்லி சென்றிருந்தார்.

தேர்தல் வெற்றியை தொடர்ந்து மோடிக்கு வாழ்த்து தெரிவிப்பதற்காக விஜயகாந்த் டெல்லி சென்றிருந்தபோது, மோடி விஜயகாந்தின் கன்னத்தை அன்புடன் தடவி கொடுத்து, அவரது மனைவி பிரேமலதா வந்துள்ளாரா? என்றும் கேட்டு, அவரது கடுமையான தேர்தல் பிரசாரத்திற்கு பாராட்டு தெரிவித்தார்.

ஏமாற்றமும்...கோபமும்

இதனால் ஏகத்திற்கும் மகிழ்ச்சியடைந்த விஜயகாந்த், தேர்தலில் தங்கள் கட்சி தோல்வி அடைந்தாலும் பா.ஜனதாவுக்காக தமிழகம் முழுவதும் சென்று மோடியின் பெயரை பரப்பி பிரசாரம் செய்ததற்காகவேனும் தங்களுக்கு ஒரு இணையமைச்சர் பதவியாவது கிடைக்கும் என எதிர்பார்த்தார். தனது இந்த விருப்பத்தை அவர் பா.ஜனதா தலைவர் ராஜ்நாத் சிங்கின் காதிலும் போட்டுவைத்தார்.

தமிழகத்தில் ஜெயலலிதாவை எதிர்கொள்ள தங்களுக்கு மத்திய அமைச்சர் பதவி இருந்தால், உதவிகரமாக இருக்கும், கட்சியினரும் சோர்வடைந்துபோகாமல் தெம்புடன் இருப்பார்கள் என்று கூறி, மைத்துனர் சுதீஷுக்கோ அல்லது மனைவி பிரேமலதாவுக்கோ அமைச்சர் பதவி கோரிக்கை வைத்ததாக கூறப்பட்டது.

ஆனால் 26 ஆம் தேதி மோடி அமைச்சரவை பதவியேற்றபோது விஜயகாந்திற்கு ஏமாற்றமே மிஞ்சியது. இலங்கை அதிபர் ராஜபக்சே வருகைக்கு எதிர்ப்பு தெரிவித்து தமிழகத்தில் ஒருபுறம் போராட்டங்கள் நடைபெற்று வந்த சூழலுக்கிடையேயும், அவப்பெயர் வரும் என்று தெரிந்திருந்தும், அதையெல்லாம் புறந்தள்ளிவிட்டு டெல்லி வந்தார் விஜயகாந்த்.

ஆனால் அமைச்சரவை பதவியேற்புக்கு சில மணி நேரத்திற்கு முன்னதாகவே அமைச்சரவையில் தேமுதிகவுக்கு இடமில்லை என்ற தகவல் விஜயகாந்திடம் சொல்லப்பட ஏகத்திற்கும் அப்செட்டானார். போதாகுறைக்கு பதவியேற்பு விழாவில் பங்கேற்பதற்கான இருக்கை வரிசையும் வெகு பின்னால் ஒதுக்கப்பட்டிருப்பதாகவும் தெரியவர, டெல்லி வரை சென்றும் பதவியேற்பு விழாவில் பங்கேற்காமல் தனது மனைவி மற்றும் மைத்துனரை மட்டும் அனுப்பி வைத்துவிட்டு, தனது கோபத்தையும், அதிருப்தியையும் பா..ஜனதா மேலிடத்திற்கு உணர்த்தினார்.

அன்புமணிக்கு ஆரம்பத்திலேயே 'நோ'

அதே சமயம் தர்மபுரியில் வெற்றிபெற்ற மற்றொரு கூட்டணி கட்சியான பாமகவின் அன்புமணி ராமதாஸும் அமைச்சர் பதவிக்கு அடிபோட்ட நிலையில், அவர் முன்பு சுகாதாரத்துறை அமைச்சராக இருந்தபோது நடைபெற்ற சில முறைகேடுகள் தொடர்பான வழக்கு நடைபெற்று வருவதால், அதனை சுட்டிக்காட்டி வழக்கிலிருந்து வெளியே வரும்வரை அமைச்சர் பதவிக்கு வாய்ப்பில்லை என்பதே ஆரம்பத்திலேயே சொல்லிவிட்டதால் அவர்கள் தரப்பில் ஏமாற்றத்தை கஷ்டத்துடன் விழுங்கிக்கொண்டனர்.

சமாதானப்படுத்திய பா.ஜனதா தலைவர்கள்

இந்நிலையில் விஜயகாந்தின் கோபத்தை உணர்ந்துகொண்ட பா.ஜனதா தலைவர்களும் பின்னர் அவரை சமாதானப்படுத்தி, தற்போது 45 அமைச்சர்கள் மட்டுமே பதவியேற்றுள்ளதாகவும், அடுத்தமுறை அமைச்சரவை விஸ்தரிக்கப்படும்போது அமைச்சர் பதவி தர பரிசீலிக்கிறோம். மோடியிடமும் இது தொடர்பாக பேசுகிறோம் என்ற வாக்குறுதியை அளித்ததாக கூறப்பட்டது.

இதனிடையே தமிழகத்திலும் பொன் ராதாகிருஷ்ணன் தவிர வேறு யாருக்கும் அமைச்சர் பதவி வழங்கப்படவில்லை. இதுதவிர கேரளா உள்ளிட்ட சில மாநிலங்களுக்கும் அமைச்சரவையில் பிரதிநிதித்துவம் இல்லை. மேலும் கூட்டணி கட்சியான சிவசேனாவுக்கு ஒரே ஒரு கேபினட் அமைச்சர் பதவி வழங்கப்பட்டு, கனரக தொழில்துறை இலாகா ஒதுக்கப்பட்டதில் அக்கட்சிக்கும் அதிருப்தி. தங்களுக்கு வேறு நல்ல இலாகா ஒதுக்க வேண்டும் என அக்கட்சித் தலைவர் உத்தவ் தாக்கரே எதிர்ப்பு தெரிவிக்க, பின்னர் மோடி அவருடன் பேசி சமாதானப்படுத்தினார். அப்போது அடுத்த அமைச்சரவை விஸ்தரிப்பின்போது உங்களது கோரிக்கையை கவனத்தில் கொள்கிறேன் என உறுதியளித்தார். அதன்பின்னரே சிவசேனாவை சேர்ந்த ஆனந்த் கீதே கனரக தொழில்துறை அமைச்சராக பொறுப்பேற்றுக்கொண்டார்.

இதுபோன்று சந்திரபாபு நாயுடுவின் தெலுங்கு தேசம் உள்ளிட்ட சில கூட்டணி கட்சிகளும் தங்களுக்கு கூடுதல் அமைச்சர் பதவியும், நல்ல இலாகாக்களும் வேண்டும் என கோரிக்கை விடுத்தன.

இவற்றையெல்லாம் கருத்தில்கொண்டே பா.ஜனதா தலைவர்கள் மோடியுடன் நடத்திய கலந்தாலோசனைக்கு பின்னர் ஜூன் 15 ஆம் தேதிக்கு பின்னர் அமைச்சரவையை விஸ்தரிப்பது என்றும், அப்போது கூட்டணி கட்சிகளுக்கு அமைச்சரவையில் வாய்ப்பளிப்பது என்றும் முடிவு செய்யப்பட்டுள்ளதாக அக்கட்சி வட்டாரங்கள் தெரிவிக்கின்றன.

தேமுதிகவுக்கு இணையமைச்சர் பதவி

குறிப்பாக தேமுதிகவை பொறுத்தவரை, விஜயகாந்த் யாருக்கு கொடுக்கப்பட வேண்டும் என விரும்புகிறாரோ, ( பெரும்பாலும் மைத்துனர் சுதீஷ்) அவருக்கு பா.ஜனதா ஆளும் மாநிலங்கள் ஏதாவது ஒன்றிலிருந்து ராஜ்யசபை எம்.பி.யாக்கி, இணையமைச்சர் பதவி அளிக்கப்படலாம் என பா.ஜனதா வட்டாரங்கள் தெரிவிக்கின்றன. இந்த தேர்தலில் ஒரு சீட் கூட ஜெயிக்கவில்லை என்றபோதிலும், அடுத்து வரவிருக்கிற தமிழக சட்டசபை தேர்தலில் அவருடனான கூட்டணியை தொடரவும், பா.ஜனதாவை தமிழகத்தில் காலூன்ற செய்ய அவரது பிரசாரம் கைகொடுக்கும் என்ற எண்ணத்திலேயே இந்த முடிவு எடுக்கப்பட்டுள்ளதாக தெரிகிறது.

ம.தி.மு.க.வுக்கு வாய்ப்பில்லை

மதிமுகவை பொறுத்தவரை அக்கட்சித்தலைவர் வைகோவை வேறு மாநிலத்தில் இருந்து மாநிலங்களவை எம்.பி.யாக ஆக்குவதாக பா.ஜனதா தலைவர்கள் கூறியபோதிலும், வைகோ அதனை நிராகரித்துவிட்டதால், அக்கட்சிக்கு அமைச்சர் பதவி அளிக்கப்பட வாய்ப்பில்லை.

25 அமைச்சர்களை சேர்க்க முடிவு

இதனிடையே இந்த விஸ்தரிப்பின்போது 25 அமைச்சர்கள் கூடுதலாக சேர்க்க முடிவு செய்யப்பட்டுள்ளதாகவும், அவர்களில் பெரும்பாலானோர் இணையமைச்சர்களாகத்தான் இருப்பார்கள் என்றும் தெரிவிக்கப்பட்டுள்ளது. அதே சமயம் தற்போது நிதித்துறை இலாகாவுடன் சேர்த்து கூடுதலாக பாதுகாப்புத் துறையையும் கவனித்து வருகிறார் அருண் ஜெட்லி. எனவே அவருக்கான பணிச் சுமையை குறைக்க பாதுகாப்புத் துறை அமைச்சர் ஒருவர் தனியாக நியமிக்கப்படுவார் என்றும் தெரிவிக்கப்பட்டுள்ளது.

விகடன்