முல்லைவாசன் கவிதைகள்

முல்லைவாசன் · முல்லைவாசன் Tue May 06, 2014 5:15 pm

நொண்டிக் கனவுகள்

இலைசீவி இலைசீவி
சுருள்வதற்கு வடிவெடுக்கும்
பீடியின் அவதாரத்தில்
கூலியின் சேதாரம்
கண்டுபிடிப்பது யாரோ?

துண்டுபீடி
காலில் மிதிபடும் போது
அணையும் நெருப்புக்கு
அடுப்பின்
முன்கதைச் சுருக்கம்
சொல்வது யாரோ?

டீ யில் தொடங்கி
டீ யில் முடியும்
எல்லா நாள்களிலும்
பீடி கணக்கில் ஏறும்
எல்லா கணக்கும்
சமன்பாடுகளில்
அடங்குவதில்லை

ஆற்றை சுருட்டியவர்கள்
காட்டை சுருட்டியவர்கள்
மலையை சுருட்டியவர்கள்
ஆல்போல் பெருகினார்கள்
அருகுபோல் தழைத்தார்கள்
சருகுகளை சுருட்டிய நாங்கள்?

நழுவாமல் தழுவும்
புகையிலையின் மூர்கம்
தந்த பரிசு
காசநோய் துப்பும்
மணல் டப்பா

மடிமீது கிடக்கும் முறத்தில்
வெட்டி வைத்த இலையும்
புகையிலையும்
பட்டி சாத்த முடியாத
நொண்டிக் கனவுகளும்...

முல்லைவாசன் · முல்லைவாசன் Tue May 27, 2014 7:32 pm

ஓடுபாதை

இன்றுவரை

குழந்தை மனசு கைகூடாமல்

மழலைப் பருவத்தின் பிசிறுகளோடு

விழுந்து எழுந்து

போய்க் கொண்டு இருக்கிறோம்.

வேட்டை நாயின்

அதே தயார் நிலை

தயவு செய்து

அருள் கூர்ந்து

முகஸ்துதி

ஒப்பனைகளோடு

இரண்டறக் கலந்து விட்டோம்

எந்த துர்பாக்கியத்தின்

தாக்கத்தில் நாம்

பின்தங்கிவிட முடியும்?

ஓட்டமும் நடையுமாய்

வடிவமைக்கப்பட்டு விட்டோம்

நின்று நிதானிக்க நேரமில்லை

ஓடுபாதையில்

ஒவ்வொரு கணமும் போராட்டமே.

முல்லைவாசன் · முல்லைவாசன் Tue May 27, 2014 7:37 pm

விடுபடல்

விடுபடத்தான்

விரும்புகிறோம்

விருப்பங்களைத் தாண்டிய

கட்டாயங்கள்

எப்போதும் துரத்துகின்றன

ஒவ்வொரு கட்டமும்

நிறைவடையாமல்

அடுத்த கட்டத்தில்

வந்து சேர்கின்றன

பாறையின் இடுக்குகளில்

வேரின் பற்றாய்

வாய்க்கும் சிறு கணங்கள்

தவிக்கவும் துடிக்கவும்

தயவின்றி விரட்டுகின்றன.

Sponsored content · Sponsored content

முல்லைவாசன் கவிதைகள்

முல்லைவாசன் கவிதைகள்

Re: முல்லைவாசன் கவிதைகள்

Re: முல்லைவாசன் கவிதைகள்

Re: முல்லைவாசன் கவிதைகள்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக