மாம்பழம் ‘கும்மென்று’ பழுக்க விவசாயிகள் புது டெக்னிக்!

**krishnaamma** · **krishnaamma** Mon May 19, 2014 10:06 pm

திருவில்லிபுத்தூர்: ‘கார்பைடு’ பயன்படுத்தாமல் மாம்பழங்களை பழுக்க வைக்கும் புதிய தொழில்நுட்பத்தை திருவில்லிபுத்தூர் பகுதி விவசாயிகள் பின்பற்றி வருகின்றனர்.
விருதுநகர் மாவட்டம் திருவில்லிபுத்தூர் அருகேயுள்ள செண்பகத்தோப்பு வனப்பகுதியில் ஆயிரக்கணக்கான ஏக்கரில் மா பயிரிடப்படுகிறது. இங்கிருந்து குஜராத், கேரளா உள்பட பல மாநிலங்களுக்கும், தமிழகத்தின் அனைத்து நகரங்களுக்கும் மாம்பழங்கள் சப்ளை செய்யப்படுகின்றன. இப்பகுதி விவசாயிகள் மாங்காய்களைப் பழுக்க வைக்க புதிய தொழில்நுட்பத்தை கையாள்கின்றனர்.

இதுகுறித்து திருவில்லிபுத்தூர் செண்பகத்தோப்பு மா விவசாயிகள் சங்கச் செயலாளர் சமரசம் (45) கூறியதாவது: சில வியாபாரிகள் அதிக ஆர்டருக்கு ஆசைப்பட்டு கார்பைடு கற்கள் மூலம் பழுக்க வைக்கிறார்கள். இது உடல்நலத்துக்கு கேடு விளைவிக்கிறது. கார்பைடு கல் பிரச்னையால், மாம்பழங்கள் என்றாலே மக்கள் அலர்ஜி அடைந்து, அச்சப்படத் துவங்கினர். இதனால், மாம்பழ வியாபாரம் டல் ஆனது. சில ஆண்டுகள் முன் தோட்டக்கலை, வேளாண்துறை உயர் அதிகாரிகளிடம், மாங்காய்களை சீக்கிரம் பழுக்க வைக்க ஆலோசனை கேட்டோம். அவர்கள் கூறிய ஆலோசனையின் படி தற்போது புதிய தொழில்நுட்பத்தைப் பயன்படுத்துகிறோம்.

இதன்படி, ஒரு டன் அளவுக்கு மாங்காய்களை பறித்து, நன்கு காய வைத்து, 16க்கு 10 அளவிலான சிறிய அறையில் போட்டு பூட்டுவோம். அறைக்குள் துளிக்கூட காற்றுப் போகாத அளவுக்கு கதவின் சாவித்துவாரத்தைக்கூட அடைத்து விடுவோம். பின்னர், ஒரு பிளாஸ்டிக் வாளியில் 5 லிட்டர் நல்ல தண்ணீரில் 50 மில்லி எத்திரால் திரவம், சோடியம் பைராக்சிட் மாத்திரை 10 கலந்து, மாங்காய்களுக்கு நடுவே வைத்து விடுவோம்.

வாளியில் இருந்து கிளம்பும் வெப்பம் காரணமாக, உள்ளே இருக்கும் மாங்காய்கள் ஒன்றரை நாளில் முழுமையாக பழுத்து கண்ணைப்பறிக்கிற கலர் கொடுத்துவிடும். இப்படி பழுக்க வைக்கும் மாம்பழங்கள் உடலுக்கு எந்த கெடுதலும் ஏற்படுத்துவது இல்லை என்று வேளாண், தோட்டக்கலை அதிகாரிகள் சான்றிதழ் தருகிறார்கள். புதிய முறையில் மாம்பழங்களை பழுக்க வைப்பது குறித்து மதுரை, நெல்லை, சென்னை உள்ளிட்ட பகுதி வியாபாரிகளுக்கு பயிற்சியும் அளித்து வருகிறோம். இவ்வாறு சமரசம் தெரிவித்தார்.