எங்களை ஏமாற்றி விடாதே நரேந்திரா.!

வாழ்த்துக்கள் நரேந்திரா...
உன் வெற்றியை
இரு கரம் கூப்பி வரவேற்கும்
ஒரு சாதாரண இந்தியன்.

சர்ச்சைகளை தாண்டிய
உன் வெற்றி பாராட்டிற்குரியது
ஆனால்
எதிர்பார்ப்புகள் நிறைந்தது.

கட்சி நிலையை தாண்டிய
உன் தனி மனித வெற்றியிது...
மதங்களை தாண்டிய
உன் தனி மனித வெற்றியிது...

மாற்றம் வேண்டுமென்பது
ஒவ்வொரு இந்தியனின் எதிர்பார்ப்பு
முதன்மை பெற்றிருப்பதாய்
முழங்கினாலும் இன்னும் பின் தங்கியே இருக்கிறோம்

வாழ்க்கை முறை மாறியபோதும்,
வாழ்க்கை தரமென்பது மாறவேயில்லை...
சராசரி இந்தியனின் நிலை மட்டும்
நிலையாய் மாறாதிருக்கிறது...

மாற்றம் எதிர்பார்த்து தான்
இந்த வரலாறு காணாத
அரசியல் மாற்றம்.
மாற்றுவாயா பராக்கிரமசாலியே...

இந்தியாவின் நிலை மாற்ற
இன்னும் 50 ஆண்டுகள் வேண்டும்...
நல்லதை நோக்கி
அடியெடுத்து வை...

மந்திரமிட்டு ஒரே நாளில்
நாட்டின் நிலை மாற்றிட முடியாது...
நல்ல விதைகளை விதைத்திடு
அவை நாளை உன் பெயர் சொல்லட்டும்...

மாற்றத்தை முதலில் கல்வியில் துவங்கு
தடையில்லா மின்சாரம் கொடு
தண்ணீரின் எல்லைகளை தவிடு பொடியாக்கு
நதிகளை இணை... அவை இந்தியனின் நாடி நரம்பாகட்டும்!!!

கிராமங்களின் நிலை உயர திட்டம் வகு
தண்டனை அதிகரி
விலைவாசி குறைக்க வேண்டாம்,
இனி கூடாமலிருக்கும் சூட்சுமம் காண்!!!

ஏழைகளின் வாழ்வாதாரம் உயர,
நலிந்து போன விவசாயம் மீண்டெழ,
மண்ணில் விளைந்ததற்கு நல்ல மதிப்பு கிடைத்திட
நல்ல வழி காண்.

எல்லை பிரச்னைகளுக்கு நிரந்தர தீர்வு காண்
எல்லா அரசியல்வாதிகளோடும் கலந்தாலோசி
நல்லவை காண முதல்வர்களை, அமைச்சர்களை வெளிதேசம் அனுப்பு
நாட்டிற்கு நல்லது செய்யும் அரசியலாளர்களை இனம் கண்டு கொள்

சிந்தனை செய் - எல்லோருக்கும் வேலை கொடுக்க!
விமர்சனங்களை ஏற்றுக்கொள்
வீணானவற்றை விலக்கிவிட்டு
நல்லவற்றை ஏற்று, நல்லதொரு ஆட்சியை தா...

தலைமை மாறியது -
தங்கள் நிலை மாற்றிக் கொண்ட தலைமை
எங்கள் நிலை மாற்ற மறந்தே போனது
உன் தலைமை எங்கள் நிலை மாற்றுமா???

நாட்டின் முன்னேற்றம், மக்கள் நலமெல்லாம்
இங்கு ஏட்டுச் சுரக்காயாகிப் போனது...
5 ஆண்டுகள் ஆட்சியில் - 5 தலைமுறைக்கு
அள்ளிச் சேர்க்க நினைக்கும் அரசியல் கூட்டம்!!!

மாற்றுவாய் எனும் நம்பிக்கையில்
மாற்றி ஓட்டளித்து உன்னை
ஒய்யாரத்தில் அமர வைத்திருக்கும்
எங்களை ஏமாற்றி விடாதே...

வேற்றுமையில் ஒற்றுமை தான் இந்தியா
நம் என்பதை கைவிடுவோம்
நாம் என சூளுரைப்போம்
நம் தேசம் முன்னேற கைகொடுப்போம்!!!

நம்பிக்கையோடு
இந்தியன்...

- சோகம்

இந்தியா முன்னேறட்டும்...ஆனா தமிழன் மட்டும் பின்னேறனுமா?...
மோடி சார்...இது நியாயமா?...