தேர்தல் தோல்வி: பீகார் முதல்வர் நிதிஷ் ராஜினாமா!

பாட்னா: நாடாளுமன்ற தேர்தலில் ஐக்கிய ஜனதா தளம் கட்சிக்கு ஏற்பட்ட தோல்விக்கு பொறுப்பேற்று பீகார் முதல்வர் நிதிஷ்குமார் தமது பதவியை ராஜினாமா செய்துள்ளார்.

மாநில ஆளுனர் டி.ஒய். பாட்டீலை இன்று நேரில் சந்தித்து அவர் தமது ராஜினாமா கடிதத்தை வழங்கியதாக தகவல்கள் தெரிவிக்கின்றன. பா.ஜனதா உடனான 17 ஆண்டுகால கூட்டணியை கடந்த ஆண்டு முறித்துக்கொண்டார். பா.ஜனதாவின் பிரதமர் வேட்பாளராக நரேந்திர மோடி அறிவிக்கப்பட்டதற்கு எதிர்ப்பு தெரிவித்ததை தொடர்ந்து ஏற்பட்ட மோதலை தொடர்ந்தே அவர் கூட்டணியில் இருந்து விலகினார்.

இந்நிலையில் தற்போது நடந்துமுடிந்த நாடாளுமன்ற தேர்தலில் பீகார் மாநிலத்தில் மொத்தமுள்ள 40 தொகுதிகளில் 2 இடங்களில் மட்டுமே ஐக்கிய ஜனதா தளம் வென்றுள்ளது. கடந்த 2009 ஆம் ஆண்டு நடைபெற்ற நாடாளுமன்ற தேர்தலில், பா.ஜனதாவுடன் கூட்டணி அமைத்து போட்டியிட்டபோது, ஐக்கிய ஜனதா தளம் தலைமையிலான கூட்டணி பீகாரில் 32 இடங்களில் வெற்றி பெற்றது.

இதனை குறிப்பிட்டு கூட்டணியை முறித்துக்கொண்டதாலேயே கட்சிக்கு தற்போது தோல்வி ஏற்பட்டதாக ஐக்கிய ஜனதா தள கட்சியின் இரண்டாம் மட்ட தலைவர்கள் குற்றம் சாட்டினர்.இதனைத் தொடர்ந்தே நிதிஷ் குமார் தனது பதவியை ராஜினாமா செய்துள்ளார்.

'மக்களின் தீர்ப்பை மதிக்கிறேன்'

இதனிடையே ராஜினாமாவுக்கு பின்னர் செய்தியாளர்களை சந்தித்த நிதிஷ் குமார், "இதுபோன்ற தோல்வியை நான் இதற்கு முன்னர் சந்தித்தது இல்லை.தேர்தலில் மக்கள் அளித்த தீர்ப்பை மதிக்கிறேன். எனது கட்சியின் பிரசாரத்தை நான்தான் தலைமையேற்று மேற்கொண்டேன் என்பதால்ல், கட்சியின் தோல்விக்கு நான் பொறுப்பேற்றுக்கொள்கிறேன்.

பீகார் தேர்தல் முடிவு வகுப்புவாதத்திற்கு வழிவகுத்துள்ளது. நான் பதவி விலகிய போதிலும் சட்டசபையை கலைக்குமாறு ஆளுநரை கேட்டுக்கொள்ளவில்லை. எனது ராஜினாமா முடிவு கட்சியின் முடிவு" என்று தெரிவித்தார்.

இப்படியும் அரசியலில் சிலர் உள்ளனர்
ரமணியன்

தன்னுடைய குறுக்கு புத்தியால் தான் தலையில் தானே மண்ணை அள்ளிபோட்டுக்கொண்ட மாவீரன். இப்ப ராஜினாமா நாடகம் ஆடுகிறார்.

ஒழுங்கா பி‌ஜெ‌பி கூட்டணியில் இருந்திருக்கலாம்.