கன்னியாகுமரியில் வெற்றி பெறும் கட்சியே மத்தியில் ஆட்சி அமைப்பது மீண்டும் நிரூபிக்கப்பட்டது

கன்னியாகுமரியில் வெற்றி பெறும் கட்சியே, மத்தியில் ஆட்சி அமைக்கும் என்பது மீண்டும் நிரூபிக்கப்பட்டுள்ளது.



கன்னியாகுமரி தொகுதி

பாராளுமன்ற தேர்தலில், கன்னியாகுமரி தொகுதியில் எந்த கட்சி அல்லது எந்த கூட்டணியில் உள்ள கட்சி வெற்றி பெறுகிறதோ அந்த கட்சி மத்தியில் ஆட்சி அமைப்பது சென்டிமெண்டாக இருந்து வருகிறது.

இதனால் கன்னியாகுமரி தொகுதியில் வெற்றி பெறும் கட்சியே மத்தியில் ஆட்சி அமைக்கும் என்ற நம்பிக்கை அரசியல் பிரமுகர்கள் மத்தியிலும் ஏற்பட்டது. எனவே, கன்னியாகுமரி தொகுதியை யார் கைப்பற்றுகிறார்கள் என்ற எதிர்பார்ப்பு அனைத்து கட்சியை சேர்ந்தவர்களிடமும் எப்போதும் இருந்து கொண்டே இருக்கும்.

நிரூபிக்கப்பட்டது

கடந்த 1999–ம் ஆண்டு நடந்த பாராளுமன்ற தேர்தலில் பா.ஜனதா கட்சி சார்பில் போட்டியிட்ட பொன்.ராதாகிருஷ்ணன் வெற்றி பெற்றார். அப்போது மத்தியில் பா.ஜனதா ஆட்சி அமைந்தது. 2004–ம் ஆண்டு பாராளுமன்ற தேர்தலில், காங்கிரஸ்–தி.மு.க. கூட்டணியில் மார்க்சிஸ்ட் கம்யூனிஸ்டு கட்சி இருந்தது. அப்போது கன்னியாகுமரி தொகுதியில் மார்க்சிஸ்ட் கம்யூனிஸ்டு கட்சி சார்பில் ஏ.வி.பெல்லார்மின் போட்டியிட்டு வெற்றி பெற்றார். இதைத்தொடர்ந்து மத்தியில் காங்கிரஸ் ஆட்சி அமைந்தது.

கடந்த 2009–ம் ஆண்டு நடந்த பாராளுமன்ற தேர்தலில் காங்கிரஸ் கூட்டணி கட்சியில் இருந்த தி.மு.க. வேட்பாளர் ஹெலன் டேவிட்சன் வெற்றி பெற்றார். இதைத்தொடர்ந்து மத்தியில் காங்கிரஸ் ஆட்சி அமைந்தது.

அதே போல் தற்போது நடந்து முடிந்த பாராளுமன்ற தேர்தலிலும் கன்னியாகுமரி தொகுதியில் பா.ஜனதா கட்சி சார்பில் போட்டியிட்ட பொன்.ராதாகிருஷ்ணன் வெற்றி பெற்றுள்ளார். மத்தியிலும் பா.ஜனதா மகத்தான வெற்றி பெற்று உள்ளது. ஆகவே கன்னியாகுமரி பாராளுமன்ற தொகுதியில் வெற்றி பெறும் கட்சியே மத்தியில் ஆட்சி அமைப்பது மீண்டும் நிரூபிக்கப்பட்டது என்பது குறிப்பிடத்தக்கது.