காயம்படாத விளையாட்டை இனிமேல்தான் கண்டுபிடிக்க வேண்டும்! - ஜல்லிக்கட்டுக்காக மல்லுக்கட்டும் தமிழறிஞர்

[noguest] தமிழர்களின் வீர விளையாட்​டான ஜல்லிக்கட்டுக்கு உச்ச நீதிமன்றம் தடை விதித்துத் தீர்ப்பளித்து இருப்பதால், அதிர்ந்து​போய் இருக்கிறது தமிழகம். மதுரை, திண்டுக்கல் உள்ளிட்ட தென் தமிழக கிராமத்தினர் இந்தத் தீர்ப்பைக் கேட்டதும் சோகத்தில் ஆழ்ந்துள்ளனர்.

தமிழகத்தில் நீண்ட நெடுங்​காலமாக நடை​பெற்று வந்த ஜல்லிக்கட்டுக்கு, கடந்த சில வருடங்களாகவே புளு கிராஸ் அமைப்பின் மூலமாகச் சோதனை வந்தது. ஜல்லிக்கட்டை தடைசெய்யக் கோரி அந்த அமைப்பினர் நீதிமன்றத்துக்குச் சென்றதால் சில கட்டுப்பாடு​களுடன் இதை நடத்திக்கொள்ள இடைக்கால அனுமதியை உச்ச நீதிமன்றம் வழங்கியது.

இறுதித் தீர்ப்பில் ஜல்லிக்கட்டு நிகழ்ச்சிக்குத் தடைவிதித்து உத்தரவிட்டதால்... அந்த நிகழ்ச்சியை நடத்துபவர்கள், அதில் பங்கேற்கும் வீரர்கள், பார்வையாளர்கள் மட்டுமின்றி தமிழ் அமைப்பினரும் கொந்தளிக்கின்றனர்.

இதுபற்றி நம்மிடம் பேசினார் வரலாற்று ஆய்வாளரும் தமிழ் அறிஞருமான தொ.பரமசிவன். ''தமிழர்களின் பாரம்பரியம் மிகுந்த வீர விளையாட்டான ஜல்லிக்கட்டுக்கு உச்ச நீதிமன்றம் தடைவிதித்து இருக்கிறது. இது எங்களைப் போன்றவர்களை மிகுந்த மனவேதனை அடையச் செய்துள்ளது. இந்தத் தீர்ப்பின் மூலமாகத் தமிழர்களின் பண்பாட்டு வேர் அறுக்கப்பட்டு இருப்பதாகவே நினைக்கிறேன்.

நீதிமன்றத்தில் நடந்த வாதத்தில் யார் எப்படி வாதிட்டார்கள், என்ன விஷயங்களை முன்வைத்தார்கள் என்பது தெரிய​வில்லை. ஆனாலும், மாடுகள் அபாயகரமான கொடிய விலங்கோ அல்லது வன விலங்கோ அல்ல. வெளியில் இருந்து அவற்றைக் கொண்டுவருவதாகச் சொல்வது தவறானது. காங்கயம், ஆலம்பாடி வகை மாடுகள் அனைத்துமே வீடுகளில் வளர்க்கப்படும் விலங்குகள்​தான். வீடுகளில் வளர்க்கப்படும் மற்ற பிராணிகளைப் போலவே இவையும் பராமரிக்கப்படும்.

ஜல்லிக்கட்டை பொறுத்தவரை, ஊடகங்கள் அதனை மாடு அடக்குதல் என்று தவறாகச் சித்திரித்துவிட்டன. உண்மையில்... மாடு அடைதல் என்பதே சரியான சொல். மாட்டின் திமிலை பிடித்துக்கொண்டு 30 அடி தூரம் சென்றாலே வெற்றி பெற்றவனாக அறிவிக்கப்படுகிறான். இந்த விளையாட்டில் பங்கேற்கும் வீரர்கள் மாடுகளை எந்த விதத்திலும் துன்புறுத்துவது கிடையாது.

ஸ்பெயின் நாட்டில் நடைபெறும் காளை அடக்கும் நிகழ்ச்சியில் பங்கேற்கும் வீரர்கள் கையில் ஈட்டியுடன் களத்தில் நிற்பார்கள். பாய்ந்து வரும் மாட்டின் முதுகில் ஈட்டியால் குத்திச் சாய்ப்பார்கள். இங்கே அது மாதிரியான எந்தச் சம்பவமும் நடப்பது இல்லை. இதில் கலந்துகொள்ளும் வீரர்கள் கைகளை மட்டுமே நம்பிக் களம் இறங்குவார்கள். மாடுகளுக்காவது கொம்பு இருக்கிறது... வீரர்களுக்குக் கைகளைத் தவிர எந்த ஆயுதமும் கிடையாது.

இந்த விளையாட்டில் பங்கேற்கும் மாடுகள் பிடி​படாமல் இருக்க, தப்பி ஓட முயற்சி செய்யுமே தவிர, யாரையும் விரட்டிச் சென்று முட்டுவது கிடையாது. மாடுகளை இதற்குத் தயார்படுத்துவதற்காகத் துன்புறுத்துவதாகச் சொல்வதில் துளியும் உண்மை இல்லை என்பதைக் களத்துக்கு நேரில் சென்று ஆய்வு செய்தாலே புரியும்.

இந்த மாடுகள் தெய்வ வழிபாட்டுடன் தொடர்புடையதாக இருக்கின்றன. பூஜை செய்து வணங்குகிறார்கள். இப்படி வணக்கத்துக்கு உரியதாக வைத்திருக்கும் மாடுகளைத் துன்புறுத்துவதாகச் சொல்வது தவறான வாதம்.

இந்துக்களோடு மட்டும் அல்லாமல் கிறிஸ்துவர்​களோடும் மாடுகள் தொடர்பு உடையதாக இருக்கின்றன. இந்து விழாக்களின்போது ஜல்லிக்கட்டு நடத்தப்படுவது போலவே, திண்டுக்கல் மாவட்டத்தில் கத்தோலிக்க தேவாலய விழாவின்போது கிறிஸ்துவர்கள் ஜல்லிக்கட்டு நடத்துகிறார்கள். அதனால் மக்களின் சமயங்களோடு இரண்டற கலந்துவிட்ட இந்த நிகழ்ச்சிக்கு தடை விதித்திருப்பது ஏற்றுக்கொள்ளவே முடியாதது. உச்ச நீதிமன்றம் இந்தத் தீர்ப்பை மறுபரிசீலனை செய்ய வேண்டும்.

ஒவ்வொரு மாநிலத்துக்கு ஒவ்வொரு விளையாட்டு இருக்கிறது. பாரம்பரியத்தையும் பண்பாட்டையும் வெளிப்படுத்தும் இந்த விளையாட்டுக்களை தடைசெய்வது அந்தந்த சமூகத்தின் அடையாளத்தை அழிக்கும் செயல்.

பொதுவாக, ஆபத்து இல்லாத விளையாட்டே கிடையாது. சைக்கிள் பழக வேண்டுமானால்கூட கீழே விழுந்து முட்டியில் காயத்தை ஏற்படுத்திக்கொள்ளாமல் பழகிவிட முடியாது. ரத்த காயம் படாத விளையாட்டை உலகத்தில் இனிமேல்தான் கண்டுபிடிக்க வேண்டும்.

சூது விளையாட்டில்கூட அதன் காய்கள் எதிரில் இருப்பவரின் நெற்றியில் தெறித்து ரத்தக் காயத்தை ஏற்படுத்தியதாக சங்கப் பாடலகளில் தெரிவிக்கப்பட்டு இருக்கிறது. அதனால் ரத்தம் வருகிறது என்பதற்காக எந்த விளையாட்டுமே விளையாடக் கூடாது என சொல்லிவிட முடியுமா? இந்த விளையாட்டில் பாதுகாப்பு சரியில்லை என்றால் அதைச் சீர்ப்படுத்த என்ன செய்ய வேண்டும் என சொல்லலாம். சில கட்டுப்​பாடுகளை விதிக்கலாம். நெறிமுறைகளை வகுக்க​லாம்'' என்றார். [/noguest]



[thanks] விகடன் [/thanks]