புற்று நோய்க்கு 10 பேர் பலியான பகுதியில் மேலும் ஒருவர் திடீர் மரணம் - சிறப்பு மருத்துவ குழுவினர் ஆய்வு

சேலம் : சேலத்தில் ஒரே பகுதியில் புற்று நோய்க்கு 10 பேர் இறந்த பகுதியில் சிறப்பு மருத்துவக்குழுவினர் ஆய்வு நடத்தினர். அப்போது, பாதிக்கப்பட்ட மேலும் ஒருவர் இறந்தது பெரும் பரபரப்பை ஏற்படுத்தியது. சேலம் மாநகராட்சி 50வது கோட்டத்தில் உள்ளது எஸ்.கே.கார்டன் பகுதி. இங்குள்ள புத்தூர் இட்டேரி ரோடு, கொடம்பக்காடு பகுதிகளில் 500க்கும் மேற்பட்ட குடும்பத்தினர் வசித்து வருகின்றனர். இந்த பகுதியில் கடந்த ஒரு வருடத்தில் லட்சுமிஅம்மாள், லட்சுமி, அண்ணாமலைகவுண்டர், ஏழுமலை என்று 10க்கும் மேற்பட்டோர் புற்றுநோய்க்கு இறந்தனர். தொடர்ச்சியாக ஏற்பட்ட மரணம் மக்களை பீதியில் ஆழ்த்தியது. அந்த பகுதியில் அமைந்துள்ள 50க்கும் மேற்பட்ட தொழிற்சாலைகளில் இருந்து வெளியாகும் கழிவுகளால்தான் புற்றுநோய் பாதிப்பு ஏற்பட்டு இறப்புகளுக்கு காரணம்.

அப்பகுதியில் புற்றுநோய் பாதிப்பு குறித்த கண்டறிய மாநகராட்சி சார்பில் சிறப்பு மருத்துவக்குழு அமைக்கப்பட்டுள்ளது. மாநகர் நலஅலுவலர் அர்ஜூன்குமார் தலைமையிலான இந்த குழுவில் டாக்டர்கள் 10 பேர் இடம் பெற்றுள்ளனர்.சிறப்பு மருத்துவ குழுவினர் நேற்று எஸ்.கே.கார்டன் பகுதியில் புற்று நோய்க்கு இறந்தவர்களின் வீடுகளுக்கு சென்று நேரடி விசாரணை நடத்தினர். அதிகாரிகள் ஆய்வு நடத்திக் கொண்டிருக்கும்போதே 50வது வார்டு கரியபெருமாள் கரட்டை சேர்ந்த சலவைத் தொழிலாளியான அப்புசாமி என்ற சத்யா (47) புற்றுநோயால் இறந்துவிட்டதாக தகவல் கிடைத்தது மேலும் அப்பகுதியில் பரபரப்பை அதிகரித்தது.ஆய்வு குறித்து சேலம் மாநகர் நல அலுவலர் டாக்டர் அர்ஜூன்குமார் கூறியதாவது:

இந்த பகுதியில் தொடர்ச்சியாக நடந்த புற்றுநோய் இறப்புகளுக்கு சுற்றுச்சூழல் பாதிப்புதான் காரணம் என்று உறுதியாக கூற முடியாது. இருப்பினும் ஒவ்வொரு இறப்பு குறித்தும் முழுமையாக ஆய்வு செய்ய உள்ளோம். தொழிற்சாலைகள் வெளியேற்றும் கழிவுகளால் பாதிப்பு உண்டா என்பது குறித்து மாசுகட்டுப்பாட்டு வாரியம்தான் ஆய்வு செய்ய வேண்டும். இருப்பினும் மாநகராட்சி சார்பில் இந்த பகுதியில் எத்தனை தொழிற்சாலைகள் உள்ளன? அவற்றுக்கு உரிய அங்கீகாரம் வழங்கப்பட்டுள்ளதா? சுற்றுச்சூழலுக்கு கேடு விளைவிக்காத வகையில் இயக்கப்படுகிறதா என்பது குறித்து ஆய்வு செய்யப்படும். அதன்பின்னர் இப்பகுதியில் தொடர் மரணங்களுக்கான காரணங்கள் குறித்த விளக்க அறிக்கை வெளியிடப்படும்.இவ்வாறு அர்ஜூன்குமார் கூறினார்.