நரேந்திர மோடி ஆட்சியைப் பாராட்டி 285 விருது வழங்கிய மத்திய காங்கிரஸ் அரசு

by **சிவா** Thu May 08, 2014 11:08 am

காந்திநகர் : பா.ஜ., பிரதமர் வேட்பாளர் நரேந்திர மோடி ஆட்சி செய்யும் குஜராத், நாட்டின் முன்மாதிரி மாநிலமாக திகழவில்லை எனவும், அங்கு வறுமை கோட்டிற்கு கீழ் இருப்பவர்கள் அதிகம் எனவும், அம்மாநிலத்தில் வளர்ச்சி ஏற்பட்டுள்ளது போன்ற மாய தோற்றத்தை மோடி ஏற்படுத்தி உள்ளார் எனவும் பல வகைகளில் மோடியை பற்றியும் மோடியின் அரச குறித்தும் காங்கிரஸ் உள்ளிட்ட பல அரசியல் கட்சி தலைவர்கள் கடுமையாக விமர்சித்து, கோடை வெயிலையும் மிஞ்சும் அளவிற்கு அனல் பறக்கும் பிரசாரம் செய்தனர். ஆனால் மத்திய அரசு நேற்று வெளியிட்ட புள்ளிவிபர அறிக்கை இவற்றிற்கு பதிலடியாக அமைந்துள்ளது.

மத்திய வர்த்தக மற்றும் தொழில்துறை அமைச்சர் ஆனந்த் சர்மா, தனது அமைச்சகத்தால் வெளியிடப்பட்ட அறிக்கையை நேற்று வெளியிட்டார். குஜராத் மாநிலம் குறித்து தனியார் நிறுவனத்தால் அளிக்கப்பட்ட ஆய்வு அறிக்கை, மத்திய தொழில்துறை அமைச்சகத்தால் சரிபார்க்கப்பட்டு ஏற்றுக் கொள்ளப்பட்ட அறிக்கையையே ஆனந்த் சர்மா வெளியிட்டார். அந்த அறிக்கையில், கடந்த சில ஆண்டுகளில் குஜராத் அரசு பிரதமரிடம் இருந்து சுமார் 100 விருதுகளையும், மத்திய அரசின் பிற துறைகளிடம் இருந்து 180க்கும் அதிகமான விருதுகளை பெற்றுள்ளது என குறிப்பிடப்பட்டுள்ளது. இந்த விருதுகள் அனைத்தும் மத்திய அரசால் அங்கீகரிக்கப்பட்டு, நல்லாட்சி புரிந்ததற்கான சான்றிதழுடன் மோடிக்கு வழங்கப்பட்டுள்ளதாகும்.

மோடி ஆட்சியைப் பாராட்டி:

பல்வேறு மாநிலங்களில் சிறந்த செயல்பாடு குறித்த ஆய்வு நடத்தப்பட்டு தொழில் கொள்கை மற்றும் மேம்பாட்டுத்துறைக்கு தனியார் நிறுவனத்தால் அளிக்கப்பட்டுள்ள அறிக்கையின் அடிப்படையில் இந்த தகவல்கள் பெறப்பட்டுள்ளதாக ஆனந்த் சர்மா தெரிவித்துள்ளார். துறை வாரியாக ஆய்வு நடத்தப்பட்டு 45 பக்க அறிக்கையாக சமர்ப்பிக்கப்பட்டதாகவும், தொழில்துறை வளர்ச்சியை ஊக்குவிப்பதற்காக இத்தகைய ஆய்வுகள் மேற்கொள்ளப்பட்டு வருவதாகவும் அவர் தெரிவித்துள்ளார்.

மோடியின் ஆட்சிமுறையை பாராட்டி 2004ம் ஆண்டு முதல் குஜராத் அரசிற்கு இந்த விருது வழங்கப்பட்டுள்ளது. இதுவரை 7 பிரதமர் விருதுகளும், பல்வேறு மத்திய அரசு துறைகள் சார்பில் 82 விருதுகளும், தேசிய மற்றும் சர்வதேச நிறுவனங்களின் பல்வேறு துறைகளைச் சேர்ந்த 172க்கும் அதிகமான விருதுகள் என 285க்கும் அதிகமான விருதுகள் அளிக்கப்பட்டுள்ளது.

காங்கிரஸ் தலைமையிலான ஐக்கிய முற்போக்கு கூட்டணி அரசின் ஆட்சியில் கிராமப் புறங்களில் சுகாதார மேலாண்மை மற்றும் சிறந்த சுத்தமான குடிநீர் விநியோகத்திற்கான பிரதமர் விருது குஜராத் அரசிற்கு வழங்கப்பட்டுள்ளது. நகர்புறங்களில் ஏழைகளுக்கான குடியிருப்பு மற்றும் தாய்-சேய் இறப்பு விகிதத்தை குறைத்ததற்காக சிறந்த நிர்வாக விருதும் மத்திய அரசால் குஜராத் அரசிற்கு வழங்கப்பட்டுள்ளது. 2010-11ம் ஆண்டிற்கான மத்திய அரசின் நிர்வாக சீரமைப்பு மற்றும் மக்கள் குறைதீர்ப்பு துறை, தகவல் தொழில்நுட்பத்துறை விருதுகளை குஜராத்தின் முதல்வர் அலுவலகம் பெற்றுள்ளது. இவற்றில் பெரும்பாலான விருதுகள், மக்கள் சேவை தொடர்பான துறைகளுக்காக வழங்கப்பட்டதாகும்.

சிறந்த போக்குவரத்து, சுகாதாரம்:

குஜராத் நகர்புற மக்கள் வளர்ச்சித்துறை, மத்திய அரசின் பல்வேறு விருதுகளை பெற்றுள்ளது. மாநில அரசுகளுக்கான விருதுகளில் சிறந்த போக்குவரத்து, திடகழிவு மேலாண்மை மற்றும் நீர் விநியோகத் திட்டங்கள் ஆகியவற்றிற்காக குஜராத் அரசு பெற்றுள்ளது. குஜராத்தின் சுகாதார மற்றும் குடும்ப நலத்துறையும், மத்திய சுகாதார மற்றும் குடும்ப நலத்துறை சார்பில் பல்வேறு விருதுகள் வழங்கி கவுரவிக்கப்பட்டுள்ளது.

குஜராத்தின் அறிவியல் மற்றும் தொழில்நுட்பத்துறை, மத்திய அரசிடம் இருந்து அதிக அளவிலான விருதுகளை பெறறுள்ளது. சுற்றுலாத்துறை வளர்ச்சிக்காக பல்வேறு தேசிய விருதுகளையும், சுற்றுச்சூழல் பாதுகாப்பிற்காக மாசுகட்டுப்பாட்டு வாரியத்தின் தேசிய இ-கவர்னன்ஸ் விருதும் பெறப்பட்டுள்ளது. திட்ட கமிஷனால் சிறந்த முன்மாதிரி நிர்வாகம் எனப் பாராட்டப்பட்டு விருது வழங்கப்பட்டுள்ளது. ஐ.நா., யுனெஸ்கோ உள்ளிட்ட பல்வேறு சர்வதேச அமைப்புக்களிடம் இருந்தும் குஜராத் அரசு பல்வேறு துறைகளின் வளர்ச்சிக்கான விருதுகளை பெற்றுள்ளதாக மத்திய தொழில்துறை அமைச்சகம் வெளியிப்பட்டு ஆய்வு அறிக்கையில் குறிப்பிடப்பட்டுள்ளது.

[thanks] தினமலர் [/thanks]