அதிகாரத்தை தவறாக பயன்படுத்திய வழக்கு தாய்லாந்து பிரதமர் பதவி நீக்கம்

அதிகாரத்தை தவறாக பயன்படுத்திய வழக்கு தாய்லாந்து பிரதமர் பதவி நீக்கம்! மந்திரிகளின் பதவியையும் பறித்து கோர்ட்டு தீர்ப்பு

அதிகாரத்தை தவறாக பயன்படுத்திய வழக்கில் குற்றச்சாட்டு நிரூபிக்கப்பட்டதால் தாய்லாந்து பிரதமர் யிங்லக் ஷினவத்ராவை பதவி நீக்கம் செய்து அந்த நாட்டின் அரசியல் சாசன கோர்ட்டு அதிரடி தீர்ப்பு வழங்கியது. அவரது மந்திரிகளின் பதவியும் பறிக்கப்பட்டுள்ளது.

அதிகார துஷ்பிரயோகம்

தாய்லாந்து நாட்டின் பிரதமராக யிங் லக் ஷினவத்ரா (வயது 46). கடந்த 2011–ம் ஆண்டு ஆகஸ்டு மாதம் 5–ந்தேதி பொறுப்பேற்றார். ஆனால் அவர் பதவி நீக்கம் செய்யப்பட்ட பிரதமரான தனது சகோதரர் தக்ஷின் ஷினவத்ராவின் பினாமியாக செயல்படுவதாகக்கூறி, அவருக்கு எதிராக கடந்த 6 மாதங்களாக போராட்டங்கள் நடைபெற்று வந்தன. இதில் 25 பேர் உயிர் இழந்தனர். 100–க்கும் மேற்பட்டோர் படுகாயம் அடைந்தனர்.

இந்த நிலையில், அவர் 2011–ம் ஆண்டில் தனது அதிகாரத்தை தவறாக பயன்படுத்தி, தேசிய பாதுகாப்பு கவுன்சில் தலைவர் தாவில் பிளையன்ஸ்ரீயை பணியிடமாற்றம் செய்ததாக தாய்லாந்து அரசியல் சாசன கோர்ட்டில் எம்.பி.க்கள் வழக்கு தொடுத்தனர். அவர் ஆளுங்கட்சிக்கு சாதகமாக இந்த நடவடிக்கையை எடுத்ததாக வழக்கில் குற்றம் சாட்டப்பட்டது.

குற்றச்சாட்டை மறுத்தார்

இந்த வழக்கில் நேற்று முன்தினம் அவர் பாங்காக்கில் உள்ள அரசியல் சாசன கோர்ட்டில் ஆஜர் ஆனார்.

அப்போது அவர் வாக்குமூலம் அளித்தார். அதில் அவர் தன் மீதான குற்றச்சாட்டை திட்டவட்டமாக மறுத்து வாதிட்டார். இதையடுத்து இந்த வழக்கில் 7–ந்தேதி தீர்ப்பு வழங்கப்படும் என நீதிபதி அறிவித்தார்.

நீக்கம்

அதன்படி நேற்று தீர்ப்பு வழங்கப்பட்டது. பிரதமர் யிங்லக் ஷினவத்ரா அதிகார துஷ்பிரயோகம் செய்த குற்றச்சாட்டு நிரூபிக்கப்பட்டுள்ளதால் அவரைப் பதவி நீக்கம் செய்து தீர்ப்பில் உத்தரவிடப்பட்டது. தேசிய பாதுகாப்பு கவுன்சில் தலைவர் தாவில் பிளையன்ஸ்ரீ நீக்கப்பட்டதில் பிரதமருக்கும் பங்கு உண்டு என்று கோர்ட்டு கூறியது.

மேலும், அவரை 4 நாளில் பணியிடமாற்றம் செய்திருப்பதாகவும். அவசரக்கோலத்தில் இது நடைபெற்றிருப்பதாகவும், இட மாற்றம் தொடர்பான ஆவணங்களில் தேதிகளில் முரண்பாடுகள் இருப்பதாகவும், எனவே அவரது பிரதமர் பதவி முடிவுக்கு வருவதாகவும், அவர் இடைக்கால பிரதமராக பதவியில் தொடர முடியாது எனவும் கூறப்பட்டுள்ளது. தேசிய பாதுகாப்பு கவுன்சில் தலைவர் தாவில் பிளையன்ஸ்ரீயின் இடமாற்றம் நாட்டு நலனின் அடிப்படையிலானது அல்ல. யிங்லக் ஷினவத்ராவின் சொந்த அரசியல்நலன் சார்ந்தது என்றும் கோர்ட்டு கூறி விட்டது.

புதிய இடைக்கால பிரதமர்?

இதில் அவரது மந்திரிகள் 9 பேருக்கும் தொடர்பு உள்ளது என கூறிய கோர்ட்டு அவர்களையும் பதவியில் இருந்து நீக்கி உள்ளது. அதே நேரத்தில், வழக்கு தொடுத்த எம்.பி.க்களில் ஒருவரான பைபுல் நிதிதவான் கேட்டுக்கொண்டபடி புதிய இடைக்கால பிரதமரை ஏழு நாளில் நியமிக்க தனக்கு அதிகாரம் இல்லை என்று கோர்ட்டு தெரிவித்துள்ளது.

கோர்ட்டின் இந்த தீர்ப்பு தாய்லாந்து நாட்டில் நிலவி வரும் அரசியல் நெருக்கடியை மேலும் அதிகரித்துள்ளது.

இந்தியாவிலும் இவ்வாறு நடைபெற்றால் மக்கள் மகிழ்ச்சியடைவார்கள் என்று சிலர் கூறுகிறார்கள், ஆனால் தாய்லாந்து மக்கள் அதிகாரத்தில் உள்ளவர்கள் தவறு செய்தால் அதை எதிர்த்து தன் உயிரையும் கொடுத்துப் போராடி இந்த வெற்றியைப் பெற்றுள்ளார்கள்!


நாம் தான் எவன் எக்கேடு கெட்டுப் போனால் நமக்கென்ன என்று உள்ளோமே!