20 நிமிடத்தில் 310 யோகாசனங்கள்!

by **சிவா** Tue May 06, 2014 6:25 am

இப்போது இந்தியா மட்டுமல்லாது, தற்போது வெளிநாட்டு மக்களிடையேயும் யோகாசனம் கற்க வேண்டும் என்ற ஆர்வம் ஏற்பட்டுள்ளது.

விருதுநகர் மாவட்டம் சிவகாசியில் 49 வயது பெண் ஒருவர் 20 நிமிடத்தில் 310 விதமான யோகாசனங்கள் செய்து உலக சாதனை புரிந்துள்ளார். அவர் டி.ஞானவாணி.

அவருடைய உலக சாதனை குறித்துக் கேட்டோம்:

"" எனக்கு 500 விதமான யோகாசனங்கள் தெரியும். எனது தந்தை தியாகராஜன் வீட்டில் யோகாசனம் செய்வது வழக்கம். அதைப் பார்த்து எனக்கு ஆர்வம் ஏற்பட்டது. பள்ளியில் படிக்கும்போது 18வயதில் மதுரை சரவணன் என்பவரை குருவாகக்கொண்டு முறைப்படி கற்றேன். 2008 ஆம் ஆண்டு சென்னையில் உள்ள மேக்ஸ்வெல் என்பரை குருவாகக்கொண்டு பயிற்சி பெற்றேன்.

2011 ஆம் ஆண்டு தமிழ்நாடு யோகாசனக் கழகம் மாநில அளவிலான யோகாசனப்போட்டியை ஸ்ரீ பெரும்புதூரில் நடத்தினார்கள். அதில் 35வயதுக்கு மேற்பட்டோர் பிரிவில் கலந்து கொண்டு முதலிடம் பெற்றேன்.

இதைத் தொடர்ந்து யோகாசனத்தில் சாதனை படைக்க வேண்டும் என்ற ஆர்வம் ஏற்பட்டது.

2011ஆம் ஆண்டு இந்திய யோகாசனக் கழகம் சார்பில் கர்நாடகா மாநிலம் தர்மசாலாவில் நடைபெற்ற தேசிய அளவிலான போட்டியில் 40 - 60 வயது உடையோர் பெண்கள் பிரிவில் பங்கேற்று ஆறாமிடம் பெற்றேன்.

இதையடுத்து எனது வீட்டில் பெண்களுக்கு யோகாசனப் பயிற்சி அளிக்கத் தொடங்கினேன்.

கடந்த செப்டம்பர் மாதம் ராஜபாளையத்தில், தமிழ்நாடு யோகா மற்றும் ஸ்கேட்டிங் கழகம் ஏற்பாடு செய்திருந்த சாதனை நிகழ்ச்சியில் ஊர் பெரியவர்கள் முன்னிலையில் 20 நிமிடத்தில் 310 விதமான யோகாசனங்கள் செய்து சாதனை புரிந்தேன்.

காலை 11.05 மணிமுதல் 11.25 மணிக்குள் இந்த சாதனையை செய்து முடித்தேன். ஏற்கெனவே ஒரு மணிநேரத்தில் 200 விதமான யோகாசனங்கள் செய்ததுதான் உலக சாதனையாகக் கருதப்பட்டது. ராஜபாளையத்தில் நான் நிகழ்த்திய சாதனையின் வீடியோவைப் பாண்டிசேரியில் உள்ள அசிஸ்ட் வேல்டு ரிக்கார்ட் என்ற அமைப்புக்கு அனுப்பினோம். அவர்கள் ஏற்றுக்கொண்டு,யோகாசனத்தில் உலகசாதனை புரிந்ததாக, அந்த அமைப்பின் சேர்மன் ஆர்.ராஜேந்திரன் கையேழுத்திட்ட சான்றிதழை புதுச்சேரி முதல்வர் ரெங்கசாமி என்னிடம் வழங்கினார்'' என்றார் ஞானவாணி.

- எஸ்.பாலசுந்தரராஜ்