முள்ளங்கி

**சிவா** · **சிவா** Mon May 05, 2014 4:31 pm

முள்ளங்கி என்பது ஒரு நீர்க்காயாகும். எந்த காலத்திலும் மலிவாகக் கிடைக்கும் காய்களில் முள்ளங்கியும் ஒன்று.

முள்ளங்கியை சாம்பாரில் சேர்க்கலாம். பொரியல் செய்து சாப்பிடலாம். முள்ளங்கி மட்டும் அல்லாமல் முள்ளங்கிக் கீரையும் மனிதனுக்கு பல நன்மைகளை செய்கிறது.

நோய் எதிர்ப்பு சக்தி கொண்ட முள்ளங்கியில் உடலிற்குத் தேவையான சத்துக்களும் தாதுப்பொருட்களும் இருக்கின்றன. மஞ்சள் முள்ளங்கியில் பீட்டாக்காரோட்டீன் எனப்படும் சத்து உள்ளது. இது உடலில் உயிர்ச்சத்து A-வாக (vitamin A) மாற்றப்படுகிறது. அதன் சாறு ஒரு உடல்நல மருந்தாகப் பயன்படுத்தப்படுகிறது. மஞ்சள் முள்ளங்கி உட்கொள்ளுதல் கண்பார்வையை மேம்படுத்தும்.

புற்றுநோயைத் தடுக்கும் குணம் முள்ளங்கிக்கு உடையதாக மருத்துவ ஆய்வுகளில் கண்டறியப்பட்டுள்ளது. ஆஸ்துமா பிரச்சினைகளையும் முள்ளங்கி தீர்க்கிறது.

உடலிற்குக் குளிர்ச்சியைத் தரும் இயல்புடைய முள்ளங்கி, சிறு நீர் உபாதைகள் இருப்பவர்களின் பிரச்சினைகளைப் போக்கி இயல்பாக்குகிறது. கோடை காலத்தில் அனைவருமே முள்ளங்கியை எந்த கவலையும் இன்றி சமைத்து சாப்பிடலாம். உடலுக்கு குளிர்ச்சியையும் அளிக்கும்.

ஒரு மனிதனுக்கு நாள் ஒன்றுக்குத் தேவைப்படும் குறைந்தபட்ச சத்துக்கள் பெருமளவு இந்த முள்ளங்கியில் அதிகமாகவே நிறைந்துள்ளது. எனினும், முள்ளங்கியை இரவில் சாப்பிடுவதை தவிர்க்க வேண்டும்.

வெறும் நீர்க்காய் என்றோ, சளிப்பிடிக்கும் என்றோ, சுவையற்றது என்று கூறியோ முள்ளங்கியையோ, அதன் கீரையையோ வெறுக்காமல், அவ்வப்போது உணவில் முள்ளங்கி மற்றும் முள்ளங்கிக் கீரையை சேர்த்துக் கொண்டால் மருத்துவரிடம் செல்வதைத் தடுக்கலாம்.

அதே சமயம் முள்ளங்கியை அடிக்கடி சேர்த்தால் வயிற்றுப்பொருமல், எரிச்சல் வரும் வாய்ப்பிருப்பதால் அளவாக உண்ணலாம்.