ஆண்டுக்கு 1,000 மெகாவாட் மின்தேவை அதிகரிப்பு

தமிழகத்தின் மின்தேவை ஆண்டுக்கு, 1,000 மெகாவாட் அதிகரித்து வருகிறது. இதனால், ஆண்டுதோறும், 1,000 மெகாவாட் கூடுதல் மின் உற்பத்தி மற்றும் வினியோகம் செய்யாத பட்சத்தில், வரும் ஆண்டு களில் மின்தேவை மேலும்அதிகரிக்க வாய்ப்புள்ளது.

கடந்த, 1957ல் தமிழ்நாடு மின்வாரியம் உதயமான போது, தமிழகத்தின் மொத்த மின் உற்பத்தி நிறுவு திறன், 256 மெகாவாட். மின்வாரியம் துவங்கி, 56 ஆண்டு ஆகியுள்ள நிலையில், தற்போது மின் உற்பத்தி நிறுவு திறன், 10, 500 மெகாவாட் ஆக உள்ளது. ஆனால், ஆறு ஆண்டுகளாக மின் உற்பத்தி நிறுவு திறன் மற்றும் வினியோக அளவை விட, தொழிற்சாலைகள் அதிகரிப்பு, தனிநபர் மின்நுகர்வு அதிகரிப்பு, அரசு வழங்கும் மின்சாரம் மூலம் இயங்கும் இலவச பொருட்கள் பயன்பாடு காரணமாக, மின்தேவை கிடுகிடுவென அதிகரித்து வருகிறது. கடந்த, 2008ம் ஆண்டுக்கு முன், ஆண்டுக்கு, 400 முதல், 500 மெகாவாட் அதிகரித்த மின்நுகர்வு, அதன் பின், இரட்டிப்பாகி விட்டது. கடந்த, 2008ல், 8, 500 மெகாவாட் ஆக இருந்த தமிழகத்தின் உச்சபட்ச மின்தேவை, 2009ல், 9,500 மெகாவாட், 2010ல், 10,200 மெகாவாட், 2011ல், 10,800 மெகாவாட், 2012ல், 11,500 மெகாவாட், 2012ல், 12,000 மெகாவாட் ஆக அதிகரித்தது. நடப்பாண்டில், அதிகபட்சமாக தமிழக மின்நுகர்வு, 13,020 மெகாவாட் ஆக அதிகரித்தது. மின்நுகர்வு கடந்த ஆண்டை விட நடப்பாண்டு, 1,000 மெகாவாட் அதிகரித்துள்ளது குறிப்பிடத்தக்கது. மின்நுகர்வு ஆண்டுதோறும், 1,000 மெகாவாட் அதிகரிக்கும் நிலையில், கடந்த ஐந்தாண்டுகளில், மின் உற்பத்தி நிறுவுதிறன், 400 மெகாவாட் மட்டுமே அதிகரித்துள்ளது.

வடசென்னை, மேட்டூர் புதுதெர்மல் மூலம், 1,800 மெகாவாட் மின்சாரம் கூடுதலாக கிடைத்தாலும், அதன்மூலம் தற்போதைய மின்தேவையை மட்டுமே சமாளிக்க முடியும். வருங்காலங்களில் மின்நுகர்வு மேலும் அதிகரிக்கும் என்பதால், வழக்கம் போல மின்தடை நீடிக்கும். ஆண்டுக்கு, 1,000 மெகாவாட் வீதம் அதிகரிக்கும் மின்தேவையை சமாளிக்க, அரசு போர்க்கால அடிப்படையில், மின் உற்பத்தி திட்டங்களை செயல்படுத்த வேண்டும். இல்லையேல், நிகழ்காலத்தை போல, வருங்கால தமிழகமும் இருளில் மூழ்கி தவிப்பதை தவிர்க்க இயலாது.

வறட்சியால் மின்நுகர்வு அதிகரிப்பு:

தமிழகத்தில், இரண்டாண்டுகளாக பருவமழை தவறியதால், நிலத்தடி நீர் பாதாளத்துக்கு சென்று விட்டது. இதனால், கோடையில் உள்ளாட்சி நிர்வாகங்கள் வழக்கத்தை விட பல மணிநேரம் கூடுதலாக மின்மோட்டார்களை இயக்கி, தண்ணீர் எடுத்து மக்களுக்கு வினியோகம் செய்ய வேண்டியுள்ளது. வீடுகளிலும் போர்வெல் மோட்டார், விவசாய பம்ப்செட் மோட்டார்களும் வழக்கத்தை விட கூடுதல் நேரம் இயக்குவதும், மின்நுகர்வு அதிகரிப்புக்கு முக்கிய காரணம்.

[thanks] தினமலர் [/thanks]

போகிற போக்கை பார்த்தால் மின்சாரத்தை தேர்தல் சமயத்தில் மட்டும்தான் பார்க்க இயலும் போல