திருவாசக முற்றோதல் விழா

புதுக்கோட்டை அருகேயுள்ள திருவரங்குளம் அருள்மிகு அரங்குளநாதர் உடனாய பெரியநாயகி அம்பாள் ஆலயத்தில் திருவாசக முற்றோதல் விழா வியாழக்கிழமை தொடங்கியது.

ஆலய வளாகத்தில் நடைபெற்ற நிகழ்ச்சியை வழிப்பாட்டு மன்ற ஒருங்கிணைப்பாளர் சிவ.ச.இராஜாமணி தொடக்கி வைத்துப் பேசியது:

தமிழைப் போற்றி வளர்த்த மதுரை மாவட்டத்தில் உள்ள திருவாதவூரில் சம்புபாதாசிருதர் சிவஞானவதி அம்மையார் செய்த அருந்தவப் பேற்றால் மாணிக்கவாசகர் என்னும் வாதவூரடிகள் அவதரித்தார். இவரது திறமையை தெரிந்து கொண்ட மதுரை அரசன் அதிமர்த்தன பாண்டியன் இவருக்கு தென்னவன் பிரமராயன் என்னும் பட்டத்தை வழங்கி மகிழ்ந்ததோடு சோழநாட்டில் உள்ள கடற்கரைக்கு வந்த குதிரைகளை வாங்கிவர பெரும்பொருளைக் கொடுத்து மாணிக்கவாசகரை மன்னர் அனுப்பி வைத்தார்.

அப்படிச் செல்லும் வழியில் ஆவுடையார்கோயில் என்றழைக்கப்படும் திருப்பெருந்துறையில் சிவபெருமான் வாதவூரடிகளை ஆட்கொள்ள வேண்டி ஒரு சிவ முனிவரின் திருக்கோலங்கொண்டு சிவகணங்கள் சூழ குருந்த மரத்தடியில் சிவஞானப்பொருளை உணர்த்திக்கொண்டிருந்தார், அதைக் கண்ட வாதவூரடிகள் காந்தம் கண்ட இரும்பு போல் ஈர்க்கப்பட்டு தம்வசம் இழந்து குருமூர்த்தியின் திருவடிகளில் வீழ்ந்து தம்மை ஆட்கொள்ளுமாறு வேண்டினார்.

இறைவன் அவருக்கு ஞானதீட்சை செய்து உண்மைப்பொருளை உபதேசித்து அருளினார். அதுபோது மாணிக்கமெனத் திகழ்ந்த வாசகத்தை பல பாடலாக வாதவூரார் பாட குருநாதர் அதனைக்கேட்டு மகிழ்ந்து அவருக்கு மாணிக்கவாசகர் என்னும் திருநாமம் சூட்டினார். இது போன்ற பல வரலாறுகளை பெற்றோர்கள் தெரிந்துக்கொண்டு இப்போதுள்ள இளம்தலை முறையினருக்கு புரியவைப்பது அவசியம் என்றார்.

நிகழ்ச்சியில், சிவபுராணம் கீர்த்தித்திருஅகவல், திருவெம்பாவை, அடைக்கலப்பத்து, சென்னிப்பத்து, ஆனந்தமாலை அச்சோப்பத்து போன்ற 51 வகையான மாணிக்கவாசகர் அருளிய திருவாசகங்களை சிவனாடியார்கள் பாடினர்.

விழாவில் புதுக்கோட்டை, அறந்தாங்கி, ஆவுடையார்கோவில், திருப்புனவாசல், ஆலங்குடி போன்ற பல்வேறு பகுதிகளில் இருந்து திரளான பக்தர்கள் கலந்து கொண்டனர். ஏற்பாடுகளை கோவில் குருக்கள் மீனாட்சி சுந்தரம், பொன்னையா, குமார் கண்ணன் ஆகியோர் செய்திருந்தனர்.