பஞ்சாப் தேர்தலில் 56 கோடீஸ்வரர்கள்

பஞ்சாப் மக்களவை தேர்தலில் கட்சி வேறுபாடின்றி, எல்லாக் கட்சிகளும், கோடீஸ்வரர்களை களத்தில் இறக்கியுள்ளன. மொத்தம் 13 மக்களவை தொகுதிகள் உள்ளன. இவற்றில் மொத்தம் 253 வேட்பாளர்கள் போட்டியிடுகின்றனர். இவர்களில் 56 வேட்பாளர்கள் கோடீஸ்வரர்கள் என்றால் பார்த்துக் கொள்ளுங்களேன். பஞ்சாப் மாநிலத்தில் ஒரே கட்டமாக 13 மக்களவை தொகுதிகளிலும் ஏப்ரல் 30ம் தேதி தேர்தல் நடைபெற உள்ளது. அதனால், தேர்தல் பிரசாரம் உச்ச கட்டத்தில் நடக்கிறது. கட்சி வேட்பாளர்களின் வேட்புமனுக்களை ஆய்வு செய்ததில், 56 கோடீஸ்வரர்கள் போட்டியிடுவது தெரிய வந்துள்ளது. ஆளும் சிரோன்மணி அகாலி தளத்தைச் சேர்ந்த 10 வேட்பாளர்களும், அதன் கூட்டணி கட்சியான பாஜவில் 3 வேட்பாளர்களும் கோடீஸ்வரர்களாக உள்ளனர். காங்கிரசை பொறுத்தவரை ஒருவரைத் தவிர அனைத்து வேட்பாளர்களும் கோடீஸ்வரர்கள். பகுஜன் சமாஜ் கட்சியை பொறுத்தவரை 6 வேட்பாளர்கள் கோடீஸ்வரர்களாக உள்ளனர்.

சிரோன்மணி அகாலிதளம் கட்சி சார்பாக போட்டியிடும் கோடீஸ்வர வேட்பாளர்களின் சராசரி சொத்து மதிப்பு ரூ.34.5 கோடி. அதேபோல, காங்கிரஸ் வேட்பாளர்களின் சராசரி சொத்து மதிப்பு ரூ.32.7 கோடி. ஆம் ஆத்மி வேட்பாளர்களின் சொத்து மதிப்பு சராசரி ரூ.4.11 கோடி. பகுஜன் சமாஜ் கட்சி வேட்பாளர்களின் சராசரி சொத்து மதிப்பு ரூ.1.46 கோடியாகும். 2009ம் ஆண்டு பொதுத்தேர்தலின் போது ரூ.1.66 கோடியாக இருந்த வேட்பாளர்களின் சொத்து மதிப்பு, இப்போது ரூ.4.48 கோடியாக உயர்ந்துள்ளது. இதில் 16 வேட்பாளர்களின் சொத்து மதிப்பு ஸி15 கோடிக்கு மேல் உயர்ந்து உள்ளது. இவர்கள் ரியல் எஸ்டேட் தொழில் செய்பவர்கள். அகாலி தளத்தின் சார்பாக பதேகர் சாஹிப் தொகுதியில் போட்டியிடும் குல்வந்த் சிங் வேட்பாளர்களிலேயே மிகப்பெரிய கோடீஸ்வரர்.

இவருடைய சொத்து மதிப்பு ரூ.139.61 கோடி. காங்கிரஸ் சார்பில் போட்டியிடும் அம்பிகா சோனியின் சொத்து மதிப்பு ரூ.118 கோடி, பாஜ சார்பில் போட்டியிடும் அருண் ஜெட்லியின் சொத்து மதிப்பு ரூ.113 கோடி. பதிந்தா தொகுதியின் தற்போதைய எம்பியும், அகாலி தள வேட்பாளரான சிம்ரத் கரூர் பாதலின் சொத்து மதிப்பு ரூ.108 கோடி. குர்தாஸ்பூர் தொகுதியில் இருந்து பாஜ சார்பில் போட்டியிடும் முன்னாள் பாலிவுட் சூப்பர் ஸ்டார் வினோத் கண்ணாவின் சொத்து மதிப்பு ரூ.66.93 கோடி.

மேலும், காங்கிரசைச் சார்ந்த முன்னாள் முதல்வர் அம்ரிந்தர்சிங், அவரது மனைவி பிரணீத் கவுர், மான் பிரித்சிங் பாதல், சுனில் ஜக்கார், பிரதாப் சிங் பாஜ்வா மற்றும் சிம்ரஞ்சித் சிங் மான் ஆகியோர் பட்டியலில் உள்ள மற்றவர்கள் ஆவார்கள். பஞ்சாபில் போட்டியிடும் மொத்த வேட்பாளர்களில் 9 சதவீதம் பேர் குற்றவியல் நடவடிக்கைகளில் ஈடுபட்டவர்கள் என்று தெரிவிக்கப்பட்டுள்ளது.

* 253 வேட்பாளர்களில் 50%-க்கும் மேலானவர்களின் கல்வித் தகுதி, மெட்ரிக் மற்றும் மெட்ரிக் தேர்வு பெற்றவர்கள். 32 சதவீதம் பேர் பட்டதாரிகள், முதுநிலை பட்டதாரிகள்.
* 68 வேட்பாளர்கள் மெட்ரிக்கிற்கும் குறைவான கல்வி தகுதி உடையவர்கள். 62 பேர் 10ம் வகுப்பு தேர்வில் தேர்ச்சி பெற்றவர்கள்.
* 21 வேட்பாளர்கள் பட்டதாரிகள். 29 வேட்பாளர்கள் முதுநிலை பட்டதாரிகள்.
* 9 சுயேச்சை வேட்பாளர்கள் படிக்காதவர்கள்.