உன்னால் நான் உயர வேண்டும்!!

jawhar · jawhar Sun Apr 27, 2014 7:09 am

சிந்தனையின் சக்தி நீயாய்!
சிப்பிக்குள் முத்தாய்!
சாந்தத்தின் சொந்தம் நீயாய்!
சார்ந்தவர் சொந்தம் ஆனாய்!

கவலை மறக்கச் செய்தாய்!
கனிந்திடும் மழலை தந்தாய்!
கோடையின் நிழலுமானாய்!
கோதையின் சிறப்புமானாய்!

வாழ்வினில் பிடிப்பைத் தந்தாய்!
வளர்ந்திட வலிமை தந்தாய்!
விளங்கிட பாலம் ஆனாய்!
வளங்களில் சிறப்புமானாய்!

தேடிய செல்வம் ஆனாய்!
திருந்திட துணையும் ஆனாய்!
துணிந்து பணி செய் என்றாய்!
தோழனாய் தோளும் கொடுத்தாய்!

சிரிப்பினில் மயங்கிடச் செய்தாய்!
சில நேரம் அழவும் வைத்தாய்!
சோம்பலாய் இருக்கக் கண்டாய்!
சோம்பலை மறக்கச் செய்தாய்!

எதிர்காலம் உனக்காய் நானும்!
ஏற்றிட உனக்காய் நீயும்!
எழுந்து நாம் உழைக்க வேணும்!
ஏற்றம் பல காண வேண்டும்!

உலகினில் திகழ வேண்டும்!
உன் பெயர் சொல்ல வெண்டும்!
உலகமே வியக்க வேண்டும்!
உன்னால் நான் உயர வேண்டும்!!

பெற்ற என் சிறப்புக் கூற!
பெருமையாய் தலையும் நிமிர!
போற்றுவார் ஒன்று சேர!
பணிந்து நீ பணிகள் செய்வாய்!

ஜவ்ஹர்