பாபா ராம்தேவ்வின் தேன்நிலவு விமர்சனம் எதிரொலி

**சிவா** · **சிவா** Sun 27 Apr 2014 - 10:47

உத்தரப்பிரதேசம் மாநில தலைநகர் லக்னோவில் நடைபெற்ற நிகழ்ச்சியில் பேசிய யோகா குரு பாபா ராம்தேவ் காங்கிரஸ் துணைத் தலைவர் ராகுல் காந்தியை கடுமையாக தாக்கி பேசினார்.

’உல்லாசப் பயணம் மற்றும் தேன்நிலவுக்கு போவது போல் தலித் வீடுகளுக்கு ராகுல் காந்தி சென்று வருகிறார்.

ஒரு தலித் பெண்னை அவர் திருமணம் செய்து கொண்டிருந்தால் அந்த அதிர்ஷ்டத்தில் அவர் பிரதமராகி இருக்க முடியும்’ என்று ராகுல் காந்தியை அவர் நேரிடையாகவே விமர்சித்திருந்தார்.

இந்த விமர்சனத்துக்கு எதிர்ப்பு தெரிவித்த காங்கிரஸ் மூத்த தலைவர்களில் ஒருவரான திக்விஜய் சிங், ‘ராம்தேவ் பேசி இருக்கும் விதம் தலித் இன மக்களுக்கு எதிராக உள்ளது. ராம்தேவ் சொல்வதை மோடியும் பா.ஜ.க. தலைவர்களும் ஏற்றுக் கொள்கிறார்களா? என்பதை விளக்க வேண்டும்.

ராம்தேவ் பேச்சால் தலித் இன மக்கள் மிகவும் மனவேதனை அடைந்துள்ளனர். அவரது பேச்சு பிரிவினையை தூண்டுவது போல இருக்கிறது.

ராம்தேவ் தனது இந்த பொறுப்பற்ற பேச்சுக்காக வருத்தம் தெரிவிக்க வேண்டும். நாட்டில் உள்ள தலித் மக்கள் அனைவரிடமும் அவர் வெளிப்படையாக நிபந்தனையற்ற மன்னிப்பு கேட்க வேண்டும்’ என்று கூறியிருந்தார்.

இந்நிலையில், ராம்தேவ் பேச்சு அடங்கிய வீடியோ பதிவினை ஆராய்ந்த காவல்துறை, அவர் மீது தவறான அறிக்கை வெளியிட்டதாக வழக்குப்பதிவு செய்துள்ளது.

ராம்தேவ் மீது எஸ்.சி.,எஸ்.டி. சட்டத்தின்கீழ் வழக்குப்பதிவு செய்ய வேண்டும் என்றும், தேர்தல் ஆணையம் தானாக முன்வந்து விசாரிக்க வேண்டும் என்றும் மார்க்சிஸ்ட் கம்யூனிஸ்ட் வலியுறுத்தியது.

இந்நிலையில், இச்சம்பவம் தொடர்பாக மத்திய தேர்தல் கமிஷன் நேற்றிரவு ஒரு புதிய வழிகாட்டி நெறிமுறை ஆணையினை வெளியிட்டது.

பிரசாரங்களின் போது தனிப்பட்ட ஒருவரின் மீது தாக்குதல் நடத்தும் விதமாக எவ்வித நடவடிக்கையிலும் ஈடுபடக் கூடாது. அவருக்கு தீங்கு விளைவிக்கும் விதமாகவோ, அநாகரிகமான முறையிலோ எந்த கருத்தையும் பேசக் கூடாது.

தங்களது பிரசாரத்தின்போது பிற மதங்களியோ, மத உணர்வுகளையோ காயப்படுத்தும் வகையிலோ, பல்வேறு தரப்பிலான மக்களிடையே நிலவும் சமூக நல்லிணக்கம் பாதிக்கத்தக்க விதத்திலோ நிகழ்ச்சிகளை நடத்தக் கூடாது.

இந்த உத்தரவை மீறி செயல்படுபவர்கள் தேர்தலின் போது நிகழ்ச்சிகளை நடத்த அனுமதிக்கப்பட மாட்டார்கள் என்று தேர்தல் கமிஷன் அறிவித்துள்ளது.