கடல் சீற்றத்தின் பிடியில் மாமல்லபுரம் கடற்கரைக் கோயில்

**சிவா** · **சிவா** Sun Apr 27, 2014 5:20 am

சர்வதேச புராதன சின்னமாக விளங்கும் மாமல்லபுரம் கடற்கரைக் கோயில் நாளுக்கு நாள் கடல் சீற்றத்தின் பிடியில் சிக்கும் அபாய நிலை உருவாகி வருவதாக சுற்றுலாப் பயணிகளும், சமூக ஆர்வலர்களும் கவலையுடன் தெரிவிக்கின்றனர்.

உலக நாடுகளில் புராதனம் மிக்க கடற்கரை நகரம் என சிறப்புப் பெற்று யுனெஸ்கோ சர்வதேச அமைப்பால் சர்வதேச புராதன சின்னங்கள் அடங்கிய சுற்றுலா மையமாக மாமல்லபுரம் கடற்கரை கோயில் அறிவிக்கப்பட்டுள்ளது.

பல்லவ மன்னர்கள் காலத்தில் உருவாக்கப்பட்டு காலத்தினால் அழியாத பல்லவர் காலத்து சிற்பக் கலை உயிரோவியமாக நிமிர்ந்து நிற்கும் மாமல்லபுரத்து கடற்கரைக் கோயில் இன்று கடல் சீற்றத்தால் எழும் பேரலைகளால் அரிக்கப்பட்டு வரும் அபாயத்தில் சிக்கியுள்ளது.

மாமல்லபுரத்தில் பல்லவர் கால சிற்பக் கலை ஓவியமாக சுற்றுலாப் பயணிகளின் கவனத்தை அப்படியே ஈர்க்கும் வகையில் ஐந்துரதம், குகைக்கோயில், வெண்ணெய் உருட்டை பாறை, அர்ச்சுனன் தபசு, கடற்கரை கோயில் உள்ளிட்ட சிற்பங்கள் திகழ்ந்து வருகின்றன.

இதில் கடற்கரைக் கோயிலாக ஏழு கடற்கரைக் கோயில்கள் வரலாற்றில் கூறப்பட்டுள்ளன. இதில் 6 கோயில்கள் கடலில் மூழ்கி விட்டதாகவும், ஒரே ஒரு கோயில் மட்டும் உயிரோவியமாக திகழ்ந்து வருகிறது.

ஆனால் இந்த கடற்கரை கோயிலை கடல் அலைகளின் சீற்றத்திலிருந்து பாதுகாக்க கடற்கரைக் கோயிலைச் சுற்றி பல ஆண்டுகளுக்கு முன்பு கல் பாறைகள் போடப்பட்டிருந்தன.

அதையும் மீறி கடல் அலைகள் கடற்கரைக் கோயிலைச் சுற்றி வந்து பெரும் புராதன சின்னமாக நிமிர்ந்து நிற்கும் கோயிலை தனது பிடிக்குள் சிக்க வைக்கும் போராட்டத்தை தொடங்கியுள்ளது.

கடல்சீற்றம் காரணமாக கடற்கரை கோயில் அருகில் செல்லவே சுற்றுலாப் பயணிகள் அச்சப்பட்டு, தொலைவில் இருந்தே ரசித்துவிட்டு செல்லும் சூழ்நிலைக்கு தள்ளப்பட்டுள்ளனர்.

ஏற்கெனவே பருவமழையின் கடல் சீற்றத்தில் கடற்கரை கோயிலைச் சுற்றி 300 மீட்டர் தூரத்தில் தடுப்பு வேலி போட்டிருந்தாலும் அதையும் மீறி பலமுறை கடல் நீர் உட்புகுந்துள்ளது.

கடற்கரை கோயிலை தனது கட்டுப்பாட்டுக்குள் வைத்திருக்கும் இந்திய தொல்பொருள் பாதுகாப்புத் துறையின் கட்டுப்பாட்டை மக்கள் மீற முடியாது. ஆனால் இயற்கையால் முடியும்.

தொல்பொருள் துறையினர் ஒவ்வொரு ஆண்டும் கடல் காற்றில் உப்பு படிமங்களின் பிடியில் இருந்து காக்க ரசாயன பூச்சு பூசுவதைபோல் சுற்றுலாப் பயணிகளின் அச்சத்தைப் போக்கும் வகையில் வேலிகளுக்கு வெளியில் பாறைகள் உள்ளதை மேலும் உயர்த்திட உடனடியாக நடவடிக்கை மேற்கொண்டு

பல்லவர் காலத்து சிற்பக் கலையை பாதுகாக்க ஆவன செய்ய வேண்டும் என கலை ஆர்வலர்களும், சுற்றுலாப் பயணிகளும் கோரிக்கை விடுத்துள்ளனர்.

கடல் சீற்றத்தின் பிடியில் மாமல்லபுரம் கடற்கரைக் கோயில்

கடல் சீற்றத்தின் பிடியில் மாமல்லபுரம் கடற்கரைக் கோயில்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக