மாயமான மலேசிய விமானப் பயணிகளின் உறவினர்கள் ஆர்ப்பாட்டம் : தூதரகங்களை மூடியது சீனா

கடந்த மார்ச் மாதம் 8ஆம் தேதியன்று 239 பயணிகளுடன் கோலாலம்பூரிலிருந்து புறப்பட்ட எம்ஹெச்370 என்ற மலேசியன் ஏர்லைன்ஸ் விமானம் ஒரு மணி நேரத்திற்குள் ராடாரிலிருந்து மாயமாய் மறைந்தது.

இன்றுவரை அந்த விமானத்தினையும், அதன் கறுப்புப் பெட்டியையும் தேடும் பணியில் பல உலக நாடுகள் ஆஸ்திரேலியாவின் கீழ் செயல்பட்டு வரும்போதும் இதுவரை தகவல் எதுவும் கிட்டவில்லை. 50 நாட்கள் கடந்துள்ள நிலையில் இந்த விமானத்தில் பயணம் செய்த 153 சீனப் பயணிகளின் உறவினர்கள் நேற்று மாலை திடீரென அங்குள்ள மலேசிய ஏர்லைன்ஸ் நிறுவனத்தின் ஊழியர்களுடன் வாக்குவாதத்தில் ஈடுபட்டனர். அதன்பின்னர் மலேசியத் தூதரகத்தின் முன் இரவு முழுவதும் அவர்கள் ஆர்ப்பாட்டங்களில் ஈடுபட்டனர். செய்தியறிந்து அங்கு வந்த காவல்துறையினர் பாதுகாப்பு ஏற்பாடுகளைத் தொடங்கி அந்தப் பகுதிக்கான போக்குவரத்தைத் தடை செய்தனர். இந்தப் பகுதியில்தான் இந்திய, அமெரிக்கத் தூதரகங்கள் இருந்ததினால் பாதுகாப்பு கருதி இன்றும் அவை மூடப்பட்டிருந்தன.

காணாமற்போன விமானத்தைப் பற்றிய உண்மைத் தகவல்களைத் தெரிவிக்கும்படி மக்கள் மலேசியத் தூதரகத்தை முற்றுகையிடுவது இது இரண்டாவது முறையாகும். மலேசியன் ஏர்லைன்ஸ் நேற்று ஒரு அறிவிப்பினை வெளியிட்டபோது குறிப்பிட்டபடி தூதரக அதிகாரிகள் அங்கு காணப்படவில்லை என்பதே இவர்களின் கோபத்திற்குக் காரணமாகும்.

இதற்கு முன்னர் மலேசியப் பிரதமர் நஜிப் ரஜாக் எந்தவித தகவல்களும் இல்லாமல் விமானம் தெற்கு இந்தியப் பெருங்கடலில் விழுந்துவிட்டது என்று அறிவித்தபோதும் அவர்கள் மலேசிய அதிகாரிகளை முற்றுகையிட்டனர். இத்தகைய எதிர்ப்புகளுக்கு சீன அதிகாரிகள் அனுமதி அளிப்பதுவும் அங்கு மிகவும் அரிதாக நடைபெறும் ஒரு சம்பவமாகும்.

அமெரிக்க அதிபர் பாரக் ஒபாமா தனது ஆசிய சுற்றுப்பயணத்தைத் துவக்கியுள்ள நிலையில் இந்தப் போராட்டம் நடைபெற்றுள்ளது. இந்த வார இறுதியில் கோலாலம்பூருக்கு வருகை தரும் இவரே மலேசியாவிற்கு வருகை தரும் முதல் அமெரிக்க அதிபர் ஆவார். மேலும் தென் சீனக் கடல் மீதான உரிமைகள் குறித்து ஏற்கனவே சீனாவும், மலேசியாவும் பிரச்சினைகளில் ஈடுபட்டுள்ளன. இவற்றுடன் பிலிப்பைன்ஸ், வியட்நாம் மற்றும் புருனே ஆகிய நாடுகளும் இந்தப் பிரச்சினையில் இணைந்துள்ளதாகத் தகவல்கள் குறிப்பிடுகின்றன.