வாக்கு எண்ணிக்கை மே 16: முதல் ரவுண்டு முடிவுகள் காலை 9 மணிக்கு தெரியும்

சென்னை: தமிழகத்தில் உள்ள 42 மையங்களில் மே 16ம் தேதி காலை 8 மணிக்கு வாக்கு எண்ணிக்கை நடைபெறும். ஒவ்வொரு அறையிலும் 14 மேஜைகள் போடப்பட்டு வாக்கு எண்ணிக்கை நடைபெறும். முதல் ரவுண்டு முடிவு காலை 9 மணிக்கு தெரியவரும் என்று தலைமை தேர்தல் அதிகாரி பிரவீன்குமார் கூறினார். தமிழகத்தில் 39 நாடாளு மன்ற தொகுதிகளுக்கான வாக்குப்பதிவு நேற்று முன்தினம் முடிவடைந்தது. தேர்தல் முடிந்ததும், மின்னணு வாக்கு இயந்திரங்களுக்கு வேட்பாளர்களின் ஏஜென்டுகள் முன்னிலையில் சீல் வைக்கப்பட்டு 42 மையங்களில் பாதுகாப்பாக வைக்கப்பட்டுள்ளது. தமிழகத்தில் 39 தொகுதிக்கும் தேர்தல் வாக்குப்பதிவு முடிந்தாலும், 3 வாரங்களுக்கு பிறகுதான் அதாவது மே 16ம் தேதிதான் வாக்கு எண்ணிக்கை நடைபெற உள்ளது. அதுவரை மின்னணு ஒட்டுப்பெட்டிகளை பாதுகாப்பு அறையில் (ஸ்டிராங் ரூம்) வைத்து பாதுகாக்கப்படும். அந்த அறையில் உள்ள ஜன்னல்கள் எல்லாம் சீல் வைக்கப்பட்டு, ஒரு வழி (கதவு) மட்டுமே இருக்கும்.

அந்த கதவும் இரண்டு பூட்டு போட்டு சீல் வைக்கப்பட்டுள்ளது. அந்த அறையை சுற்றி மத்திய போலீஸ் பாதுகாப்பு போடப்பட்டுள்ளது. 24 மணி நேரமும் கண்காணிப்பு கேமரா மூலம் கண்காணிக்கப்படும். ஓட்டுப்பெட்டி அறை அருகே ஒவ்வொரு வேட்பாளரின் சார்பில் ஒரு ஏஜென்ட் இருக்க அனுமதிக்கப்படுவர். ஓட்டுப்பெட்டி அறைக்கு கலெக்டர் உள்பட தேர்தல் அதிகாரிகள் யார் வந்தாலும் வீடியோவில் பதிவு செய்யப்பட்டு, கையெழுத்து போட்ட பிறகு உள்ளே செல்ல முடியும். 2வது, 3வது அடுக்கு பாதுகாப்பில் மாநில போலீசார் ஈடுபடுத்தப்படுவார்கள். அந்த அறைக்கு தடையில்லா மின்சாரம் வழங்கப்படும். இது குறித்து தமிழக தலைமை தேர்தல் அதிகாரி பிரவீன்குமார் கூறியதாவது: தமிழகத்தில் 39 தொகுதிகளில் பதிவான வாக்குகள் அனைத்தும் 42 மையங்களில் பாதுகாப்பாக வைக்கப்பட்டுள்ளது. மே 16ம் தேதி காலை 8 மணிக்கு தமிழகம் உள்பட இந்தியா முழுவதும் வாக்கு எண்ணிக்கை தொடங்கும்.

தமிழகத்தில் ஒவ்வொரு 6 சட்டமன்ற தொகுதிகள் அடங்கியதுதான் ஒரு எம்பி தொகுதியாகும். அதன்படி ஒவ்வொரு எம்பி தொகுதியிலும் பதிவான ஓட்டுக்கள், வாக்கு எண்ணும் மையங்களில் 6 அறைகளில் வைத்து எண்ணப்படும். சிறிய மையங்களாக இருந்தால் இரண்டு மையங்களில் மூன்று, மூன்று அறைகளில் வைத்து எண்ணப்படும்.

ஒவ்வொரு அறையிலும் 14 மேஜைகள் போடப்பட்டு இருக்கும். ஒரு மேஜையில் ஒரு கவுண்டிங் சூப்பர்வைசர், ஒரு உதவி கவுண்டிங் சூப்பர்வைசர், ஒரு மைக்ரோ அப்சர்வர், ஒரு உதவியாளர் என 4 பேர் இருப்பார்கள். இதே போன்று 14 மேஜைகளிலும் தனித்தனியாக 4 பேர் இருப்பார்கள். இதுதவிர, வாக்கு எண்ணிக்கை நடைபெறும் அறையில் ஒரு தேர்தல் அதிகாரி, மைக்ரோ அப்சர்வர், கம்ப்யூட்டர் ஆபரேட்டர், பேப்பரில் தேர்தல் விவரங்களை பதிவு செய்யும் ஊழியர், உதவியாளர் உள்பட 5 பேர் இருப்பார்கள்.

மே 16ம் தேதி காலை 8 மணிக்கு வாக்கு எண்ணிக்கை தொடங்கியதும், முதலில் தபால் ஓட்டுக்கள் எண்ணப்படும்.

இதையடுத்து காலை 8.30 மணிக்கு 14 மேஜைகளுக்கும் துப்பாக்கி போலீஸ் பாதுகாப்போடு மின்னணு வாக்குப்பதிவு இயந்திரங்கள் எடுத்து வந்து வேட்பாளர்கள், ஏஜென்டுகள் முன்னிலையில் வாக்கு எண்ணிக்கை தொடங்கும். 14 மேஜைகளிலும் ஒரு ரவுண்டு முடிந்து, முடிவுகள் அறிவிக்கப்பட்ட பிறகுதான் இரண்டாவது ரவுண்டு வாக்கு எண்ணிக்கை தொடங்கும். வேட்பாளர்கள் மற்றும் வாக்குப்பதிவு மையங்கள் அதிகளவில் உள்ளதால் இந்த முறை வாக்கு எண்ணிக்கையின் முடிவு தாமதமாகும். காலை 9 மணிக்கு மேல்தான் முதல் ரவுண்டு முடிவுகள் தெரிய வாய்ப்புள்ளது. ஒரு தொகுதியில் உள்ள வாக்குகள் அனைத்தையும் எண்ணி முடித்து, அறிவிப்பு வெளியிட மாலை 6 மணிக்கு மேல் கூட ஆகலாம். வாக்கு எண்ணிக்கையை பார்வையிட வேட்பாளர்கள், வேட்பாளர்களின் ஏஜென்ட்கள் உள்ளே வர அனுமதிக்கப்படுவார்கள். வேட்பாளர்கள், ஏஜென்ட்கள், தேர்தல் அதிகாரிகள் உள்ளிட்ட யாரும் வாக்கு எண்ணிக்கை நடைபெறும் வளாகத்துக்குள் செல்போன் எடுத்து வர அனுமதி இல்லை.
இவ்வாறு பிரவீன்குமார் கூறினார்.

தேர்தல் பாதுகாப்பு போலீசாருக்கு பிரவீன்குமார் பாராட்டு

தேர்தல் பாதுகாப்பு பணியை மேற்கொண்ட டிஜிபி, போலீஸ் கமிஷனர், மாவட்ட எஸ்பிக்களுக்கு தமிழக தலைமை தேர்தல் அதிகாரி பிரவீன்குமார் பாராட்டு தெரிவித்துள்ளார். நாடாளுமன்ற தேர்தல் தமிழகத்தில் நேற்று முன்தினம் ஒரே கட்டமாக நடைபெற்று முடிந்து விட்டது. வாக்கு பதிவிற்காக தமிழகத்தில் 60,818 வாக்குச் சாவடிகள் அமைக்கப்பட்டிருந்தன. மத்திய ஆயுத பாதுகாப்பு படையினர், அதிரடிப்படையினர், காவல் துறையினர், காவல் துறையினர் அல்லாதவர்கள் என மொத்தம் 1 லட்சத்து 43,000 பேர் தேர்தல் பணியில் ஈடுபட்டிருந்தனர்.

சென்னையை பொருத்தவரை 6,663 வாக்குச் சாவடிகளில் 455 வாக்குச் சாவடிகள் பதட்டமானவை என கண்டறியப்பட்டிருந்தது. சென்னையில் மொத்தம் 23,850 பேர் பாதுகாப்பு பணியில் ஈடுபடுத்தப்பட்டனர். இந்நிலையில், தமிழக தலைமை தேர்தல் அதிகாரி பிரவீன்குமார் நேற்று தமிழக போலீஸ் டிஜிபி அனூப் ஜெய்ஸ்வால், சென்னை கமிஷனர் திரிபாதி மற்றும் மாநகர கமிஷனர்கள், மாவட்ட எஸ்பிக்கள் அனைவருக்கும் ஒரு சுற்றறிக்கை அனுப்பினார்.

அதில், தேர்தல் பாதுகாப்பு பணியில் சிறப்பாக, ஒருங்கிணைப்போடு செயல்பட்ட அனைத்து போலீசாருக்கும் பாராட்டுக்களையும் நன்றியையும் தெரிவித்துக் கொள்கிறேன். பாதுகாப்பு பணி திருப்தி அளித்தது. இதே பாதுகாப்பு பணியை தேர்தல் வாக்கு எண்ணிக்கை முடியும்வரை மேற்கொள்ள வேண்டும் என்று கேட்டுக் கொள்கிறேன் என்று கூறியிருந்தார்.