தேர்தலுக்காக தமிழகம் முழுவதும் பாதுகாப்பு அதிகரிப்பு!

தமிழகத்தில் தேர்தலை அமைதியான முறையில் நடத்த ஒரு லட்சத்து 43 ஆயிரம் பேர் பாதுகாப்பு பணியில் ஈடுபடுத்தப்பட்டுள்ளனர். ஒரு லட்சத்து 16 ஆயிரம் காவல்துறையினரும், காவல்துறை அல்லாத 27 ஆயிரம் பேரும் பாதுகாப்பில் ஈடுபட்டுள்ளனர்.

மொத்தமுள்ள 60 ஆயிரத்து 818 வாக்குச்சாவடிகளில் 34 ஆயிரத்து 209 காவலர்கள் மற்றும் ஓய்வு பெற்ற காவலர்கள், முன்னாள் ராணுவத்தினர் உள்ளிட்ட 26 ஆயிரத்து 609 பேரும் பாதுகாப்பு பணியில் உள்ளனர். இதுதவிர பதற்றம் நிறைந்த வாக்குச்சாவடிகளில் கூடுதலாக 5 ஆயிரம் காவல்துறையினர் நியமிக்கப்பட்டுள்ளனர்.

பதற்றமான வாக்குச்சாவடிகளில் நுண் பார்வையாளர்களை நியமித்து வலைதள புகைப்படக் கருவி மூலம் கண்காணிக்க ஏற்பாடுகள் செய்யப்பட்டுள்ளன. வாக்குச்சாவடிகளுக்கு மின்னணு வாக்கு இயந்திரங்களை எடுத்துச் செல்வதற்கும், வாக்குப்பதிவு முடிந்தபின் அவற்றை வாக்கு எண்ணிக்கை மையங்களுக்கு எடுத்துச்செல்லவும் 14 ஆயிரம் மத்திய காவல் படையினர் பணி அமர்த்தப்பட்டுள்ளனர்.

இதேபோல் வாக்குப்பதிவு இயந்திரங்கள் வைக்கப்பட்டுள்ள இருப்பறைகளும், வாக்கு எண்ணும் மையங்களிலும் பாதுகாப்பு பலப்படுத்தப்பட்டுள்ளது. அரசியல் கட்சிகள் வாக்காளர்களுக்கு பணம் பட்டுவாடா செய்வதை தடுக்க தீவிர நடவடிக்கைகள் எடுக்கப்பட்டுள்ளன.

கூடுதலாக 189 பறக்கும் படைகள் அமைகக்ப்பட்டுள்ளதுடன், 24 மணி நேரமும் தேர்தல் அதிகாரிகள் கண்காணிப்பு பணியில் ஈடுபட்டு வருகின்றனர். இதனிடையே சென்னை மாநகர காவல்துறைக்கு உட்பட்ட நான்கு மண்டலங்களிலும், துணை ராணுவப்படையினர் மற்றும் காவல்துறையினரின் கொடி அணி வகுப்பு நடத்தப்பட்டது.