நாடு முழுவதும் பயணம் செய்யும் 2.1 லட்சம் பாதுகாப்பு படையினர்

மக்களவை தேர்தலை வெற்றிகரமாக நடத்த நாடு முழுவதும் பல்வேறு பகுதியிலிருந்து 2.1 லட்சம் பாதுகாப்பு வீரர்கள் மாநிலம் மாநிலமாக சுற்றிக் கொண்டிருக்கிறார்கள். போர் சமயத்துக்கு ஈடாக, உள்நாட்டிலேயே பாதுகாப்பு பணியாற்றி வருகின்றனர். அப்படிப்பட்ட பாதுகாப்பு படை வீரர்களின் செயல்பாடுகளை இங்கே பார்ப்போம்...

தேர்தல் ஆணையம், உள்துறை அமைச்சகம், துணை ராணுவப் படை இணைந்து பாதுகாப்பு பணியை ஒருங்கிணைத்து வருகிறது. மத்திய ரிசர்வ் பாதுகாப்பு படை, எல்லை பாதுகாப்பு படை, மத்திய தொழில் பாதுகாப்பு படை, இந்திய-திபெத் எல்லை பாதுகாப்பு படை உள்ளிட்ட படைகளை சேர்ந்த 2.1 லட்சம் பாதுகாப்பு படை வீரர்கள் களத்தில் குதித்துள்ளனர்.

முந்தைய காலங்களில், மாநிலம் மாநிலமாக பாதுகாப்பு படை வீரர்கள் அனுப்பப்பட்டதால் நேர விரயமும், வீரர்கள் சோர்வடையும் நிலையும் இருந்தது. இதனால், இம்முறை தனி தனி குழுவாக பிரிக்கப்பட்டுள்ளனர். காஷ்மீர், தென் இந்தியா, உ.பி.,-பீகார்-மேற்கு வங்கம், வடகிழக்கு, நக்சல் பகுதி என 5 பிரிவாக பிரிக்கப்பட்டு வீரர்கள் பணியாற்றி வருகின்றனர். காஷ்மீரில் 5 கட்டமாக தேர்தல் நடக்கிறது. அங்கு பணியமர்த்தப்பட்டுள்ள பாதுகாப்பு படையினர் காஷ்மீரில் மட்டுமே பாதுகாப்பு பணியில் ஈடுபட்டு வருகின்றனர்.

தென் இந்திய பிரிவு பாதுகாப்பு படை வீரர்கள், கேரளா மகாராஷ்டிரா, கர்நாடகா, தமிழ்நாடு, தெலங்கானா, ஒடிசா, சீமாந்திரா பகுதிகளில் பயணம் செய்து பாதுகாப்பு பணியில் ஈடுபட்டு வருகின்றனர். இம்முறை வீரர்கள் அதிகபட்சம் 500-600 கிமீ தூரம் மட்டுமே பயணம் செய்து வருகின்றனர். இதனால் வீரர்கள் சோர்வடையும் நிலை ஏற்படாது. மேலும், 300 கி.மீக்கு உட்பட பகுதிகளுக்கு பஸ், லாரி மூலமாகவும், 300க்கும் அதிகமான கி.மீ. தொலைவுக்கு ரயில் மூலமாகவும் சென்று வருகின்றனர். மலைப்பிரதேசம் போன்ற பகுதிகளில் வீரர்களை அனுப்புவதற்காக ஹெலிகாப்டர்கள் பயன்படுத்தப்படுகின்றன.

இதற்காக தேர்தல் ஆணையம், 100 ரயில்களையும், 21 ஹெலிகாப்டர்களையும், 10,500 வாகனங்களையும் வாடகைக்கு எடுத்துள்ளது. ஒவ்வொரு மாநில போலீசாரும் சேர்த்த மொத்தம் 55 லட்சம் பேர் பாதுகாப்பு பணியில் ஈடுபடுத்தப்பட்டு வருகிறார்கள். இது குறித்து பாதுகாப்பு படை உயர் அதிகாரிகள் கூறுகையில், ‘மக்களவை தேர்தல் பாதுகாப்பு பணியில் பாதுகாப்பு படை வீரர்கள் பல்வேறு சவால்களை சந்தித்து வருகின்றனர். வாகனங்கள் செல்ல முடியாத மலைப் பிரதேசங்களில் கழுதைகளிலும், பாலைவன பகுதிகளில் ஓட்டகங்களிலும் சென்று வருகின்றனர்.

இரவு பகலாக தொடர்ந்து பாதுகாப்பு பணியில் ஈடுபட்டு பின்னர் ஓய்வின்றி பயணமும் செய்து வருகிறார்கள். நக்சல் பாதிப்பு அதிகம் பகுதிகளில் வீரர்கள் குவிக்கப்பட்டிருக்கிறார்கள்’ என்கின்றனர். அந்தமான் போன்ற தீவுகளில் படகுகளிலும் சென்று பாதுகாப்பு ஏற்பாடுகளை கவனித்து வருகின்றனர். இத்தகைய பாதுகாப்பு பணிகள் சரியான முறையில் கடைபிடிக்கப்பட்டு வருவதால், எந்த அச்சுறுத்தலும் இல்லாமல் பொது தேர்தல் நடக்கிறது. வாக்கு எண்ணிக்கையும் கணிசமாக அதிகரித்திருப்பதும் குறிப்பிடத்தக்கது.

செலவு எவ்வளவு?

பாதுகாப்பு படை வீரர்களின் பயணத்துக்கு ரூ.100 கோடி.
ரயில் பயணத்துக்கு மட்டுமே செலவு ரூ.25 கோடி.
வாகனங்கள், ஹெலிகாப்டரின் வாடகையாக செலவு தினசரி ரூ.1.5 கோடி.

[thanks] தினகரன் [/thanks]