அதிமுகவில் இணைந்தார் திமுக எம்.பி. ஜே.கே.ரித்தீஷ்

திமுக ராமநாதபுரம் எம்.பி.யும், அழகிரியின் ஆதரவாளருமான ஜே.கே.ரித்தீஷ் இன்று தமிழக முதல்வர் ஜெயலலிதா முன்னிலையில் அதிமுகவில் இணைந்தார்.

அவருடன், ராமநாதபுரம் மாவட்டம் திமுக மாணவர் அணி துணை அமைப்பாளர் கே.நாகநாதசேதுபதியும் அதிமுகவில் இணைந்தார்.

சென்னை போயஸ் கார்டனில் உள்ள முதல்வர் இல்லத்தில் நடந்த சந்திப்பின்போது, ரித்தீஷ், நாகநாத சேதுபதி இருவருக்கும் முதல்வர் ஜெயலலிதா அதிமுக அடிப்படை உறுப்பினர் அடையாள அட்டைகளை வழங்கினார்.

திமுகவில் இருந்து மு.க.அழகிரி நிரந்தரமாக நீக்கப்பட்ட பின்னர், அழகிரியை சந்தித்து தனது ஆதரவை தெரிவித்திருந்தார் ரித்தீஷ் என்பது குறிப்பிடத்தக்கது.

ரித்தீஷ் பேட்டி

அதிமுகவில் இணைந்த பின்னர் செய்தியாளர்களிடம் பேசிய ஜே.கே.ரித்தீஷ், "தமிழகம் முழுவதும் அதிமுகவுக்கு ஆதரவாக பிரச்சாரம் மேற்கொள்ள உள்ளேன். திமுகவை அழிக்கும் வேலையை மு.க.ஸ்டாலின் செய்து வருகிறார். ஒரு நாள் கருணாநிதியை அவர் வெளியேற்றுவார். திமுகவை அழிக்கும் சகுனியாகவே மு.க.ஸ்டாலின் செயல்படுகிறார். திமுகவில் அவருடைய ஆதரவாளருக்கே முக்கியத்துவம் அளிக்கப்படுகிறது.

மு.க.அழகிரியிடம் சொல்லிவிட்டு தான் நான் அதிமுகவில் இணைந்துள்ளேன். நாடாளுமன்றத் தேர்தலில் தி.மு.கவுக்கு ஒரு இடம் கூட கிடைக்காது" என்றார் ரித்தீஷ்.

கடந்த நாடாளுமன்றத் தேர்தலில் திமுக சார்பில் போட்டியிட்டு வெற்றி பெற்றவர் ஜே.கே. ரித்தீஷ். இவர் மு.க.அழகிரியின் தீவிர ஆதரவாளராக செயல்பட்டார்.

கட்சி விரோத நடவடிக்கையில் ஈடுபட்டதாக கூறி திமுகவில் இருந்து அழகிரி நீக்கப்பட்ட பிறகு அவருடன் ரித்தீஷும் இணைந்து நிகழ்ச்சிகளில் பங்கேற்றார். இதையடுத்து, அவரிடம் விளக்கம் கேட்டு திமுக தலைமை நோட்டீஸ் அனுப்பியது குறிப்பிடத்தக்கது.

என்ன தனது கட்சியின் பெயர் முன்பு இப்போது அ சேர்ந்திருக்கிறது ஆனால்ஆணவம் சேராமல் இருந்தால் பிழைத்து கொள்வார் ராமேஸ்வரத்தில் ஒரு அம்பானி