தமிழகத்தில் நிலத்தடி நீர்மட்டம் குறைந்தது

by **சிவா** Thu Apr 10, 2014 2:10 am

சென்னை : தமிழகத்தில், நிலத்தடி நீர் மட்டம் வெகுவாக குறைந்துள்ளதாக, அதிர்ச்சி தகவல் வெளியாகியுள்ளது.

ஆய்வு பணிகள்

சென்னையில் உள்ள, மத்திய நிலத்தடி நீர் வாரியத்தின், தென்கிழக்கு கடலோர பிராந்திய அலுவலகம், மழை பொழிவு, நிலத்தடி நீர் இருப்பு உள்ளிட்ட ஆய்வுப் பணிகளை மேற்கொள்கிறது. இந்நிறுவனம், தமிழகம் மற்றும் புதுச்சேரியில், நிலத்தடி நீர் மட்டம் குறித்து, 1,369 கிணறுகளில் ஆய்வு மேற்கொண்டது; இதில், 778 கிணறுகளும், 591 ஆழ்துளை கிணறுகளும் ஆய்விற்கு உட்படுத்தப்பட்டன.

தமிழகத்தில், 712 கிணறுகளில் மேற்கொண்ட ஆய்வில், 78 சதவீதம், அதாவது, 559 கிணறுகளின் நீர்மட்டம் குறைந்துள்ளது. அதே சமயம், 153 கிணறுகளின் நீர்மட்டம் அதிகரித்துள்ளது.

தலைநகர் சென்னையில், 13 கிணறுகளில், ஏழு கிணறுகளில் நீர்மட்டம் குறைந்தும், ஆறு கிணறுகளில் நீர்மட்டம் அதிகரித்தும் உள்ளது. இவற்றில், ஐந்து கிணறுகளில், 0 - 2 மீட்டர் நீர்மட்டம் அதிகரித்துள்ளது. ஒரு கிணற்றில், 2 - 4 மீட்டர் நீர்மட்டம் உயர்ந்துள்ளது.

அதே சமயம், ஆறு கிணறுகளில், 0 - 2 மீட்டர் நீர்மட்டம் குறைந்துள்ளது. ஒரு கிணற்றில், 2 - 4 மீட்டர் நீர்மட்டம்அதிகரித்துள்ளது. அதிகபட்சமாக, ஈரோடு மாவட்டத்தில், 68 கிணறுகளில் ஆய்வு மேற்கொள்ளப்பட்டது. இதில், 53 கிணறுகளின் நீர்மட்டம் குறைந்துள்ளது தெரிய வந்துள்ளது. கோவையில், 66 கிணறுகளில், 46 கிணறுகளில் நீர்மட்டம் குறைந்துள்ளது.

திருவண்ணாமலையில், 19 கிணறுகளில் ஆய்வுகள் மேற்கொள்ளப்பட்டன. அவற்றில் நீர்மட்டம் குறைந்துள்ளது.

அது போல், கடலுார் மாவட்டத்தில் 10, கரூர் மாவட்டத்தில் 11, நாகப்பட்டினம் மாவட்டத்தில் எட்டு கிணறுகள் ஆய்விற்கு எடுத்துக் கொள்ளப்பட்டன. அங்கு, 100 சதவீத கிணறுகளின் நீர்மட்டம் வெகுவாக குறைந்துள்ளது.

நடப்பாண்டு ஜனவரி நிலவரப்படி, தர்மபுரி, கன்னியாகுமரி, கிருஷ்ணகிரி, நீலகிரி, திருநெல்வேலி தவிர்த்து, இதர மாவட்டங்களில், மழைபொழிவு குறைந்துள்ளது.

மாநிலத்தின் கடலோரம் மற்றும் மத்திய பகுதியில், 76 சதவீத கிணறுகளின் நீர்மட்டம், 10 மீட்டருக்குள் உள்ளது.

19 சதவீத கிணறுகளில், நிலத்தடியில் இருந்து, 10 - 20 மீட்டர் வரையிலும், 5 சதவீத கிணறுகளில், 20 மீட்டருக்கு மேற்பட்ட பகுதியிலும் நீர்வளம் உள்ளது.

கடந்த ஆண்டுடன் ஒப்பிடும் போது, நடப்பாண்டு ஜனவரியில், 61 சதவீத கிணறுகளின் நீர்மட்டம் குறைந்தும், 39 சதவீத கிணறுகளின் நீர்மட்டம் அதிகரித்தும் உள்ளதாக ஆய்வில் தெரியவந்துள்ளது.

அரசு நடவடிக்கை எடுக்குமா?

கடந்த 2001ல், அ.தி.மு.க., ஆட்சியில், மழைநீர் சேகரிப்பு திட்டம் அறிமுகப்படுத்தப்பட்டு தீவிரமாக செயல்படுத்தப்பட்டது; இதன் விளைவாக, நிலத்தடி நீர்மட்டம் உயர்ந்தது. ஆனால், அதன்பின் வந்த, தி.மு.க., ஆட்சியில், அதிகாரிகளின் அலட்சியத்தால் இத்திட்டத்தில் தொய்வு ஏற்பட்டது.

இதன் விளைவாக, தற்போது தமிழகத்தில், நிலத்தடி நீர் வளம் குறைந்துள்ளது. மேலும், தனியார் நிறுவனங்கள், நிலத்தடி நீரை உறிஞ்சி, வர்த்தக ரீதியில் கொள்ளை லாபம் பார்த்து வருகின்றன. இந்நிலையில், நிலத்தடி நீர் வளத்தை காப்பது, இப்போதைய மாநில அரசின் கையில் தான் உள்ளது.

தினமலர்

by **T.N.Balasubramanian** Thu Apr 10, 2014 8:07 am

Quote
"இதன் விளைவாக, தற்போது தமிழகத்தில், நிலத்தடி நீர் வளம் குறைந்துள்ளது. மேலும், தனியார் நிறுவனங்கள், நிலத்தடி நீரை உறிஞ்சி, வர்த்தக ரீதியில் கொள்ளை லாபம் பார்த்து வருகின்றன. இந்நிலையில், நிலத்தடி நீர் வளத்தை காப்பது, இப்போதைய மாநில அரசின் கையில் தான் உள்ளது.

தினமலர்"

ஏற்கனவே எழுதிய பின்னூட்டம் இதற்கும் பொருந்தும்

"Re: பருவநிலை மாற்றத்தால் வெடிக்கப் போகிறது போர்?
Post by T.N.Balasubramanian Yesterday at 9:03 pm

நிலத்தடி நீரை போட்டிபோட்டு உறிஞ்சிடும் அந்நிய குளிர்பான/குடிநீர் கம்பனிகள் , வாங்குவதை வாங்கிக்கொண்டு அதை காணாமல் இருக்கும் அரசியல் கட்சிகள், கண்டுகொண்டே அதற்கு பிரதிநிதிகளாக இருக்கும் விளையாட்டு வீரர்கள் , நடிக நடிகைகள் யாவரும்
தேசத் துரோகிகள்.
தேசத்து ரோகிகள்.

ரமணியன்

தமிழகத்தில் நிலத்தடி நீர்மட்டம் குறைந்தது

தமிழகத்தில் நிலத்தடி நீர்மட்டம் குறைந்தது

Re: தமிழகத்தில் நிலத்தடி நீர்மட்டம் குறைந்தது