காலில் "வடு' வந்த கதை!

[You must be registered and logged in to see this image.]

சோழப் பேரரசு பல சிற்றரசுகளைக் கொண்டது. சிற்றரசர்கள் சோழனுக்குக் கப்பம் கட்டி அமைதியோடு வாழ்ந்து வந்தனர். சோழன் குறித்த நாளில் கப்பம் செலுத்தி அவன் திருவடியில் முடி தாழ்த்தி வணங்கினர்.

நேற்றும் இதுபோல் பல சிற்றரசர்கள் வந்தனர். இன்றும் பல மன்னர்கள் வணங்கித் திரை செலுத்தினர். சிற்றரசர்களின் முடிகள் உராய்ந்த காரணத்தால், மன்னர் மன்னனின் திருவடி புண்ணாகிவிட்டது. அப்புண் இன்னும் ஆறவில்லை. எனவே, சிற்றரசர்கள் பொறுமையாக வரிசையில் வந்து வணங்குங்கள் என்று அமைச்சர் கூறுவதாக புலவர் ஒருவர் பாடியுள்ளார்.

"நின்றீமின் மன்னீர் நெருநல்
திறைகொணர்ந்து
முன்தந்த மன்னர் முடிதாக்க - இன்றும்
திருந்தடி புண்ணாகிச் செவ்வி இலனே
பெருந்தண் உறந்தையார் கோ''

என்னும் முத்தொள்ளாயிரப் பாடல் (47) விளக்குகிறது. இதைப் போலவே ஒரு காட்சியைக் குமரகுருபரர், மீனாட்சியம்மைப் பிள்ளைத் தமிழில் சுட்டிக் காட்டியுள்ளார். அது அம்மையின் காலில் வடுவந்த கதை!

ஊசற் பருவத்தில் மீனாட்சியம்மை ஊஞ்சலில் அமர்ந்து ஆடுகிறாள். ஊஞ்சலின் இரு பக்கங்களிலும் இலக்குமி ஒரு பக்கமும், வாணி ஒரு பக்கமும் நின்று அம்மையை ஊசலாட்டுகிறார்கள். அப்போது மீனாட்சியம்மையின் திருவடிகளில் பிறையழுந்திய தழும்பு கண்டு இலக்குமி, அதனை வாணிக்குக் காட்டி, "வலம்புரிக் கீற்று' இதுபார் எனக் கேலி செய்கிறாள். அதனைப் புரிந்துகொண்ட மீனாட்சியம்மை நாணித் தலை கவிழ்கிறாள். இதன் உட்பொருள் யாது? அம்மையின் காலில் வடுவந்தது எப்படி?

ஊடற் காலத்தில் சிவபெருமான் முடி அம்மையின் அடியிற்படியும். அச்சமயத்தில் முடிமேல் அணிந்துள்ள பிறைக்கோடும் அழுந்தும். இவ்வாறு பலகாலம் சிவபெருமான் பணிந்து ஊடலைத் தணிக்கும் பொழுது எல்லாப் பிறைக்கோடும் அழுந்தி அழுந்தி சிவந்து அம்மையின் காலில் வடுவானதாம்.

அத்தழும்பைத்தான் திருமகள் "வலம்புரிக் கீற்று' என்று கூறி வாணிக்குக் காட்டி கேலி செய்கிறாள் (பாடல் 8). உலகியலில் நிகழும் ஊடலையும் கூடலையும் உணர்ந்து அதனை அம்மைக்கும் அப்பனுக்கும் கற்பித்து இவ்வாறு புதுமை செய்திருக்கிறார் குமரகுருபரர். (தினமணி)