ஜெ., குவித்த சொத்து 3,300 ஏக்கர்தான் ; கோர்ட்டில் அரசு வக்கீல் தெரிவிப்பு

**சிவா** · **சிவா** Mon Mar 24, 2014 5:46 pm

பெங்களூரூ: தமிழக முதல்வர் ஜெ., சொத்துக்குவிப்பு வழக்கில் ஜெ., சசி, இளவரசி,மற்றும் பினாமிகள் பெயரில் தமிழகம், ஆந்திரா (ஐதராபாத்) உள்ளிட்ட பகுதிகளில் சுமார் 3 ஆயிரத்து 300 ஏக்கர் வரை நிலங்களை வாங்கி குவித்துள்ளார் என்று பெங்களூரூ சிறப்பு கோர்ட்டில் அரசு வக்கீல் பவானிசிங் கூறினார். இதன் மொத்த மதிப்பு பல ஆயிரம் கோடி ரூபாய் இருக்கும் என மதிப்பிடப்படுகிறது.

முதல்வராக இருந்த காலத்தில் ஜெ., சொத்துக்குவித்ததாக தி.மு.க., ஆட்சி காலத்தில் வழக்கு தொடரப்பட்டது. இந்த வழக்கின் இறுதி விவாதம் கடந்த ஒரு வாரகாலமாக பெங்களூரூ சிறப்பு கோர்ட் நீதிபதி குன்ஹா முன்னிலையில் நடந்து வருகிறது.

இன்று அரசு வக்கீல் தனது இறுதி வாதத்தின்போது அவர் கூறியிருப்பதாவது: ஜெ., சசி, இளவரசி மற்றும் அவர்கள் நடத்திய நிறுவனங்கள் சசி என்டர்பிரைசஸ், ரெவரே அக்ரோபார்ம், ஜெயா பப்ளிகேஷன்ஸ் மற்றும் ஜெயா டி,வி., பெயரில் சொத்துக்கள் வாங்கியுள்ளார். முதலில் இவர்கள் பெயரில் வாங்கப்பட்டு பல சொத்துக்கள் இந்தந்த நிறுவனங்களுக்கு வழங்கப்பட்டுள்ளது. சொத்துக்கள் பட்டியல் விவரம் வருமாறு:

1. சென்னை அருகே வாலாஜாபாத்தில் 600 ஏக்கர்,

2. சிறுதாவூரில் 25 ஏக்கர் அளவில் ஒரு பங்களா.

3. நீலாங்கரை 2 ஏக்கர்.

4. கொடநாட்டில் 800 ஏக்கர் மற்றும் பங்களாக்கள். ( இங்கு ஒரு ஏக்கர் ரூ. 5 கோடி மதிப்பு இருக்கும் இதுவே 4 ஆயிரம் கோடியை தாண்டுகிறது இது ஒரு உத்தேச மதிப்புதான் ).

5. காஞ்சிபுரத்தில் 200 ஏக்கர்.

6. கன்னியாகுமரியில் மீனங்குளம், சிவரங்குளம், வெள்ளங்குளம் பகுதியில் ஆயிரத்து 190 ஏக்கர்.

6. தூத்துக்குடி மாவட்டம் ஸ்ரீவைகுண்டம் பகுதியில் 200 ஏக்கர்.

7. ரெவரே அக்ரோ பார்ம் பெயரில் 100 ஏக்கர்

8. 30 எண்ணத்தில் பலவித கார்கள், டிரக்கர்கள்

9. ஐதராபாத்தில் திராட்சை தோட்டம்.

குவித்த நகைகள் மற்றும்... ?

ஒரு ரூபாய் சம்பளம் வாங்கிய முதல்வர் எப்படி இவ்வளவு சொத்து சேர்க்க முடியும் என்று கேள்வியை நீதிபதி முன்பு வைத்தார். இதன் தொடர்ச்சியான விவாதம் நாளையும் ( செவ்வாய்க்கிழமை) தொடர்கிறது. இதில் ஜெ., குவித்த நகைகள் மற்றும் ரொக்கப்பணம் கோர்ட்டில் தாக்கல் தெரிவிக்கப்படும்.

தினமலர்