சிறுதானிய சமையல்

**சிவா** · **சிவா** Sat Mar 08, 2014 12:07 am

சோளப் பாயசம்

தேவையானப் பொருட்கள்:

நாட்டுச் சோளம் - 2 கப்
பார்லி - 2 டீஸ்பூன்
ஏலக்காய்த்தூள்- கால் டீஸ்பூன்
கேசரி பவுடர் - சிறிதளவு
பனை சர்க்கரை - தேவைக்கேற்ப

செய்முறை:

நாட்டுச் சோளம் மற்றும் பார்லியை தனித்தனியாக 2 மணி நேரம் ஊறவைத்து, நீர் சேர்த்து மாவு போன்ற பதத்துக்கு அரைக்கவும். பிறகு, அரைத்த பார்லி மற்றும் நாட்டுச் சோளத்தை, பெரிய கண்ணுள்ள வடிகட்டியில் வடிகட்டினால், அதிலுள்ள சக்கைகள் நீங்கி விடும். பிறகு அந்தக் கலவையில் பனை சர்க்கரை மற்றும் ஏலக்காய்த்தூள் சேர்த்து, நன்கு கொதிக்க வைக்கவும். கேசரி பவுடர் சேர்த்து, திரவ நிலை அடைந்தவுடன் இறக்கி, சூடாகப் பரிமாறவும்.

**சிவா** · **சிவா** Sat Mar 08, 2014 12:07 am

கேழ்வரகு (ராகி) பகோடா

தேவையானப் பொருட்கள்:

கடலை மாவு - அரை கப்
கேழ்வரகு மாவு - ஒரு கப்
மிளகாய்த் தூள் - அரை டீஸ்பூன்
எண்ணெய், நெய் - தேவையான அளவு
கறிவேப்பிலை, கொத்தமல்லி, முட்டைகோஸ் - 2 கப்
தேவையான அளவு வெங்காயம், பச்சைமிளகாய்
உப்பு - தேவையான அளவு

செய்முறை:

கடலை மாவு, கேழ்வரகு மாவு, மிளகாய்த்தூள், உப்பு, நெய், நறுக்கி வைத்த கறிவேப்பிலை, கொத்தமல்லி, முட்டைகோஸ் உடன் சிறிது நீர் சேர்த்து பிசைந்து கொள்ளவும். இதனுடன் வெங்காயம் மற்றும் பச்சை மிளகாயை நறுக்கி, சேர்த்துக் கலக்கவும். பிறகு, கொதிக்கும் எண்ணெயில் போட்டு, பொன்நிறம் வரும்வரை பொரித்தெடுத்தால்... ராகி பகோடா ரெடி.

**சிவா** · **சிவா** Sat Mar 08, 2014 12:08 am

கம்பு ஸ்வீட் பால்ஸ்

தேவையான பொருட்கள்:

கம்பு - ஒரு கப்
தூளாக்கிய வெல்லம் - ஒரு கப்
தேங்காய் துருவல் - கால் கப்

செய்முறை:

கம்பை சுத்தம் செய்து வெறும் வாணலியில் சிவக்க வறுத்து நைஸாக அரைக்கவும் (பவுடராக). துருவிய அச்சு வெல்லம், துருவிய தேங்காய் ஆகியவற்றை மாவுடன் சேர்த்து தேவையான அளவு நீர் விட்டு கெட்டியான உருண்டைகளாகப் பிடிக்கவும். கம்பை மொத்தமாக மெஷினில் கொடுத்து அரைத்து வைத்துக் கொண்டால், தேவையான போது செய்து சாப்பிடலாம். கம்பு ஸ்வீட் பால்ஸை காலை உணவாகவும் சாப்பிடலாம். தேநீர் இடைவேளையிலும் சாப்பிடலாம். பெரியோர்கள், சிறியோர்கள், பல் இல்லாதவர்கள் ஆகிய எல்லோரும் இந்த சத்தான பால்ஸை சுவைக்கலாம்.

**சிவா** · **சிவா** Sat Mar 08, 2014 12:10 am

ராகி வெஜ் ஆம்லெட்

தேவையான பொருட்கள்:
கேழ்வரகு மாவு - 2 கப்
பொடியாக நறுக்கிய கோஸ், கேரட், பீன்ஸ் எல்லாமாக சேர்ந்து - ஒரு கப்
ஊறவைத்த பச்சைப் பட்டாணி - 5 ஸ்பூன்
உப்பு - தேவையான அளவு
எண்ணெய் - 50 மி.லி.
பச்சைமிளகாய் - 2
மல்லித்தழை
செய்முறை:

4 கப் நீரை கொதிக்கவிட்டு உப்பு சேர்த்து காய்கறி, பட்டாணி, பச்சைமிளகாய் போட்டு பாதி வெந்ததும், கேழ்வரகு மாவையும் சேர்த்து கிளறவும். எல்லாமாகச் சேர்ந்து வெந்ததும் 3 ஸ்பூன் எண்ணெய் விட்டு இறக்கவும். தேவையான சைஸில் உருண்டைகளாக உருட்டி ஆம்லெட்டாகத் தட்டி ஒருபுறம் வெந்ததும் திருப்பிப் போட்டு ஓரங்களில் எண்ணெய் ஊற்றி எடுக்கவும். கொத்துமல்லித் தழை தூவி அலங்கரிக்கவும். இந்த ராகி வெஜ் ஆம்லெட் ஆறிய பின்பும் கூட சுவைக்க ஏற்றது. இதற்கு சைட் டிஷ் எதுவுமே தேவையில்லை. ஆனியன் ராய்த்தா, தக்காளி சட்னி தொட்டு சாப்பிட்டால், மேலும் சுவையாக இருக்கும். இது சர்க்கரை நோயாளிகளுக்கும், ரத்தக் கொதிப்பு உள்ளவர்களுக்கும் கூட மிகவும் ஏற்றது.

**சிவா** · **சிவா** Sat Mar 08, 2014 12:10 am

ஸ்வீட் கார்ன் குக்கீஸ்!

தேவையானவை:

சோள மாவு - 100 கிராம்
கோதுமை மாவு - 100 கிராம்
சர்க்கரை பவுடர் - 100 கிராம்
பேக்கிங் பவுடர் - 0.5 கிராம்
வெண்ணெய் - 100 கிராம்
உப்பு - தேவையான அளவு

செய்முறை:

சோளமாவு, கோதுமை மாவு, பேக்கிங் பவுடர் ஆகியவற்றை சலித்து, தனியாக வைத்துக் கொள்ளவும். வெண்ணெயை மிக்ஸியில் அரைத்து, அதனுடன் சர்க்கரை பவுடரைச் சேர்த்து பிசைந்து கொள்ளவும். சலித்த மாவுடன் இதனைச் சேர்த்து, சிறிதளவு உப்பு கலந்து, பதத்துக்கு வரும் வகையில் மிதமாகப் பிசையவும். பிசைந்த மாவை, சப்பாத்தி உருளையைக் கொண்டு மெல்லியதாகப் பரத்தவும். சிறிய டம்ளரின் வாய்ப்பகுதியைக் கொண்டு, வட்டமாக அதனை வெட்டவும். கடைசியாக, பேக்கிங் அவன் அல்லது மைக்ரோவேவ் அவனில் 160 டிகிரி சென்டிகிரேடு வெப்ப நிலையில், 25 நிமிடங்கள் வேக வைத்துப் பரிமாறவும்.

**சிவா** · **சிவா** Sat Mar 08, 2014 12:11 am

வரகரிசி பிரியாணி!

தேவையானவை:

வரகரிசி - 100 கிராம்
கேரட் - 25 கிராம்
பீன்ஸ் - 25 கிராம்
பட்டாணி - 25 கிராம்
வெங்காயம் - 10 கிராம்
தக்காளி - 10 கிராம்
இஞ்சி-பூண்டு பேஸ்ட் - 10 கிராம்
மிளகாய் - 2 கிராம்
பட்டை, ஏலம் கிராம்பு - சிறிதளவு
கரம் மசாலா - 5 கிராம்
எண்ணெய், உப்பு - தேவையான அளவு

செய்முறை:

குக்கரில் எண்ணெயை ஊற்றி சூடாக்கி... பட்டை, ஏலம், கிராம்பு ஆகியவற்றைப் போட்டு பொன்னிறமாக வரும் வரை வதக்கவும். பிறகு, வெங்காயம், இஞ்சி-பூண்டு விழுது, மிளகாய் மற்றும் காய்கறிகளை ஒன்றன்பின் ஒன்றாகச் சேர்த்து வதக்கவும். இதனுடன் தக்காளியைச் சேர்த்து கிளறி, கரம்மசாலா சேர்க்கவும். இத்துடன் 300 மில்லி தண்ணீரைச் சேர்க்கவும். நன்கு கழுவி களைந்த வரகு அரிசியை அதில் போடவும். தேவையான அளவு உப்பு சேர்த்து, குக்கரை மூடிவிடவும். 3 அல்லது 4 விசில் வரும் வரை வேகவைத்து இறக்கி, சூடாகப் பரிமாறவும்.

**சிவா** · **சிவா** Sat Mar 08, 2014 12:12 am

வரகரிசி வெண்பொங்கல்

தேவையானவை:

வரகரிசி - ஒரு டம்ளர், பாசிப்பருப்பு - அரை டம்ளர், பெருங்காயம் - ஒரு டீஸ்பூன், இஞ்சி - சிறிய துண்டு, முந்திரிப்பருப்பு - 20, மிளகு, சீரகம் - தலா 3 டீஸ்பூன், கறிவேப்பிலை - ஒரு ஆர்க்கு, எண்ணெய் - அரை குழிக்கரண்டி, நெய் - 4 டீஸ்பூன், உப்பு - தேவையான அளவு.

செய்முறை:

வரகரிசி, பாசிப்பருப்பு இரண்டை யும் நன்றாகக் கழுவி, குக்கரில் போட்டு, பெருங் காயம், உப்பு சேர்த்து, நாலேகால் டம்ளர் தண்ணீர் ஊற்றி, குக்கரை மூடி, மூன்று விசில் வந்ததும், அடுப்பை ஐந்து நிமிடம் 'சிம்’மில் வைத்து, இறக்குங்கள்.

அடுப்பில் கடாயை வைத்து எண்ணெய், நெய் இரண்டையும் ஊற்றி... மிளகு, சீரகம் தாளித்து, இரண்டும் பொரிந்து மேலே வந்தபின், பொடியாக நறுக்கிய இஞ்சி, கறிவேப்பிலை, முந்திரி சேர்த்துத் தாளித்து, வெந்த வரகரிசி மீது கொட்டி லேசாகக் கிளறினால்... வரகரிசி வெண்பொங்கல் தயார்.

இதில் நார்ச்சத்து அதிகமாக உள்ளது. இதற்கு சிறந்த சைட் டிஷ் கத்திரிக்காய் கொத்சு அல்லது தேங்காய் சட்னி.

**சிவா** · **சிவா** Sat Mar 08, 2014 12:14 am

கத்திரிக்காய் கொத்சு

தேவையானவை:

கத்திரிக்காய் - கால் கிலோ, துவரம்பருப்பு - ஒரு கைப்பிடி அளவு, நறுக்கிய சின்ன வெங்காயம் - இரண்டு கைப்பிடி அளவு, நறுக்கிய தக்காளி - இரண்டு கைப்பிடி அளவு, மஞ்சள்தூள் - அரை டீஸ்பூன், மிளகாய்த்தூள் - ஒரு டீஸ்பூன், தனியாத்தூள் - 2 டீஸ்பூன், பச்சை மிளகாய் - 2, கடுகு - ஒரு டீஸ்பூன், கறிவேப்பிலை - 2 ஆர்க்கு, காய்ந்த மிளகாய் - 2, வெந்தயம் - அரை டீஸ்பூன், எண்ணெய் - அரை குழிக்கரண்டி, உப்பு - தேவையான அளவு.

செய்முறை:

குக்கரில் எண்ணெய் ஊற்றி, காய்ந்ததும் கடுகு, காய்ந்த மிளகாய், வெந்தயம், கறிவேப்பிலை போட்டு தாளித்து, வெங்காயத்தை சேர்த்து பொன்னிறமாக வதக்கவும். அடுத்ததாக தக்காளியைப் போட்டு வதக்கி, நறுக்கிய கத்திரிக் காயைப் போட்டு நன்கு வதக்கவும். இதோடு துவரம் பருப்பு, இரண்டாக கீறிய பச்சை மிளகாய், மஞ்சள் தூள், மிளகாய்த்தூள், தனியாத்தூள், உப்பு சேர்த்து வதக்கி, தேவையான அளவு தண்ணீர் ஊற்றி, குக்கரை மூடவும். மூன்று விசில் வந்ததும் அடுப்பை 'சிம்’மில் வைத்து, ஐந்து நிமிடம் கழித்து இறக்கவும்.

**ஜாஹீதாபானு** · **ஜாஹீதாபானு** Sat Mar 08, 2014 2:44 pm

அருமையான சத்தான குறீப்பு இதுல கம்பு ஸ்வீட் பால்ஸ் செய்து பார்க்கனும். அச்சுவெல்லத்தில் மண் இருக்காதா?

**சிவா** · **சிவா** Sat Mar 08, 2014 3:32 pm

ஜாஹீதாபானு wrote:அருமையான சத்தான குறீப்பு இதுல கம்பு ஸ்வீட் பால்ஸ் செய்து பார்க்கனும். அச்சுவெல்லத்தில் மண் இருக்காதா?

பொதுவாக அச்சு வெல்லத்தில் மண் இருக்காது, நீங்கள் மண்ணில் போட்டு எடுத்தால் மட்டுமே மண் இருக்கும்!

Sponsored content · Sponsored content

சிறுதானிய சமையல்

சிறுதானிய சமையல்

Re: சிறுதானிய சமையல்

Re: சிறுதானிய சமையல்

Re: சிறுதானிய சமையல்

Re: சிறுதானிய சமையல்

Re: சிறுதானிய சமையல்

Re: சிறுதானிய சமையல்

Re: சிறுதானிய சமையல்

Re: சிறுதானிய சமையல்

Re: சிறுதானிய சமையல்

Re: சிறுதானிய சமையல்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக