அழியும் தேனீ: குறையும் வேளாண் உற்பத்தி

ஐயோ கொட்டுதே... என வலியால் துடிக்கும்போது தேனீக்களை சபிக்கிறோம். ஆனால் உலகம் முழுவதும் அவற்றின் எண்ணிக்கை குறைந்து வருவது, வேளாண் விஞ்ஞானிகள் மத்தியில் கவலையை ஏற்படுத்தி உள்ளது. இதனால் உணவுப்பொருட்களின் விலை உயர்ந்து, பொருளாதார சரிவு ஏற்படும் என ஆராய்ச்சியாளர்கள் கருதுகின்றனர். தேனீக்கள் அழிந்தால் எப்படி விலைவாசி உயரும். பொருளாதாரம் சரியும் என யோசிக்கிறீர்களா....

தாவரங்களின் மகரந்த சேர்க்கை, பெரும்பாலும் தேனீக்களால் தான் நடக்கிறது. தேனீக்கள் அழிந்தால் மகரந்த சேர்க்கை நடப்பது குறையும். இதனால் பழங்கள், காய்கறிகளின்உற்பத்தி குறைந்து உணவு பற்றாக்குறை ஏற்படும். பற்றாக்குறையினால் விலைவாசி உயர்ந்து, பொருளாதாரம் சீரழியும். இந்த சங்கிலி தொடர் பாதிக்கப்படுவது, மனிதகுலத்துக்கு விடப்படும் எச்சரிக்கையாக கருதப்படுகிறது. உலகளவில் மகரந்த சேர்க்கையால் நடக்கும் பழங்கள் மற்றும் காய்கறிகளின் வர்த்தக மதிப்பு மட்டும் ஆண்டுக்கு 1,500 கோடி டாலர்.

மகரந்த சேர்க்கை:

பூக்கும் தாவரங்களின் இனப்பெருக்கத்துக்கு முக்கிய காரணம் மகரந்த சேர்க்கை. பூக்கள் இருக்கும் இடத்தை தேனீ எளிதில் கண்டுபிடித்து, தேனை சேகரிக்க அதன் மீது அமரும். அப்போது தேனீ மீது, மகரந்த துகள்கள் ஒட்டி கொள்ளும். அப்படியே தேனீ பறந்து அடுத்த பூவில் அமரும்போது அதன் மீதிருக்கும் மகரந்தம் மற்றொரு பூவில் இணைகிறது. இப்படித்தான் மகரந்த சேர்க்கை நடக்கிறது. இது நடந்தால் தான் பூ, காயாகி, கனியாகும். கனியிலிருந்து தான் விதைதோன்றும். தற்போது ஆண்டுக்கு, மூன்றில் ஒரு பங்கு தேனீக்கள் அழிந்து வருவதாக ஒரு ஆய்வு கூறுகிறது. இதற்கு காடுகள் அழிப்பு, வெப்பநிலை உயர்வு, மொபைல் போன் டவர்கள் என பல காரணங்கள் கூறப்படுகின்றன. இருப்பினும் தேனீக்களின் அழிவுக்கு முக்கிய காரணம் எது என தெரியாமல் ஆராய்ச்சியாளர்கள் விழிக்கின்றனர். எதிர்காலத்தில் என்ன ஆகுமோ என அஞ்சுகின்றனர். சாதாரண தேனீ தானே என நினைக்கிறோம். ஆனால் இவற்றின் அழிவு, எவ்வளவு பெரிய பாதிப்பை ஏற்படுத்தப்போகிறது பாருங்கள்.