எழுதப்படாத கவிதை...!!

காயத்ரி வைத்தியநாதன் · 23/09/2012

என்னுள் இருந்து
என் எண்ணங்களை ஆட்சிசெய்யும்
என்னவனைக் கவிதையாய் வடித்திட
உருகும் மனத்துடன்
விடியும் ஒவ்வொரு நாளும்
விரும்புகிறேன்..!!

வார்த்தைகள்
வசப்படாது வஞ்சனை செய்திட
மனதாளும் மன்னவனை
வார்த்தையில்
அடக்கிடவும் இயலுமோ..?!!

மனதைச் சுண்டியிழுத்து
நாடி, நரம்புகளை புடைக்கச்செய்து
எங்கோ இருந்தபடி
எனை வீணையாய் மீட்டும்
ஆழி அலையின் ஓசையாய்
ரசிக்க வைக்கும் கம்பீரக் குரல்...!

மனதிற்குள் மறைந்திருந்து
நான் விழிமூடும் நேரத்தில்
கதிரவனையே கூசச்செய்யும்
பார்வையுடன்..
மின்னலும் வெட்கி விலகும்
பிரகாச முகத்தின் நர்த்தனம்...!!

தரணியையே கரங்களில் அடக்கி
எதிரியையும் வசப்படுத்தும்
பிரபஞ்சம் பிரமிக்கும் கூறிய அறிவு...!

குளிர்ந்த நிலவாய்
தோற்றத்தில் அமைதி...!

என்றும்
படைசூழ பவனிவரும் அழகு...!

என் இதயத்தில்
ஆயுள் தண்டனை அனுபவிக்கும்
அன்புக் கைதி...!!

சுறுசுறுப்பில் எறும்பு..
மனோபலத்தில் யானை...
சிந்தனையின் சிற்பி...

அந்தக்காலனையும்
என்னருகே அண்டவிடாத
அவனருகாமை...!!

பாடுபொருள்
பலவாயிரம் இருந்திடினும்
பார்க்கும் பொருளெல்லாம்
அவனே பாடுபொருளாகிட...

எழுதிவைத்த வார்த்தைகளுமே
எண்ணத்தைப் பிரதிபலிக்காது போக..
ஏமாற்றத்துடன்
எழுதப்படாத கவிதையினை
எண்ணத்தில் சுமந்தபடியே..
கவிதைவடிக்கும் வார்த்தைகள்
என் வசப்படும் நேரத்திற்காய்
காத்திருக்கிறேன்...!

யினியவன் · யினியவன் Mon Feb 24, 2014 7:03 pm

வசப்படும் நேரத்திற்கு காத்திருக்கும் வேளையில்
வசைபாடாமல் கவிபாடியது நன்று காயத்ரி புன்னகை

**கா.ந.கல்யாணசுந்தரம்** · 28/02/2009

[quote="காயத்ரி வைத்தியநாதன்"]
பாடுபொருள்
பலவாயிரம் இருந்திடினும்
பார்க்கும் பொருளெல்லாம்
அவனே பாடுபொருளாகிட...

இந்த வரிகளை வெகுவாக ரசித்தேன், ருசித்தேன்......அருமையான கவித்துவம் மிக்க வரிகள்....பாராட்டுகள் காயத்ரி அவர்களே.

yarlpavanan · yarlpavanan Thu Apr 03, 2014 9:38 pm

"எழுதிவைத்த வார்த்தைகளுமே
எண்ணத்தைப் பிரதிபலிக்காது போக..
ஏமாற்றத்துடன்
எழுதப்படாத கவிதையினை
எண்ணத்தில் சுமந்தபடியே..
கவிதைவடிக்கும் வார்த்தைகள்
என் வசப்படும் நேரத்திற்காய்
காத்திருக்கிறேன்...!" என்ற
நம்பிக்கை வரிகளை விரும்புகிறேன்.

Sponsored content · Sponsored content

எழுதப்படாத கவிதை...!!

எழுதப்படாத கவிதை...!!

Re: எழுதப்படாத கவிதை...!!

Re: எழுதப்படாத கவிதை...!!

Re: எழுதப்படாத கவிதை...!!

Re: எழுதப்படாத கவிதை...!!

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக