ஜெயலலிதா மீது கேஸ் போடப்போறேன்!

by **சிவா** Fri Feb 21, 2014 12:56 pm

ஜெயலலிதா வீட்டின் அருகே ஜெயலலிதாவை வாழ்த்தி வைக்கப்பட்டிருந்த பேனர்கள் அனுமதியின்றி வைக்கப்பட்டிருந்ததாக பேனர்களைக் கிழித்து பரபரப்பைக் கூட்டிவிட்டார் டிராஃபிக் ராமசாமி. கோர்ட், கேஸ், ஆக்கிரமிப்பு அகற்றம் என்று பிஸியாக இருந்தவர், புதிதாக ஒரு கட்சியைத் தொடங்கி நாடாளுமன்றத் தேர்தலைச் சந்திக்கவும் தயாராகிவிட்டார். இன்னொரு புறம் எம்.ஜி.ஆர் நோய்வாய்ப்பட்டு அமெரிக்காவில் இருந்தபோது அவர் குணமாக வேண்டுமென்று சென்னை உயர்நீதிமன்ற வாசலில் ஒரு கோயில் கட்டப்பட்டிருந்தது. பல வருடங்களாக இருக்கும் அந்தக் கோயிலை அகற்றக் கோரி வழக்குத் தொடர்ந்து வெற்றியும் பெற்றுவிட்டார். அதனால் அவருக்குக் கண்டனம் தெரிவித்து சூடான போஸ்டர்களை இந்துத்துவ அமைப்புகள் ஒட்டி இருக்கும் நிலையில் அவரிடம் பேசினேன்.

''இலங்கையில் உள்ள தமிழ் தேசியக் கூட்டமைப்பு போல் இங்கேயும் 'தமிழ் தேசியக் கூட்டமைப்பு’ என்று ஆரம்பித்துள்ளீர்கள். இந்தக் கூட்டமைப்பில் யார், யாரெல்லாம் இருக்கிறார்கள்?''

''என் கட்சியின் பெயர் மக்கள் பாதுகாப்புக் கழகம். என் கட்சியைப் போல் நேர்மையான கட்சிகள், சமூக ஆர்வலர்கள் மற்றும் சிறிய, ஆனால் நேர்மையான தொண்டு இயக்கங்கள் இந்தக் கூட்டமைப்பில் இருக்கிறார்கள். மற்றபடி என் இயக்கத்துக்கும் இலங்கைக்கோ, இலங்கையில் இருக்கும் தமிழ் தேசியக் கூட்டமைப்புக்கோ எந்தத் தொடர்பும் கிடையாது.''

''உங்கள் கூட்டமைப்போடு கூட்டணி அமைக்க பெரிய கட்சிகளிடமிருந்து அழைப்பு வந்ததா?''

''பாரதிய ஜனதா கட்சியே கூட்டணியில் சேர அழைத்தார்கள். ஆனால் எங்களுக்கு யாருடனும் கூட்டணி சேரும் எண்ணம் இல்லை. மாற்றத்தை உருவாக்க வேண்டும் என்றுதான் தேர்தலில் போட்டி போடுகிறோம். எனவே எந்த அரசியல் கட்சிகளோடும் ஒட்டும் இல்லை. உறவும் இல்லை.''

''ஊழலை ஒழிக்க வேண்டும், சாமானிய மக்களுக்கு அதிகாரம் என்று நீங்கள் சொல்வதைத்தானே அண்ணா ஹசாரேவும் சொல்கிறார்?''

''அண்ணா ஹசாரே பேச்சே வேண்டாம். அவர் நீர்த்துப் போய்விட்டார். வெறும் வாய்ச் சொல்லிலேயே நின்றுவிட்ட அவர் முக்கியமான செயல்பாடுகளில் இறங்கவில்லை.''

''சரி, அரவிந்த் கெஜ்ரிவாலையாவது ஏற்றுக்கொள்கிறீர்களா? அவருடைய ராஜினாமா பற்றி என்ன நினைக்கிறீர்கள்?''

''கெஜ்ரிவால் பதவி ஏற்ற அன்றே நான் சொன்னேன், பிப்.15-க்கு மேல் ஆம் ஆத்மி ஆட்சி நீடிக்காது என்று. முதலில் டெல்லியில் பதவி ஏற்றதே தவறு. உண்மையில் மக்கள் மீது அக்கறை இருந்தால், ஆட்சி செய்து மக்களுக்கு நன்மை செய்திருக்க வேண்டும். ராஜினாமா செய்தது முட்டாள்தனம். மக்களுக்காக ராஜினாமா செய்தேன் என்று ஸ்டன்ட் அடிக்கத்தான் இந்த நாடகம். கெஜ்ரிவாலுக்கு பதவி ஆசை வந்துவிட்டது. இப்படி ஒரு ஸ்டன்ட் அடித்தால் நாடாளுமன்றத் தேர்தலில் மறுபடியும் மக்கள் ஓட்டு போடுவார்கள் என்று நினைக்கிறார்.''

''அ.தி.மு.க. ஆட்சியைப் பற்றி என்ன நினைக்கிறீர்கள்?''

''தமிழக சட்டசபையில் பட்ஜெட் தாக்கல் செய்யவரும்போது ஓ.பன்னீர்செல்வம் கொண்டுவந்த சூட்கேஸில் பார்லிமென்ட் படத்தை ஒட்டி வந்ததற்கு ஜெயலலிதா மீதும் பன்னீர்செல்வம் மீதும் வழக்கு போடப் போகிறேன். தமிழ்நாட்டில் பட்ஜெட் தாக்கல் செய்வதற்கு எதற்கு பார்லிமென்ட் படம்?''

''இந்திய அளவில் ஊழலற்ற நிர்வாகத்தை எந்தக் கட்சி கொடுக்க முடியும்னு நினைக்கிறீங்க?''

'' இருப்பதில் காங்கிரஸ்தான் அதிக ஊழல் கட்சி. அதைத் தவிர என்றால், பாரதிய ஜனதாவைச் சொல்லலாம். ஆனால் மோடியை வைத்துக்கொண்டு நல்ல நிர்வாகத்தை பா.ஜ.க-வால் தர முடியாது. அவர் மாநிலத்துக்கு வேண்டுமானால் மோடி சிறந்தவராக இருக்கலாம். ஆனால் அவரால் இந்தியா முழுமைக்கும் சிறந்த நிர்வாகத்தை வழங்க முடியாது!''

''இந்துத்துவ அமைப்புகள் உங்களைக் கண்டித்து போஸ்டர் ஒட்டியிருக்கிறார்களே?''

''எம்.ஜி.ஆர். அமெரிக்காவில் உயிருக்குப் போராடிக்கொண்டு இருந்தபோது வேண்டுதலுக்காக அந்தக் கோயிலைக் கட்டினார்களாம். மக்களுக்கு இடையூறாக இருந்ததால், அதை அகற்றப் போரடினேன். கோர்ட்டும் உத்தரவிட்டுள்ளது. உடனே இந்து அமைப்புகள் என்னைக் கழுதை போல வரைந்து போஸ்டர் ஒட்டியுள்ளார்கள். நான் லஞ்சம் வாங்கியதாக போஸ்டர் ஒட்டியுள்ளார்கள். லஞ்சத்துக்கு எதிராகப் போராடுபவன் மீதே லஞ்சக் குற்றச்சாட்டு வைக்கும் கேவலம் இந்த நாட்டில்தான் நடக்கும்.''

''ஊழலை ஒழிப்பேன் என்று சொல்லும் விஜயகாந்த் மீதாவது உங்களுக்கு நம்பிக்கை இருக்கிறதா?''

''நல்ல வழி காட்ட வேண்டிய தலைவனே குடிச்சிட்டு வந்தா எப்படி இருக்கும்? அவர் ஒரு குடிகாரர். அவருக்காக வருத்தப்படுகிறேன்!''

விகடன்

by பாலாஜி Fri Feb 21, 2014 1:11 pm

[mention]"ஊழலை ஒழிப்பேன் என்று சொல்லும் விஜயகாந்த் மீதாவது உங்களுக்கு நம்பிக்கை இருக்கிறதா?"

''நல்ல வழி காட்ட வேண்டிய தலைவனே குடிச்சிட்டு வந்தா எப்படி இருக்கும்? அவர் ஒரு குடிகாரர். அவருக்காக வருத்தப்படுகிறேன்!''[/mention] wrote:

என்னதான் அவர் அம்மா அரசை எதிர்த்தாலும் ... அரசின் வருமானத்திற்காக குடிக்கும் அவரை எப்படி குறை சொல்லலாம் .