பிடிபடாமல் இருப்பதே வீரமான காளை!

**சாமி** · **சாமி** Tue Jan 14, 2014 12:22 pm

தமிழர்களின் வீரத்தை உலகுக்கு பறைசாற்றும் விளையாட்டுகளில் ஒன்று ஜல்லிக்கட்டு. தமிழகத்தில் குறிப்பாக மதுரை, திண்டுக்கல், சிவகங்கை, தேனி உள்ளிட்ட சில மாவட்டங்களில் இன்றைய நாளிலும் கூட ஜல்லிக்கட்டு போட்டிகள் ஆண்டுதோறும் நடைபெற்று வருகின்றன. ஜல்லிக்கட்டு போட்டியில் பங்கேற்று மாடுகளைப் பிடிக்கும் வீரர்களுக்கு எந்த அளவுக்குப் பெருமை உள்ளதோ அதே அளவுக்கு, அவர்களைத் தூக்கி வீசிவிட்டுச் செல்லும் காளைகளுக்கும் தனிப்பெருமை உண்டு. அந்த கௌரவத்திற்காகவே மதுரை, திண்டுக்கல் மற்றும் சுற்றுப்புற மாவட்ட கிராமங்களில் ஜல்லிக்கட்டு காளைகள் பராமரிக்கப்பட்டு வருகின்றன. அதிலும் மாடுபிடி வீரர்களிடம் பிடி கொடுக்காமல், பரிசு பெற்றுவிட்டால் அந்தக் காளைக்கும், அதன் உரிமையாளருக்கும் தனிச் சிறப்பு.

கடந்த 4 ஆண்டுகளாக மாடுபிடி வீரர்களிடம் சிக்காமல் 30க்கும் மேற்பட்ட பரிசுகளை வென்ற காளையின் பெயர் வேட்டையன். இதை திண்டுக்கல் மாவட்டம், நத்தம் அடுத்துள்ள சேர்வீடு பகுதியைச் சேர்ந்த லெ.ந.ரமேஷ் என்பவர் வளர்த்து வருகிறார். அவரிடம் பேசினோம்:

""எனது தந்தை நல்லியப்பன்தான் எனக்கு ஜல்லிக்கட்டில் ஆர்வம் ஏற்படக் காரணம். எங்கள் குல தெய்வமான நல்லியப்பசுவாமி கோயில் காளையை, எனது தந்தையே பராமரித்து வந்தார். அந்தக் காளை மஞ்சு விரட்டுப் போட்டிகளுக்கு சென்று பரிசுகள் வாங்கி வருவதைப் பார்த்த எனக்கு, ஜல்லிக்கட்டு மீதும், காளைகள் மீதும் இயல்பாகவே ஆர்வம் ஏற்படத் தொடங்கியது.

ஜல்லிக்கட்டில் விதவிதமான போட்டிகள் உள்ளன. விரட்டு மஞ்சு விரட்டு (வெளி விரட்டு), எருது கட்டு, வாடி மஞ்சு விரட்டு, வட மாடு மஞ்சு விரட்டு என ஜல்லிக்கட்டில் பல விதமான போட்டிகள் இருந்தன. தற்போது வாடி மஞ்சு விரட்டு மட்டும் இருக்கிறது, அதுவும், பல்வேறு விதிமுறைகளுக்கு உட்பட்டு நடைபெற்று வருகிறது.
நான் மதுரை மாவட்டம் அலங்காநல்லூர் அடுத்துள்ள சேந்தமங்கலம் பகுதியைச் சேர்ந்த ஒருவரிடம், 4 ஆண்டுகளுக்கு முன் இந்த வேட்டையன் காளையை வாங்கினேன்.

மாடு பிடி வீரர்களிடம் சிக்காமல் இருக்க வேட்டையனுக்கு நிறையப் பயிற்சிகள் கொடுத்தோம். களத்தில் மண் குவித்து, அதில் காளையை குத்தவிடுவோம். இதன் மூலம் தன்னை பிடிக்க வருவோரையும், தரையில் தள்ளி குத்துவதற்கு முயற்சிக்கும். மேலும் மனித பொம்மைகள் தயாரித்து, அவற்றைக் கயிறு மூலம் கட்டி காளையின் திமில் மற்றும் முதுகுப் பகுதியில் இறக்குவோம். இப்படிச் செய்யும் போது, காளை அந்தப் பொம்மையைத் தூக்கி எறிந்தும், கீழே தள்ளியும் தாக்க முற்படும். நீச்சல் பயிற்சியும் வழங்குவோம். தற்போது கண்மாய்களில் தண்ணீர் இல்லாததால், நீச்சல் பயிற்சி அளிக்க முடியவில்லை. எனது காளை மதுரை மாவட்டத்தில் உள்ள அலங்காநல்லூர், அவனியாபுரம், சக்குடி, ஆவியூர், திண்டுக்கல் மாவட்டத்தில் உள்ள கொசவப்பட்டி, தவசிமடை, புகையிலைப்பட்டி, பிள்ளமநாயக்கன்பட்டி, வெள்ளோடு, சொரிப்பாறைப்பட்டி, வீரசின்னம்பட்டி ஆகிய ஊர்களில் நடைபெறும் ஜல்லிக்கட்டில் கலந்து கொண்டது.

ஜல்லிக்கட்டு தொடர்பாக உச்ச நீதிமன்றம் அளித்த தீர்ப்புக்குப் பின், பல ஊர்களில் போட்டி நடத்துவது நின்றுவிட்டது. மேலும் போட்டிகளில் பங்கேற்கும் காளைகளுக்கு ரூ.500க்கான காசோலை செலுத்தி, பிராணிகள் வதை தடுப்புச் சங்கத்திடமிருந்து உரிமம் பெற வேண்டியுள்ளது. அதன் பின்னர் காளையின் புகைப்படத்துடன் கூடிய அடையாள அட்டை வழங்கப்படும்.

இந்த உரிமம் வழங்கும் முறையும் கடந்த 2 ஆண்டுகளாக நிறுத்தப்பட்டுள்ளது. இதனால் புதிய காளைகள் பங்கேற்க அனுமதி கிடைப்பதில்லை. இதுபோன்ற சூழ்நிலையிலும் போட்டிகளில் பங்கேற்கும் மாடுபிடி வீரர்களும், காளைகளும் தொடர்ந்து வருவது மட்டுமே ஆறுதல் அளிப்பதாக உள்ளது.

மாடுபிடி வீரர்களிடம் அகப்படாமல் இருந்தாலே காளைக்கு வெற்றிதான். கடந்த 4 ஆண்டுகளாக 10க்கும் மேற்பட்ட ஊர்களில் நடைபெறும் ஜல்லிக்கட்டிற்கு வேட்டையனை அழைத்துச் செல்கிறேன். இதுவரை எந்த வீரரிடமும் வேட்டையன் அகப்படவில்லை.

சக்குடி ஜல்லிக்கட்டில் தங்கக் காசு உள்பட பல போட்டிகளில் கட்டில், பீரோ என 30க்கும் மேற்பட்ட பரிசுகளை வென்றுள்ளது எனது காளை'' என்கிறார் பெருமையாக.

- ஆ.நங்கையார் மணி

காசு பார்க்கும் விளையாட்டல்ல!

மதுரை ஊமச்சிகுளம் அருகே உள்ள ஊர் வீரபாண்டி. அந்த ஊரில் கடந்த 25 ஆண்டுகளாக தான் பங்கேற்ற ஜல்லிக்கட்டு நினைவுகளில் மூழ்கியிருந்த விவசாயி நவநீதன் நம்மிடம் பகிர்ந்து கொண்டவை இதோ:

""ஜல்லிக்கட்டானது காசு பார்க்கும் விளையாட்டல்ல. கபடியைப் போன்ற கெüரவத்துக்கான வீர விளையாட்டு. ஆனால், இன்று காளையை அடக்கி வீரத்தை நிலைநாட்டுவதைவிட, பரிசு பெற்றுவிட்டு ஓடுவதிலேயே பெரும்பாலான இளைஞர்கள் ஆர்வம் காட்டுகின்றனர்.

என்னிடம் உள்ள 5 காளைகளில் எம்.ஜி.ஆர். எனப் பெயரிட்ட காளை இதுவரை 29 ஜல்லிக்கட்டுகளில் விளையாடி பிடிபடாமலே வந்துள்ளது. சூழ்ச்சியால் அதை ஒருமுறை பிடிபட்டதாக அறிவித்தாலும் உண்மையில் எம்.ஜி.ஆர். யாரிடமும் பிடிபடவேயில்லை'' என்கிறார் நவநீதன்.

நவநீதனின் மகனான வினோத் காவலராக உள்ளார். அவர் கடந்த 2 ஆண்டுகளுக்கு முன்பு சிறப்பாக மாடு பிடித்ததற்காக அப்போதைய ஊரகக் காவல் கண்காணிப்பாளர் அஸ்ரா கர்க் பாராட்டி பரிசளித்தார் என்பது குறிப்பிடத்தக்கது.

மதுரை மாவட்ட தமிழர் வீர விளையாட்டு மற்றும் ஜல்லிக்கட்டு பாதுகாப்பு நலச் சங்கத்தின் தலைவராக உள்ள நவநீதனின் 90 வயது தாய் சிட்டுப்பிள்ளைதான் இந்த ஜல்லிக்கட்டில் காளையரைத் தூக்கி வீசும் 5 காளைகளின் பராமரிப்புத் தாய்.

நெருங்குவோரை தலையாட்டி சீறி முட்டவரும் அக் காளைகள் சிட்டுப்பிள்ளையிடம் சிறுபிள்ளையாகி நிற்பது ஆச்சரியம்தான். - வ.ஜெயபாண்டி
- dinamani

**ராஜா** · **ராஜா** Tue Jan 14, 2014 12:32 pm

இன்று காலை புதியதலைமுறை தொலைகாட்சியில் மதுரை அவனியாபுரம் ஜல்லிக்கட்டு நிகழ்ச்சியை பார்த்தேன் , ஒரு காளை யாரிடமும் பிடிபடாமல் சுமார் 5 நிமிடங்கள் களத்திலேயே சுழன்று அடித்து அனைவரின் பாராட்டையும் பெற்றது.

பிறகு போட்டி அமைப்பாளர்கள் அனைவரும் சேர்ந்து அந்த வீரனை மரியாதையாக அனுப்பிவைத்தனர் புன்னகை