பரமனுக்குப் பணிவிடை செய்!

விகடமாகத் தோன்றும் எளிமையான பாடலுக்குள், விவேகத்தைப் பொதித்துவைக்கும் விந்தையான விந்தையை மிகவும் திறமையாகப் புரிந்துள்ளனர் நம் புலவர்கள். புதிர்களை அவிழ்த்து விடைகாணத் தூண்டும் விடுகதை உத்தியில் அமைந்த பாடல் ஒன்று விவேகசிந்தாமணியில் காணப்படுகிறது.

வளமான வாழ்க்கை நெறிகளை வகுத்துக் கூறும் அப்பாடலின் கருத்து இதுதான்: "தகுதியுள்ள வறியவருக்குத் தானம் செய்; பண்பற்ற பகைவரைக் காண நேர்ந்தால் விரைவாக விலகி ஓடு; பார் முழுவதையும் படைத்து ஆட்சி செய்யும் மதுரைச் சொக்கராம் பரமனுக்குப் பணிவிடை செய்!'

படித்தவுடன் புரிந்து கொள்ளுமாறு இக்கருத்தினை வெளிப்படையாக வைத்துப் பாடல் புனைந்திருந்தால், ஆர்வமில்லாதவர்களுக்கு உப்புச் சப்பற்ற வெற்றுரையாகத்தான் தோன்றும். வாசித்த கணத்தில் வீசி எறிந்துவிட்டு, மறந்தே போவார்கள். காரணம், எளிதில் கிடைக்கும் எப்பொருளுக்கும் மதிப்பு குறைவு என்பதால். ஆனால், சிந்தனையைத் தூண்டி தேட வைத்தால், நிச்சயம் அந்தக் கருத்துகள் நெஞ்சினுள் நிலைத்து நிற்கும். ஆகவேதான் விடுகதை உத்தியுடன் பின்வரும் வெண்பாவில் விகடம் புரிந்துள்ளார் புலவர் ஒருவர்.

பண்புளருக் கோர்பறவை; பாவத்திற் கோரிலக்கம்;
நண்பிலரைக் கண்டக்கால் நாற்காலி - திண்புவியை
ஆள்வார் மதுரை அழகியசொக் கர்க்கரவம்
நீள்வா கனம்நன் னிலம் (வி.சி.பா.127)

புலவர் போட்டுச்சென்ற புதிருக்கான விடை இதுதான்: "பாத்திரமறிந்து பிச்சை போடு' என்பது பழமொழி. இதனால், உண்மையிலேயே வறுமையில் வாடும் தகுதி அல்லது பண்பு உள்ளவர்களுக்கு ஓர் பறவை (ஈ - வழங்குக) என்றார். பாவம் செய்வதற்கு ஓர் இலக்கம் (இலக்கம் - எண் - ஐந்து(5) (அஞ்சு -பயப்படு) என எச்சரிக்கிறார். நட்பில்லாத தீய பகைவரைக் கண்டக்கால் (நாற்காலி - நான்கு கால்களையுடைய விலங்குகள் போல) விரைவாக விலகி ஓடுமாறு விழிப்புணர்வை ஊட்டுகிறார். மண்ணகம் பேணும் மதுரைச் சொக்கநாதப் பெருமானுக்கு அணியாம் (அரவம்-பாம்பு-பணி) - நீள்வாகனம் (காளை-விடை) - நன்னிலம் (நல்ல நிலம் - செய்) என்று நயம்பட நவில்கிறார். அழகிய சொக்கருக்கு "அரவம், நீள் வாகனம், நன்னிலம்' என்னும் மூன்று புதிர்களுக்குமே முழுமையான ஒரே விடை, "பரமனுக்குப் பணிவிடை செய்!' என்பதாகும். - தினமணி