'புகழ் பெற்ற இந்தி திரைப்பட பாடல்கள்' தொடர்

First topic message reminder :

நாம் தமிழர்களாய் இருந்தாலும், தமிழ்த் திரைப்படப் பாடல்களை கேட்டு ரசித்தாலும் இசைக்கு மொழி ஒரு தடை இல்லை அல்லவா! தமிழ்த் திரைப் படங்களைப் போல இந்தித் திரைப்படங்களிலும் அருமையான இசை அமைப்பாளர்கள் இருந்திருக்கிறார்கள். உதாரணமாக நௌஷாத், ராமச்சந்திரா, எஸ்.டி.பர்மன், ஆர்.டி.பர்மன், லஷ்மிகாந்த் பியாரிலால்,கல்யாண்ஜி ஆனந்த்ஜி, சலீல் சௌத்ரி என்ற அற்புதமான இசையமைப்பாளர்கள் தங்கள் அபாரத் திறமையால் நம் காதுகளுக்கு தேன் பாய்ச்சி இருக்கிறார்கள். பாடகர்களை எடுத்துக் கொண்டால் முகமத் ரபி, கிஷோர் குமார், மன்னாடே, முகேஷ், லதா மங்கேஷ்கர், ஆஷா போன்ஸ்லே, சுரய்யா, ஷம்ஷத் பேகம், நூர்ஜஹான், கீதா தத்  என்ற அற்புதமான குரல்வளம் கொண்ட பாடகர்கள் இன்றும் தங்கள் குரலால் நம்மைக் கட்டி ஆளுகிறார்கள். இத்தகைய பழைய இந்திப் பாடல்களை நாம் பார்த்து அல்லது கேட்டு மகிழும் போது அதன் சுகமே அலாதியாய் இருப்பதை உணரமுடியும். கால இயந்திரத்தில் அந்த பாடல்கள் வெளியான கால கட்டத்திற்கே நாம் பயணிப்பது போன்ற சுகமான அனுபவம் இந்தத் திரியின் மூலம் நமக்குக் கிட்டும் என்பது நிச்சயம்.

அத்தகைய புகழ் பெற்ற இந்தித் திரைப்படப் பாடல்களை இந்தத் திரியில் வீடியோ வடிவில் நாம் காணலாம்.

முதலில் 1973-இல் வெளியாகி இந்தியாவையே ஒரு உலுக்கு உலுக்கிய ராஜ்கபூரின் 'பாபி' திரைப்படத்தில் இருந்து மிகவும் புகழ் பெற்ற இப்பாடலைப் பார்த்து மகிழ்வோம்.
ரிஷிகபூர், டிம்பிள் கபாடியா இருவரின் இளமைத் துள்ளலில்  அப்போதைய இளைஞர்களை பைத்தியம் பிடித்து அலையை வைத்த காதல் காவியம் 'பாபி'. இசை ஓவியம். ராஜ்கபூர் அவர்களின் சொந்தக் காவியம். லஷ்மிகாந்த் பியாரிலால் இசையமைப்பில் ஷைலேந்திர சிங் என்ற பாடகர் பாடிய 'Main Shayar To Nahin ... Magar Ae Haseen'  என்ற இந்தப் பாடலைக் கேட்டு ரசிக்காதவர்களே அப்போது இல்லை எனலாம்.

இது பற்றிய அன்பர்களின் கருத்துக்கள் வரவேற்கப் படுகின்றன.  

அடுத்து மிகவும் புகழ் பெற்ற 'ஹரே ராமா ஹரே கிருஷ்ணா' படத்திலிருந்து ஒரு சூப்பர் டூப்பர் பாடல். 1971-ஆம் ஆண்டுகளில் ஹிப்பிஸ் ஸ்டைல் உலகமெங்கும் தலை விரித்தாடியது. ஆண்கள் பெண்கள் போல கூந்தல் வளர்த்து கழுத்தில் மாலைகள் அணிந்து கொண்டு நீண்ட பெல்பாட்டம் அல்லது பைஜாமா பனியன் சகிதம் சிகரெட், கஞ்சா புகைத்துக் கொண்டு ஆண், பெண் பேதமில்லாமல் அனைவரும் ஒன்றாக பாடி ஆடிக் கொண்டு, அதுவும் அவர்களது தாரக மந்திரம் 'ஹரே ராமா ஹரே கிருஷ்ணா' சுலோகத்தை உச்சரித்துக் கொண்டு தன்னை மறந்த நிலையில் போதைக்கு அடிமையாகி நாடோடி போல ஆங்காங்கே சுற்றித் திரியும் ஹிப்பியிசம் உலகையே குலுங்க வைத்தது. அதைத் தழுவி இந்தியின் ஸ்டைல் மன்னன் தேவ் ஆனந்த்  'ஹரே ராமா ஹரே கிருஷ்ணா' என்ற படத்தை எடுத்து மாபெரும் வெற்றி கண்டார். இந்தித் திரை உலகையே புரட்டிப் போட்ட இப்படத்தில் தேவ் ஆனந்துடன் ஜீனத் அமன், மும்தாஜ் இணைந்து நடித்திருந்தனர். சிறு வயதில் காணாமல் போன அன்புத் தங்கை ஹிப்பி கூட்டத்தில் சேர்ந்து வளர்கிறாள். போதைகளுக்கு அடிமையாகி மனம் போன போக்கில் சுற்றுகிறாள். பருவ வயது அடைந்த அவளைத் தேடி அண்ணன் புறப்பட்டு அவளை கண்டு பிடித்து அவள் வாழ்வை சீர்திருத்தி அவளை நல்வழிப்படுத்துகிறான். இதுதான் கதை. தேவ் ஆனந்த் தனக்கே உரித்தான ஸ்டைலில் பின்னி எடுத்திருந்தார். ஜீனத் ஹிப்பி பெண்ணாகவே வாழ்ந்து காட்டினார். பாடல்கள் மிக மிக பிரசித்தம்.

ஜீனத் அமன் படத்தில் ஹிப்பிகளுடன் சேர்ந்து பாடுவதாக வரும் 'தம்மரே தம்' பாடல் அதகளம் செய்தது. இப்பாடலை முணுமுணுக்காதவர்களே அப்போது இல்லை எனலாம். ஆர்.டி.பரமன் இசையில் பாடல்கள் பட்டை கிளப்பின. இப்பாடலை ஆஷா போன்ஸ்லேவும், நம்மூர் உஷா உதூப்பும் இணைந்து எங்கேயோ கொண்டு சென்று விட்டனர். எப்போது கேட்டாலும் தாளம் போட்டு நம்மை இன்ப உலகத்திற்கு அழைத்துச் செல்லும் பாடல். பாருங்கள்.

வாசு சார்
ஏற்கெனவே கூறியது போல், ஹிந்திப் பாடலுக்குள் நுழைந்து விட்டால் உலகமே மறந்து போகும், அப்படிப்பட்ட பாடல்களைத் தேர்ந்தெடுத்து இங்கே பதிவிடுவதன் மூலம் நம் அனைவரையும் அந்நாளைக்கே அழைத்துச் செல்கிறீர்கள்.

இதோ என் பங்கிற்கு

தேரே மேரே சப்னே திரைப்படத்திலிருந்து சூப்பர் டூப்பர் ஹிட் பாடல்

ஹே மெய்னே கஸம் .. கேட்டுக் கொண்டே இருக்கலாம்..

ஆஹா! அருமை வீயார் சார்! என்ன ஒரு பாடல். என்னுடைய மனம் கவர்ந்த மும்தாஜ் மற்றும் சற்றே வயது முதிர்ந்த தேவ் ஆனந்தும் இணைந்து கலக்கும் பாடல். லதாவும் கிஷோரும் பட்டை கிளப்பி இருப்பார்கள். அதுவும் லி... லி....என்று இருவரும் இழுக்கும் போது சொர்க்கத்திலே இருப்பது போன்ற உணர்வு.

1977-இல் வெளிவந்த Hum Kisi Se Kum Nahin படத்திர்லிருந்து ஒரு அற்புதமான பாடல். ஆர்.டி.பர்மன் இசையில் இன்னுமொரு ஹிட் படம். ரிஷி கபூர், காஜல் கிரண், டாரிக் கான், அம்ஜத் கான், ஜீனத் அமன் ஆகியோர் நடித்த இப்படம் இசையில் மட்டுமல்லாது ஓட்டத்திலும் பிய்த்து உதறியது. ஒவ்வொரு பாடலும் மணி மணியான பாடல்கள். 'கியா ஹூவா தேரா வாதா' என்று தொடங்கும் இப்பாடல் பல ரசிகர்களின் மனதில் நீங்கா இடம் பெற்றது. முகமத் ரபியும், சுஷ்மா ஷேர்ஸ்டாவும் இணைந்து பாடும் இப்பாடல் பட்டி தொட்டியெங்கும் பிரபலம் ஆனது. பின்னாளில் மாடர்ன் தியேட்டர்ஸ் தயாரித்த தமிழ்ப் படமான 'காளி கோயில் கபாலி' என்ற படத்தில் 'வெண்ணிலா வெள்ளித் தட்டு' என்று இப்பாடல் தமிழிலும் ஒலித்தது. டாரிக் கான் மேடையில் காஜல் தன் சிறு வயது அனுபவங்களைப் பாட காஜல் அதைக் கேட்டு அதிர்ச்சியடைவது போன்ற பாடல். காஜலுடன் ரிஷி கபூரும் இப்பாடலில் இணைந்து நடித்திருப்பார். என்றும் மனதில் நீங்கா இடம் பெற்ற பாடலின் டியூன் அபாரமானது. இப்போது பார்த்து கேட்டு ரசித்து மகிழலாமா?