சிம்புவின் புது நண்பர்

மீனு · மீனு Sat 31 Oct 2009 - 23:46

சிம்புவுக்கு சினிமாவில் 'விரல்' விட்டு எண்ணும்படிதான் நண்பர்கள் இருக்கிறார்கள். அந்த விரலில் இன்னொரு விரலாக சேர்ந்திருக்கிறார் நாக சைதன்யா. தெலுங்கும் தமிழும் இணைந்தது எப்படி?

எல்லாப் புகழும் கவுதம் மேனனுக்கே! விண்ணை தாண்டி வருவாயா படத்தைத் தமிழிலும் தெலுங்கிலும் எடுத்துவருகிறார் கவுதம். இப்படத்தின் பல காட்சிகள் தமிழ் தெலுங்கு மொழிகளில் அடுத்தடுத்து படமாக்கப்பட்டதால் சிம்பு நடிப்பை நாக சைதன்யாவும், நாகத்தின் நடிப்பை சிம்புவும் ரசித்தாக வேண்டிய கட்டாயம். ஒருவரை ஒருவர் புகழ்ந்து புகழ்ந்து நண்பர்களாகிவிட்டார்களாம். இப்போது நியூயார்க்கில் க்ளைமாக்ஸ் எடுத்துவருகிறார் கவுதம். சிம்பு, த்ரிஷா, நாக சைதன்யா, சமந்தா ஜோடிகள் அங்குதான் கும்மாளமடித்துக் கொண்டிருக்கிறார்கள்.

ஒருபக்கம் நன்றாகப் பொழுது போனாலும், தினமும் தனது அசிஸ்டெண்ட் இயக்குனர்களுக்கு போன் அடிக்கிறாராம் சிம்பு. எல்லாம் சீன் விரிவாக்கம் பற்றி விசாரிக்கதான். இவர் நியூயார்க் கிளம்புவதற்கு முன்பு இருபது நாட்களாக அண்ணாசாலையில் உள்ள ஒரு பிரபல ஓட்டலில் கதை விவாதத்தில் இருந்தாராம் இவர்களுடன். அப்போது பேசிய சீன்களைப் பற்றிதான் இந்த அக்கறையான விசாரிப்பு.