தலைமுறை !

நிவேதிதா பள்ளி விட்டதும் வீட்டிற்கு வந்து அம்மா கொடுத்த பலகாரத்தையும் பாலையும் சாப்பிட்டுவிட்டு பாட்டியிடம் ஓடி வந்தாள். பாட்டியிடம் ஏதோ கிசுகிசுக்க பாட்டியும் ஜோராய்த் தலையாட்டினாள். ரொம்ப நேரம் என்னென்னவோ பேசிக் கொண்டிருந்தார்கள்.
மணி எட்டடித்ததும் நிவேதிதாவின் அம்மா சுதா, ""நிவ்வி சாப்பிட வா...'' என்றாள். ""தோ... வந்துட்டேம்மா...'' என்றவள் பாட்டியின் அருகிலிருந்து கிளம்பவில்லை.

மறுபடியும் 10 நிமிடம் கழித்து அம்மா கூப்பிட்டதும், பாட்டி ""போடி அம்மா கூப்பிடறாளே?'' என்றார். நிவேதிதா பதிலுக்கு, ""நான்தான் வரேன்னேனே?'' என்று பாட்டி மாதிரியே நீட்டி முழக்கினாள். ""பெரியவங்ககிட்ட மரியாதையா நடக்கணும். சொன்னபடி செய்யணும் என்றெல்லாம் ஸ்கூல்ல சொல்லித் தரலியா என்ன?'' என்று பாட்டி கேட்க, ""சின்னவங்க ஆசைகளுக்கும் மதிப்பு கொடுக்கணும் அப்படீன்னும் உங்களுக்கு யாரும் சொல்லித் தரலையா?'' என்றாள் பேத்தி.

""அடி வாயாடி! உனக்கு வாய் ரொம்ப நீளம். உங்க அம்மா சாது, நீ யாரைக் கொண்டாயோ'' என்று பாட்டி முறைக்க,
பதிலுக்கு நிவேதிதா ""எல்லாம் உன்னையேதான் உரிச்சு வெச்சிருக்கேன்னு சொல்றாங்களே! அதான் உன்னை மாதிரியே.....'' முடிக்குமுன் பாட்டி விளையாட்டாய் அடிக்கக் கை ஓங்க அதற்குள் சிட்டாய்ப் பறந்துவிட்டாள் பேத்தி.நாலைந்து நாள்கள் இந்த மாதிரி பாட்டி பேத்தி விளையாட்டுகள் முடிந்தது.

அன்று சனிக்கிழமை. பள்ளி மதியம்வரைதான். ஒரு மணிக்கு பள்ளியிலிருந்து துள்ளிக் குதித்துக்கொண்டு வந்தாள் நிவேதிதா.
அம்மா ""என்னடி ஒரே குஷி இன்னைக்கு'' என்று கேட்டதும், ""கண்ணை மூடு'' என்றாள் நிவ்வி. அம்மாவின் கைகளில் தான் கொண்டு வந்திருந்த பரிசுக் கோப்பையையும் சான்றிதழையும் வைத்தாள்.

அம்மா சந்தோஷத்தில் திக்குமுக்காடிப் போனாள். ""என்னடி இது?'' என்று கேட்டபின், கோலம் போடும் போட்டிக்கான பரிசு என்று தெரிந்து கொண்டாள். சுதாவுக்கு இப்போதுதான் எல்லாம் புரிந்தது. தினமும் பாட்டியும் பேத்தியும் ரகசியமாக என்ன செய்கிறார்களோ? என்று நினைத்திருந்தாள்.

நிவ்வி சொன்னாள். ""அம்மா எங்க டீச்சர் "கற்பனைவளம்' என்கிற தலைப்பில் அவரவர்களுக்கு என்னென்ன கைவினைகள் தெரியுமோ, அவர்கள் எல்லாம் பெயர் கொடுக்கலாம். சனிக்கிழமை அன்று போட்டி ஏற்பாடாகியுள்ளது. வெற்றி பெறுபவருக்குப் பரிசு உண்டு என்று போன வாரம் வகுப்பில் சொன்னாங்க. அதுதான் பாட்டிகிட்ட கேட்டேன். உனக்கானா ஆபீஸ் வேலையும் வீட்டு வேலையும் சரியா இருக்கு. பாட்டி நன்றாகக் கோலம் போடுவாங்கன்னு நீதானே சொன்னே? அதுதான் தினமும் பாட்டியிடம் ட்ரெய்னிங் எடுத்துக்கிட்டேன். கைமேல் பரிசு'' என்றாள் வாயெல்லாம் பல்லாக.

""அது மட்டுமில்லை அம்மா, வயதான பெரியவர்கள், தாத்தா, பாட்டி வீட்டில் இருந்தால், அவர்களிடம் மரியாதை கலந்த அன்புடன் பழகுவதும் அவர்களுக்குத் தெரிந்த கலைகளை அவர்களிடமிருந்து கற்றுக்கொள்வதும் உங்களுக்கு நன்மை என்பது மட்டும் அல்ல! அந்தப் பெரியோர்களுக்கும் நாமும் அடுத்த தலைமுறையினருக்கு உபயோகரமாக ஏதோ செய்தோம் என்ற சந்தோஷமும் கிடைக்கும் அப்படின்னு சொன்னாங்களே!''

அதைக் கேட்ட பாட்டியின் கண்களும் மனமும் நிறைந்தது. ""அடி என் சமர்த்தே'' என்று திருஷ்டி கழித்தாள் பாட்டி!

உமாஸரஸ்

கதை அருமை