ஓலைச் சுவடிகள் எப்படித் தயாரிக்கப்பட்டது?

இப்போது கணினி யுகத்தில் இருக்கிறோம். காகிதம், பேனா, மை இவற்றின் காலம் அநேகமாக முடிந்துவிட்டாற் போலத்தான். நம் முன்னோர்கள் நமக்களித்திருக்கும் பல அரிய படைப்புகள் ஓலைச் சுவடிகளில்தான் காணப்படுகின்றன. இந்த ஓலைச் சுவடிகளை எப்படித் தயாரித்தனர், பயன்படுத்தினர் என்பதெல்லாம் நாளைய தலைமுறைக்கு வியப்பைக்கூடத் தரலாம்.

சுவடி எழுத உபயோகப்படும் எழுத்தாணி, பனை ஓலையிலான ஏடு, பனைமரத்தின் பயன்கள் ஆகியவை "பனைமர சோபனம்' எனும் நூலில் விரிவாகக் குறிப்பிடப்பட்டுள்ளன. அந்நூல் 1914-ஆம் ஆண்டு திருப்போரூர் டி. கோபால் நாயக்கர் என்பவரால் பதிப்பிக்கப்பட்டிருக்கிறது.

பழங்காலத்தில் இரவில் சுவடிகள் எழுத எண்ணெய் விளக்குகளைப் பயன்படுத்தினர். அவ்விளக்குகளுக்கு எண்ணெயாகப் பயன்படுவது, கண்களுக்கும் நன்மை பயப்பதாக இருக்க வேண்டும் என்பதற்காக, இலுப்பை எண்ணெய் பயன்படுத்தப்பட்டது. இலுப்பை எண்ணெய் வாங்க நிதியளிப்பது பற்றியும், எழுத்தாணிகள் தீட்டிக் கொடுப்பது பற்றியும், தஞ்சையை ஆண்ட சரபோஜி மன்னர்களின் மோடி ஆவணங்கள் வெளிப்படுத்துகின்றன. சுவடிகளைக் கட்டி வைப்பதற்குக் கயிறு திரித்துக் கொடுத்ததற்கும் ஆவணச் சான்று காணப்படுகிறது.

"சுவடிகளின் வரலாறும் அதன் பதிப்பு முறையும்' என்கிற புத்தகம் தஞ்சாவூர் மகாராஜா சரபோஜியின் சரஸ்வதி மகால் நூலகத்தால் வெளியிடப்பட்டிருக்கிறது. அதில் சுவடிகளின் வரலாறு, ஏடு எழுதுதல் மற்றும் எழுத்தாளர் பற்றிய குறிப்பு, சுவடிகளின் பெருக்கம், நூற்படைப்புகளுக்கு அரசர்களின் ஆதரவு, சுவடிப்பட்டியல் செய்யும் முறை, சுவடிப் பதிப்பு முறை போன்றவை காணப்படுகின்றன.

தஞ்சை சரபோஜி மன்னரின் அரண்மனையில் ஏடு எழுதுவதற்காக மாதச் சம்பளத்தில் 307 பேர் பணியாற்றியதாக மோடி ஆவணம் தெரிவிக்கிறது. கன்னடம் எழுத சதாசிவ பட்டரும், சுப்பராய பட்டரும், தெலுங்கு எழுத சிதம்பர சாஸ்திரியும், கிரந்தம் எழுத மன்னார்குடி சீதாராமய்யரும், தமிழ் எழுத வேலாயுதம் பிள்ளை, அழகம் பிள்ளை, வேலாயுத முதலி, சுந்தரராஜ முதலி, சுப்பராயப் பிள்ளை, வெங்கடாசலம் பிள்ளை, சாமிநாத பிள்ளை, வாசுதேவப் பிள்ளை ஆகியோரும் இருந்ததாக மோடி ஆவணம் தெரிவிக்கிறது. வாசுதேவப்பிள்ளை எழுதிய கம்பராமாயணம் தஞ்சை சரஸ்வதி மகால் நூலக அருங்காட்சியகத்தில் இன்னும் பாதுகாக்கப்படுகிறது.

சுவடிகளை எழுத சரஸ்வதி மகாலுக்காக 1827-ஆம் ஆண்டில் 501 எழுத்தாணிகள் தாராசுரம் அன்னசத்திரமான இராஜசாம்பாபுரத்திலிருந்து வழங்கப்பெற்றன என்று தெரிகிறது. முனைவர் ஆ. வீரராகவன் தொகுத்திருக்கும் இந்தப் புத்தகம், சுவடி ஆய்வாளர்களுக்கு இன்றியமையாத கையேடு. கஷ்டப்பட்டு காலத்தைக் கடந்த இலக்கியங்களை உருவாக்கினார்கள் நமது முன்னோர்கள். நாம் சிரமப்படாமல் அதன் மகிமையை மறக்கிறோம்! - கலாரசிகன் (தினமணி