இது இன்னொரு நூற்றாண்டு!

எப்படியோ 2013-ல் மாலையில் நடக்கும் சினிமா நூற்றாண்டு விழாவுக்கு, மதியம் போல கருணாநிதிக்கு அழைப்பு விடுத்து அவமானப்படுத்திவிட்டார்கள். காங்கிரஸ் கூட்டணியைவிட்டு வெளியே வருவது, 'இனிமே காங்கிரஸோட கூட்டணி இல்லை’னு தீர்மானம் போடுவது என்று கருணாநிதி எப்பவுமே லேட் ரியாக்‌ஷன்தானே? இதோ 2014-ல் கருணாநிதியே கட்சி செலவில் தனியா ஒரு சினிமா நூற்றாண்டு விழா நடத்துறார். நமக்குக் கண்டிப்பா அழைப்பு இருக்குங்க. என்ன நடக்குதுன்னு எட்டிப் பார்ப்போம் வாங்க!

'பீட்சா’, 'காஞ்சனா’, 'கான்ஜூரிங்’ எது ரொம்ப திகில் படம்னு போட்டி வெச்சு, கடைசியில் 'உளியின் ஓசை’, 'கண்ணம்மா’ இது மாதிரி திகிலுக்கே திகிலூட்டின திகில் படங்கள் வேற இல்லவே இல்லைன்னு கருணாநிதிக்கே விருது தருவாங்க.

இருக்கவே இருக்கார் சூர்யா, அவங்க அப்பாகிட்ட கத்துக்கிட்ட வித்தை, சங்க இலக்கியத்துல இருக்கிற 100 பூக்களோட பேரை வரிசையா, கடகடன்னு ஒப்பிப்பார். முடிவா கலைஞர், 'தம்பி சூர்யா... சொல்லாத ஒரு பூ உண்டு. அதுதான் குஷ்பு’னு சொல்ல, கூட்டத்தில் கைதட்டல், விசில் பறக்கும்.

பாசத்தலைவனைப் பாராட்டி, 'பராசக்தி’ படத்தில் கோர்ட் சீனை ஓரங்க நாடகமாகப் போட்டு நடிப்பார் விஜயகாந்த். 'ஓடினேன்... ஓடினேன்... எங்கெல்லாம் கோர்ட் இருக்கிறதோ, அந்தந்த மாவட்டத்துக்கு எல்லாம் ஓடினேன். விட்டார்களா என்னை? 56 அவதூறு வழக்குகள் போட்டார்களே’னு அப்டேட்டா வசனம் பேசிக் கைதட்டல் வாங்குவார் கறுப்பு எம்.ஜி.ஆர்.

விஜயகாந்த் நடிச்சதுக்கு நன்றிக்கடன் செலுத்தணும் இல்லையா? 'ரமணா’ ஹாஸ்பிடல் சீனை ஓரங்க நாடகம் ஆக்கி, அதில் அழகிரி நடிப்பார். நாக்கைத் துருத்திக்கிட்டே 'ஏய்ய்ய்ய், எனக்கு இங்கிலீஷ்ல பிடிக்காத வார்த்தை இங்கிலீஷ்தான்’ என்று வசனம் பேசுவார்.

ரஜினிக்கும் கமலுக்கும் வாழ்நாள் சாதனையாளர்கள் விருது வழங்கப்படும். இவ்வளவு பாராட்டு விழாக்களை அட்டெண்ட் பண்ணி, பொறுமையா இருக்கிறதே சாதனைதானே?

குர்தா கையை மடக்கிவிட்டுக்கிட்டே, மைக் முன்னால வர்ற வைரமுத்து, 'சினிமாவுக்கு வயது 100. கலைஞருக்கு வயது 90. கூட்டிக் கழித்துப் பார்த்தால் வரும் வித்தியாசம் பத்து. கலைஞர்தான் திரையுலகத்தின் சொத்து’ என்று பேச, 'இதைச் சொல்வது தம்பி வைரமுத்து’னு கருணாநிதி குறுக்கிட்டுச் சொல்ல, இந்த மொக்கை ஜோக்குக்கும் ஆடியன்ஸ் அப்ளாஸ் அள்ளும்.

வைரமுத்துவை ஸ்கோர் பண்ணவிடலாமா? ஓவர்டேக் பண்ண பா.விஜய் வருவாரே, 'எல்லா முதல்வர்களிலும் திரைத் துறைக்கு நீதான் அதிகம் நிதி கொடுத்தாய். ஆம் உதயநிதி, துரை தயாநிதி, அருள்நிதி என்று திரைத் துறைக்கு அதிகம் நிதி கொடுத்தாய்’னு கவிதை சொல்வார்.

'விலங்குப் பட வித்தகர்’ என்ற விருது ராம நாராயணனுக்கு ஸ்பீல்பெர்க் கையால் வழங்கப்படும். 'மிரட்டுறாங்கய்யா’ மைண்ட் வாய்ஸ் கேட்க, மனசுக்குள் சிரித்துக்கொள்வார் அஜித்.

ஜெயலலிதாவைக் கண்டபடி கழுவி ஊத்தித் தன் பேச்சை நிறைவு செய்வார் வாகை சந்திரசேகர். 'தம்பிக்கு வசைஞானி பட்டம் வழங்கிச் சிறப்பிக்கிறேன்’ என்பார் கலைஞர்.

'சினிமாவுக்கு 100 வயசு ஆகுது. மனசெல்லாம் மைண்ட் புளோயிங் ஆகுது மச்சான்' என்று செல்லத் தமிழ் பேசுவார் நமீதா!

விகடன்