கடலுக்கடியில் அமைச்சரவைக் கூட்டம்!:

கடலுக்கடியில் அமைச்சரவைக் கூட்டம்!: சொன்னதைச் செய்தார் மாலத்தீவு அதிபர்


பூமி வெப்பமயமாவதால் உலக அளவில் தட்ப வெப்ப நிலையில் மாற்றங்களும் ஏற்பட்டு வருகின்றது. கடல்நீர் மட்டமும் உயர்ந்து வருகிறது. இதனால் கடல் மட்டத்திற்கு ஈடாக இருக்கும் குட்டிக்குட்டி தீவுகள் எல்லாம் காணாமல் போகும் ஆபத்து நெருங்கி வருகிறது. இதில் அபாயகட்டத்தில் இருக்கும் தீவாக மாலத்தீவுகள் இருக்கிறது.

பூமி வெப்பமயமாவதற்கு அடிப்படைக் காரணம், உலக நாடுகள் அனைத்தும் வெளியிடும் கார்பன் டை ஆக்சைடு. இதை தடுக்கும் வகையிலும், இதுகுறித்து உலக அளவில் விழிப்புணர்வு ஏற்படுத்தவும் மாலத்தீவு அதிபர் முகம்மது நசீத் வித்தியாசமான முயற்சியை மேற்கொண்டார். அதன்படி கடலுக்கு அடியில் மாலத்தீவு அரசின் அமைச்சரவைக் கூட்டம் நடைபெறும் என, அவர் அறிவித்தார்.
அவர் அறிவித்தபடி, கடந்த 17ஆம் தேதி மாலத்தீவின் ஒரு பகுதியான கிரிபுசி தீவில், 20 அடி ஆழத்தில் அமைச்சரவைக்கூட்டத்தை கூட்டினார். இதில் அமைச்சர்கள் 13 பேர் கலந்துகொண்டனர்.

ஸ்கூபா நீச்சல் உடை அணிந்த அதிபர் உள்ளிட்ட அமைச்சர்கள் நீருக்குள் போடப்பட்ட நாற்காலி, டேபிளில் அமர்ந்து ஆலோசித்தனர். இக்கூட்டத்தின் தீர்மானங்கள் கூட நீருக்கடியிலே எழுதப்பட்டனர். கார்பன் டை ஆக்சைடு வெளியிடுவதை தடுத்து நிறுத்துமாறு அனைத்து நாடுகளுக்கும் விடுக்கும் கோரிக்கையில் அதிபர் முகம்மது நசீத் கையெழுத்திட்டார்.

உலக அளவில் ஏற்பட்டு வரும் தட்பவெப்ப நிலை மாற்றங்கள் குறித்து ஆலோசிக்க, ஐக்கிய நாடுகளின் கூட்டம், கோபன்ஹேகனில் வரும் டிசம்பர் மாதம் நடைபெறவிருக்கிறது. இக்கூட்டத்தில் தங்கள் நாட்டின் அபயக்குரல் உறுதியாக ஒலிக்கச் செய்யவே இந்த கடலுக்குள் அடியில் அமைச்சரவைக் கூட்டத்தை மாலத்தீவு அதிபர் கூட்டினார் என்பது குறிப்பிடத்தக்கது.





நன்றி தமிழ்வாணன்.