கஞ்சா நகரமான தேனி மாவட்டம்

by **சிவா** Tue 24 Dec 2013 - 5:24

தேனி மாவட்டம் சின்ன மனூர் ரைஸ்மில் தெருவில் உள்ள வீட்டில் கஞ்சா பதுக்கி வைக்கப்பட்டிருப்பதாக போலீசாருக்கு தகவல் கிடைத்தது. இன்ஸ்பெக்டர் வினோஜி தலைமையில் போலீசார் அப்பகுதியில் உள்ள இன்பராஜ் என்பவரது வீட்டில் அதிரடி சோதனை நடத்தினர்.

அப்போது அந்த வீட்டில் இன்பராஜின் மனைவி அன்னலட்சுமி (வயது27), கம்பம் வடக்குபட்டியை சேர்ந்த மாயாண்டி என்பவரின் மனைவி ராக்கம்மாள் (50) ஆகிய 2 பேர் 16 கிலோ கஞ்சா பதுக்கி வைத்திருப்பதை போலீசார் கண்டு பிடித்தனர். இருவரையும் கைது செய்த போலீசார் 16 கிலோ கஞ்சாவை பறிமுதல் செய்தனர். இதன் மதிப்பு ரூ.1½ லட்சம் ஆகும். சின்ன மனூர் போலீசார் வழக்குப் பதிவு செய்து விசாரணை நடத்தி யதில் கம்பம் நகரில் வசிக்கும் ராக்கம்மாள் ஆந்திர மாநிலத்தில் இருந்து கம்பத்துக்கு கஞ்சா வாங்கி தேனி மாவட்டத்தின் பல்வேறு பகுதிகளில் உள்ளவர்களுக்கு சில்லரையாக விற்க கொடுத்து வந்தது தெரிய வந்தது.

சமீப காலமாக தேனி மாவட்டம் கம்பம், சின்ன மனூர், கோடாங்கி பட்டி போன்ற பகுதிகளில் கஞ்சா விற்பனை கொடி கட்டி பறந்து வருகிறது. அதே போல மாவட்டத்தில் பல்வேறு இடங்களில் கஞ்சா செடிகளை சமூக விரோத கும்பல்கள் பயிரிட்டு வருகிறது. மேலும் வெளி மாநிலங்களில் இருந்து வாங்கி வந்த கஞ்சாவை பதுக்கி வைத்து கேரளாவில் அதிக விலைக்கு ஒரு கும்பல் விற்பனை செய்து வருகிறது.

இந்த கும்பலை பிடிக்க போலீசார் அதிரடி நடவடிக்கை எடுத்தாலும் தொடர்ந்து கஞ்சா விற்பனை, விளைச்சல், பதுக்கல் போன்றவை தொடர்ந்து கொண்டே இருக்கிறது. இதனால் தேனி மாவட்ட பொதுமக்கள் பீதி அடைந்துள்ளனர். தேனி மாவட்டத்தில் கஞ் சா விற்பனை செய்வோர் மீது அதிகபடியான நடவடிக்கை எடுக்க வேண்டும் என அனைத்து தரப்பு மக்களும் வலியுறுத்தி உள்ளனர்.

இது குறித்து பொது மக்கள் கூறுகையில், கடந்த சில மாதங்களாக தேனி மாவட்டம் கஞ்சா விற்பனையில் முதலிடத்தில் இருப்பதுபோல தோன்று கிறது. தொடர்ந்து சமூக விரோத கும்பலின் அட்டூழி யத்தால் பல பேரின் வாழ்க்கை பாழாகிறது. எனவே கஞ்சா விற்பனை செய்யும் கும்பலை பிடிக்க தனிப்படை அமைக்க வேண்டும் என்று கூறினர்.

மாவட்ட போலீஸ் சூப்பிரண்டு மகேஷ் கூறுகையில், தேனி மாவட்டத்தில் கஞ்சா விற்பனையை தடுக்க பல்வேறு நடவடிக்கைகள் எடுக்கப்பட்டு வருகிறது. எனினும் ஒருசில மர்ம நபர்கள் தொடர்ந்து கஞ்சா விற்பனை செய்து வருகின்றனர். கஞ்சா விற்பனை குறித்து புகார் வந்த மறு நிமிடமே நாங்கள் நடவடிக்கை எடுத்து வருகிறோம். ஒருசிலர் மீண்டும் மீண்டும் கஞ்சா விற்பனை செய்து வருகின்றனர்.

தொடர்ந்து கஞ்சா விற்பனை செய்வோர் குண்டர் சட்டத்தின்கீழ் கைது செய்யப்படுவார்கள் என்று கூறினார்.