பைனாப்பிள் சீஸ் கேக்

by **மதுமிதா** Fri Dec 20, 2013 11:14 am

தேவையான பொருட்கள் :

பைனாப்பிள் - பாதி (அ) நறுக்கிய துண்டுகள் - 1 1/2 கப்
பிஸ்கட்ஸ் - 8 (britannia marie)
க்ரீம் சீஸ் - அரை கப்
பட்டர் - கால் கப்
நீர் இல்லாத கெட்டி தயிர் - அரை கப்
சர்க்கரை - கால் கப் + தேவைக்கு
அகர் அகர் - ஒரு மேசைக்கரண்டி அளவு
க்ரீம் - ஒரு மேசைக்கரண்டி

செய்முறை :

பிஸ்கட்டை மிக்ஸியில் போட்டு பொடி செய்யவும். தயிரை இரவு முழுக்க துணியில் கட்டி நீரை வடித்து அரை கப் அளவு எடுத்து வைக்கவும். அரை கப் பைனாப்பிளை ஸ்மூத்தாக அடித்து வைக்கவும். விரும்பினால் வடிகட்டி வைக்கவும்.

பாத்திரத்தில் வெண்ணெய் விட்டு உருகியதும் பொடித்த பிஸ்கட் தூளை சேர்த்து கலந்து விடவும். (8 பிஸ்கட் என்றால் ஏறக்குறைய 1/2 - 3/4 கப் வரும்.)

கேக் செட் செய்ய போகும் பாத்திரத்தில் வெண்ணெய் தடவி அதில் பிஸ்கட் கலவையை போட்டு ஒன்று போல பரப்பி விடவும்.

எதாவது கரண்டியின் பின் பக்கம் கொண்டு அழுத்தி விடவும். இதை ஃப்ரிட்ஜில் வைத்து செட்டாக விட்டு சீஸ் கலவை செய்ய தயாராகலாம்.

க்ரீம் சீஸ், கெட்டி தயிர், க்ரீம் அனைத்தையும் ஒன்றாக சேர்த்து ஸ்மூத்தாக கரண்டியால் கலந்து விடவும்.

இதில் சர்க்கரை மற்றும் ஸ்மூத்தாக அடித்து வைத்த பைனாப்பிள் பியூரி கலந்து விடவும்.

பின் கால் கப் பொடியாக நறுக்கிய பைனாப்பிள் துண்டுகளை கலந்து விடவும். அகர் அகரை கால் கப்புக்கும் குறைவான நீர் விட்டு அடுப்பில் வைத்து கரைந்ததும் வடிகட்டி எடுக்கவும்.

இன்னும் கால் கப் பைனாப்பிளை நீர் விட்டு சுவைக்கு சர்க்கரை சேர்த்து ஜூஸாக அடித்து வடிகட்டவும்.

இப்போது சீஸ் கலவையில் 3/4 பாகம் அகர் அகர் கலவை விட்டு கலந்து ஃப்ரிட்ஜில் இருந்து எடுத்த பாத்திரத்தில் பிஸ்கட் மேல் ஊற்றவும். இதை மீண்டும் சில நிமிடங்கள் ஃப்ரிட்ஜில் வைக்கவும்.

பைனாப்பிள் ஜூஸுடன் மீதம் உள்ள அகர் அகர் கலவை சேர்த்து க்ரீம் சீஸ் கலவை மேல் ஊற்றவும்.

இவற்றை குறைந்தது 5 மணி நேரம் வரை ஃப்ரிட்ஜில் வைத்து எடுத்தால் சுவையான சீஸ் கேக் தயார்.

பத்திரமாக பாத்திரத்தை விட்டு வெளியே எடுக்கவும். மேலே பொடியாக நறுக்கிய பைனாப்பிள் தூவி அலங்கரிக்கவும்.

உள்ளே ஃப்ரெஷ் பைனாப்பிள் துண்டுகளுடன் சுவையான சீஸ் கேக் தயார்.

தயாரிப்பு : வனிதா

குறிப்பு :

ஒவ்வொரு லேயரும் செட் ஆக விட்டு அடுத்த லேயர் சேர்க்க வேண்டும். சீஸ் லேயர் செட் ஆகும் முன் ஜூஸ் ஊற்றினால் ஒன்றோடு ஒன்று கலந்து விடும். உடனடியாக செட் செய்ய ஃப்ரீசரில் 2 நிமிடம் வைத்து எடுத்தால் மேலே ஜூஸ் ஊற்றும் போது கலந்து விடாமல் இருக்கும். அகர் அகர் அதிகமாக சேர்க்க கூடாது. பின் சீஸ் கேக்கின் டெக்‌ஷர் மாறு படும். அகர் அகர்க்கு பதிலாக ஜெலடினும் பயன்படுத்தலாம். அகர் அகர் கலவை கொதிக்க கூடாது, அகர் அகர் உருகினால் போதும். சர்க்கரை அளவு பைனாப்பிளின் சுவைக்கு ஏற்றபடி சேர்க்கவும். தயிர் சேர்க்காமல் முழுக்க சீஸ் கூட சேர்க்கலாம்.

கேக் செய்ய ஸ்ப்ரிங் உள்ள கேக் டின் பயன்படுத்துவது நல்லது. நான் இங்கே பயன்படுத்தி இருக்கும் கேக் டின் கீழே உள்ள தட்டு தனியாக வரக்கூடியது. அதனால் சுலபமாக கேக் உடையாமல் எடுக்க முடியும். இல்லை எனில் கண்ணாடி கப்களில் கூட செட் செய்யலாம். அப்படியே ஸ்பூன் போட்டு பரிமாற வசதியாக இருக்கும். உள்ளே ஃப்ரெஷ் பைனாப்பிள் துண்டுகள் சேர்ப்பது உங்கள் விருப்பமே. இதை செய்ய டின்னில் கிடைக்கும் பைனாப்பிளும் பயன்படுத்தலாம். பொதுவாக சீஸ் கேக்கில் சீஸின் அளவு அதிகமாகவும் மேலே மற்றும் கீழே உள்ள லேயர் குறைவாகவும் தான் இருக்கும்.

ஜெலடின் / அகர் அகர் இல்லாமலும் செய்யலாம். ஆனால் ஃப்ரிட்ஜில் இருந்து எடுத்த உடனே சாப்பிட வேண்டும். இல்லை எனில் உருக துவங்கிவிடும். அகர் அகர் சேர்ப்பதால் வெளியே வைத்திருந்தாலும் உருகாமல் இருக்கும். அதே சமயம் குறைவாக சேர்ப்பதால் க்ரீமி சீஸின் சுவையும் டெக்‌ஷரும் மாறாமல் இருக்கும். இதே போல் மாம்பழம், ஸ்ட்ராபெரி, லைம், ராஸ்பெரி என எல்லாவற்றிலும் செய்யலாம்.

க்ரீம் சீஸ் செய்ய: வீட்டிலேயே க்ரீம் சீஸ் செய்ய சுத்தமான full fat yogurt வாங்கி துணியில் கட்டி தொங்க விடுங்கள். 6 - 8 மணி நேரத்துக்கு பின் நீர் இன்றி கிடைக்கும் க்ரீமில் சிறிது உப்பு சேர்த்து கலந்து எடுத்தால் அது தான் க்ரீம் சீஸ். பாலை (full cream milk) கெட்டியாக காய்ச்சி தயிர் ஆக்கி இதையும் இதே போல் செய்யலாம். அல்லது பனீர் (cottage cheese) செய்வது போல் செய்து 1 கப் பனீருக்கு 1 கப் கெட்டி தயிர் சேர்த்து ப்ளெண்டரில் அடித்தும் க்ரீம் சீஸாக பயன்படுத்தலாம். இரண்டுமே சுத்தமான சைவ க்ரீம் சீஸ் பயன்படுத்த விரும்புபவர்களுக்கு ஏற்றது. கடையில் வாங்கும் சீசை விட இது சுவை அருமையாக இருக்கும். அதனால் தான் இந்த குறிப்பிலும் கடையில் வாங்கிய க்ரீம் சீசுடன், வீட்டில் செய்த சீஸ் பாதி கலந்து பயன்படுத்தி இருக்கிறேன் (வடிகட்டிய தயிர்).

nanri muganuul