சர்வதேசவிண்வெளி ஆய்வு மையகுளிரூட்டும் சாதனம்பழுது

சர்வதேச
விண்வெளி ஆய்வு மையத்தில்,
குளிரூட்டும் சாதனம் பழுதடைந்துள்ளதால்,
அங்கு தங்கியுள்ள விண்வெளி வீரர்கள், மூன்று நாட்கள், நடந்து சென்று, கோளாறை சரி செய்யும்படி அறிவுறுத்தப்பட்டுள்ளனர்.

அமெரிக்கா, ரஷ்யா, ஜப்பான், ஐரோப்பிய நாடுகள் ஒத்துழைப்புடன்,
விண்வெளியில், சர்வதேச விண்வெளி ஆய்வு மையம் நிறுவப்பட்டு உள்ளது. இந்த ஆய்வு மையத்தில் தங்கியுள்ள
விண்வெளி வீரர்களுக்காக, அமெரிக்கா மற்றும் ரஷ்ய விண்கலங்கள் அத்தியாவசிய பொருட்களை, மூன்று மாதங்களுக்கு ஒரு முறை எடுத்துசென்று வினியோகித்து வருகின்றன.


தற்போது, இந்த மையத்தில், இரண்டு அமெரிக்கர்கள், மூன்று ரஷ்யர்கள் மற்றும், ஒரு ஜப்பானியர் உள்ளிட்ட, ஆறு விண்வெளி வீரர்கள் தங்கியுள்ளனர்.


இதற்கிடையே, கடந்த வாரம், இந்த மையத்தில் குளிரூட்டும் சாதனம் பழுதடைந்தது. "இந்த மையத்தில் உள்ள விண்வெளி வீரர்கள், விரைந்து, இந்த சாதனத்தின் பழுதை சரி செய்ய வேண்டும்' என, அமெரிக்காவின், "நாசா' விண்வெளி நிறுவனம் அறிவுறுத்தியுள்ளது.


விண்வெளி ஆய்வு மையத்தில்,
குளிரூட்டும் சாதனம் பழுதடைந்துள்ளது இது, இரண்டாவது முறை. கடந்த மே மாதம், அமோனியா வாயு கசிவால், குளிரூட்டும் சாதனம் பழுதடைந்தது. அப்போது, விண்வெளி வீரர்கள், விண்ணில், இரண்டு நாட்கள் நடந்து,
கோளாறை சரி செய்தனர்.

சர்வதேச
விண்வெளி ஆய்வு மையத்தில்
இயங்கும் இயந்திரங்களால், ஆய்வு மையம் வெப்பமடைந்துவிடும்;
இதை தடுப்பதற்கு, குளிரூட்டும் சாதனம் பயன்படுத்தப்படுகிறது.
தற்போது இந்த மையத்தின் ஒரு பாதியில் மட்டுமே, குளிரூட்டும் சாதனம் இயங்குகிறது.


நாசா நிர்வாகம் உத்தரவிட்டுள்ளதையடுத்து,
விண்வெளி வீரர்கள், நாளை மறுநாள், மற்றும், 23, 25 ஆகிய நாட்களில், விண்வெளியில் நடந்து, இந்த கோளாறை சரி செய்ய உள்ளனர்.