சிரிக்கும் பூக்கள் - குழந்தைக் கவிஞர் அழ.வள்ளியப்பா

by **சிவா** Thu Dec 19, 2013 5:01 pm

First topic message reminder :

பால முருகன்

சின்னச்சின்னக் குழந்தையம்மா
எங்கள் பாலமுருகன்-புன்
சிரிப்புக்காட்டி மயக்கிடுவான்
எங்கள் பாலமுருகன்

வண்ணமயில் மீதிருப்பான்
எங்கள் பாலமுருகன்-கையில்
வடிவேலும் வைத்திருப்பான்
எங்கள் பாலமுருகன்

பிள்ளையாரின் நல்லதம்பி
எங்கள் பாலமுருகன்-சிறு
பிள்ளைகளின் இனியதோழன்
எங்கள் பாலமுருகன்

கள்ளமில்லா உள்ளங்கொண்டால்
எங்கள் பாலமுருகன்-நம்மைக்
காத்தருள்வான், காத்தருள்வான்
எங்கள் பாலமுருகன்

by **சிவா** Tue Dec 24, 2013 12:06 am

தாடிச் சாமியார்

அக்கரைச் சீமையில்
சர்க்கரைச் சாமி
அவரது தாடி
அரைமைல் நீளம் !

தாடியைப் பிடித்துத்
தாங்கிச் செல்ல

அறுபது சீடர்
அவருக் குண்டு!

தேர்வடம் பிடித்துச்
செல்வது போலே

இருக்கும் அந்த
இனியநல் காட்சி!

சர்க்கரைச் சாமி
சாலையின் குறுக்கே

சிற்சில சமயம்
செல்லுவ துண்டு

சாலையைக் கடக்கச்
சரியாய் அரைமணி

ஆகும். அதனால்
அடடா, அடடா!

அனைவரும் அங்கே
அவதிப் படுவர்

எதிர்எதிர்த் திசையில்
எத்தனை கார்கள்!

எத்தனை வண்டிகள்!
எத்தனை மனிதர்கள்!

‘பாம்பாம்’ சத்தம்
பலமாய்க் கேட்கும்

‘கிணிங் கிணிங்’ எனவே
மணிகள் ஒலிக்கும்.

by **சிவா** Tue Dec 24, 2013 12:06 am

“எத்தனை நேரம்
இப்படி நிற்பது?”

என்பார் பலபேர.்
எனினும் சிலபேர்,

தாடியின் மேலே
தாண்டிச் செல்வர்;

தாடியின் கீழே
தவழ்ந்தும் போவர்.

குழந்தைக ளெல்லாம்
குடுகுடு என்றே

தாடியின் அடியில்
ஓடிடு வார்கள்.

சர்க்கரைச் சாமி
தாடியின் மகிமை

எடுத்துக் கூறிட
எவரும் முயன்றால்,

தாடிபோல் அந்தச்
சரித்திரம் நீளும்.

வேண்டாம். இத்துடன்
விடைபெறு கின்றேன்.

by **சிவா** Tue Dec 24, 2013 12:08 am

குப்புசாமி-அப்புசாமி

அண்ணன்

குப்புசாமி, குப்புசாமி,
கோடி வீட்டிலே
அப்புசாமி இருந்திடுவார்,
அழைத்து வந்திடு.

தம்பி

அப்பு சாமி வீட்டிலே
அவரைக் காணோம் என்றிடின்...?

அண்ணன்

தெப்பக் குளத்தங் கரையிலே
தேடிப் பார்த்து அழைத்துவா.

தம்பி

தெப்பக் குளத்தங் கரையிலே
தேடிப் பார்த்தும் இல்லையேல்...?

அண்ணன்

சுப்ர மணியர் கோயிலைச்
சுற்றி வருவார்; அழைத்துவா.

தம்பி

சுப்ர மணியர் கோயிலைச்
சுற்றிப் பார்த்தும் இல்லையேல்...?

அண்ணன்

கப்பல் காரன் தெருவிலே
கடையில் இருப்பார்; அழைத்துவா.

தம்பி

கப்பல் காரன் தெருவிலே
கடையில் பார்த்தும் இல்லையேல்...?

அண்ணன்

சும்மா திரும்பி வந்திடு.
துரித மாகச் சென்றிடு.

தம்பி

சும்மா திரும்பி வரவாநான்
இம்மாந் தூரம் அலைவது?
அம்மா டியோ! இங்குநான்
நிம்மதி யாய்த் தூங்குவேன்.

‘குப்புசாமி-அப்புசாமி’ பற்றிய மற்றப் பாடல்களை வேறு ஒரு நூலில் காணலாம்

by **சிவா** Tue Dec 24, 2013 12:11 am

குழந்தைக் கவிஞரின் படைப்பும் பணியும்

பிறப்பு : 7-11-1922, இராயவரம், புதுக்கோட்டை மாவட்டம்.

பெற்றோர் : அழகப்பச் செட்டியார், உமையாள் ஆச்சி.

கவிதை எழுதத் தொடங்கியது : 13-வது வயதில்.

‘சக்தி’யில் பணி : 1940-ல் வை. கோவிந்தன் அவர்களின் சக்தி அலுவலகத்தில்

பொருளாளராகச் சேர்ந்தார். ‘சக்தி’ இதழின் ஆசிரியர் தி.ஜ.ர. அவர்களின் ஆதரவால் சக்தியில் எழுதத் தொடங்கினார்.

இந்தியன் பாங்கில் பணி : 1941-ல் இந்தியன் பாங்கில் சேர்ந்து, படிப்படியாக உயர்ந்து, பல கிளைகளில் மேலாளராக இருந்தபின், காரைக்குடியில் வட்டார மேலாளராகப் (Area Manager) பணியாற்றி 1982 நவம்பரில் ஓய்வுபெற்றார்.

புத்தகங்கள் : இதுவரை குழந்தைகளுக்காக ஏறத்தாழ 60 புத்தகங்களை
எழுதியுள்ளார்.

மத்திய அரசின் பரிசு பெற்றவை :

1. மலரும் உள்ளம்
(முதல் தொகுதி) கவிதைகள்
2. பாட்டிலே காந்தி கதை

தமிழக அரசின் பரிசு பெற்றவை :

1. மலரும் உள்ளம்
(முதல் தொகுதி) கவிதைகள்
2. பாப்பாவுக்குப் பாட்டு
3. நல்ல நண்பர்கள் (கதை)
4. பெரியோர் வாழ்விலே
5. சின்னஞ் சிறு வயதில் வாழ்க்கை நிகழ்ச்சிகள்
6. பிள்ளைப் பருவத்திலே

குழந்தை எழுத்தாளர் சங்க நிறுவனர் : 1950-ல் குழந்தைகளுக்காக எழுதுவோரை ஒன்று சேர்த்து, குழந்தை எழுத்தாளர் சங்கத்தை நிறுவியவர். பல குழந்தை எழுத்தாளர்களை உருவாக்கியவர்.

தமிழ் எழுத்தாளர் சங்கத் தலைவர் :

தமிழ் எழுத்தாளர் சங்கத்தில் பல்வேறு பதவிகளை வகித்து 1966-ல் அச்சங்கத் தலைவராக ஒரு மனதாகத் தேர்ந்தெடுக்கப் பெற்றார்.

நன்றி: tamilvu.org

by Sponsored content

சிரிக்கும் பூக்கள் - குழந்தைக் கவிஞர் அழ.வள்ளியப்பா

சிரிக்கும் பூக்கள் - குழந்தைக் கவிஞர் அழ.வள்ளியப்பா

Re: சிரிக்கும் பூக்கள் - குழந்தைக் கவிஞர் அழ.வள்ளியப்பா

Re: சிரிக்கும் பூக்கள் - குழந்தைக் கவிஞர் அழ.வள்ளியப்பா

Re: சிரிக்கும் பூக்கள் - குழந்தைக் கவிஞர் அழ.வள்ளியப்பா

Re: சிரிக்கும் பூக்கள் - குழந்தைக் கவிஞர் அழ.வள்ளியப்பா

Re: சிரிக்கும் பூக்கள் - குழந்தைக் கவிஞர் அழ.வள்ளியப்பா