பிளஸ் 1 மாணவரை நிர்வாணமாக்கி ராகிங்

புதுச்சேரி அருகே அரசுப் பள்ளி மாணவனை நிர்வாணமாக்கி ராகிங் செய்ததால், பாதிக்கப்பட்ட மாணவரின் பெற்றோர் பள்ளிக்கு வந்த அமைச்சரிடம் முறையிட்டு கதறினர்.


புதுச்சேரி அடுத்த வில்லியனூர் அருகே உள்ள மணக்குப்பத்தைச் சேர்ந்தவர் வெங்கடேசன். இவரது மகன் ஸ்ரீதர் (16). வில்லியனூர் விவேகானந்தா அரசு மேல்நிலைப் பள்ளியில் பிளஸ் 1 கம்ப்யூட்டர் சயின்ஸ் படிக்கிறார். நேற்று மதியம் உணவு இடைவேளைக்குப் பிறகு, பள்ளி துவங்கிய போது, பிளஸ் 1 மாணவர்கள் ஐந்து பேர் கூட்டாகச் சேர்ந்து, வகுப்பறைக்கு சென்ற ஸ்ரீதரை வழிமறித்தனர். பின்னர் அவரின் பெயர், ஊர் உள்ளிட்ட தகவல்களை கேட்டு கேலி செய்தனர்.அதனைத் தொடர்ந்து, ஸ்ரீதரின் ஆடைகளை ஒவ்வொன்றாக கழற்றி நிர்வாணமாக்கி, இரு கைகளையும் பின்புறமாக மடக்கி பள்ளி வராண்டாவில் உள்ள தடுப்பு கட்டையில் பிறந்த மேனியாக நிற்க வைத்து, மற்ற மாணவர்களையும் அழைத்து வந்து காண்பித்தனர்.


இச்சம்பவத்தால் கூனிக்குறுகி துடிதுடித்துப் போன ஸ்ரீதர், அவர்களிடமிருந்து தப்பித்து ஆடைகளை அணிந்து கொண்டு, நடந்த சம்பவம் குறித்து தனது வகுப்பு ஆசிரியரிடம் கூறி கதறி அழுதார்.இது குறித்து பள்ளி துணை முதல்வரின் கவனத்திற்கு கொண்டு செல்லப்பட்டது. ஸ்ரீதரின் பெற்றோருக்கு தகவல் தெரிவித்து பள்ளிக்கு வரவழத்தனர். தங்கள் மகனுக்கு நேர்ந்த அவமானத்தைப் பொறுக்க முடியாமல் பெற்றோர் பள்ளி வளாகத்தில் அழுது புரண்டனர்.


மாலையில் பள்ளி வளாகத்தில் நடந்த மரக் கன்றுகள் நடும் விழாவில் பங்கேற்ற பொது சுகாதாரத் துறை அமைச்சர் நமச்சிவாயம், வில்லியனூர் கொம்யூன் பஞ்சாயத்து சேர்மன் நடராஜன் ஆகியோரிடம், தனது மகனுக்கு நேர்ந்த கொடுமை குறித்து பெற்றோர் மற்றும் உறவினர்கள் முறையிட்டனர். சம்பந்தப்பட்ட மாணவர்கள் மீது நடவடிக்கை எடுக்குமாறு பள்ளி துணை முதல்வரிடம் அமைச்சர் தெரிவித்து விட்டு சென்றார்.மாணவருக்கு நேர்ந்த கொடுமை குறித்து, பள்ளி துணை முதல்வரிடம் கேட்டபோது, ஒழுங்கு நடவடிக்கைக் குழுவை கூட்டி நடவடிக்கை எடுக்கப்படும் என "கூலாக' கூறினார். அரசுப் பள்ளியில் மாணவரை நிர்வாணப்படுத்தி ராகிங் செய்த சம்பவம் பெற்றோர் மத்தியில் பெரும் அதிர்ச்சியை ஏற்படுத்தி உள்ளது.